1. Israelitamnim Sorvespora fuddem vaitt tem kelem ani Sorvesporan tankam challis vorsam Filistinamchê adhin kele.
2. Zora ganvcho, Dan kullantlo, êk dadlo aslo; tachem nanv Manoa. Tachi potinn vanztti dekhun, tika ek-ui bhurgem zolmunk naslem.
3. Sorvesporacho dut hê bailek dixtti poddlo ani tannem tika mhollem: 'Polle, tum vanztti dekhun tuka bhurgem-ball na tori tum gorbhest zatoli-i ani eka bhurgeak zolma haddtoli.
4. Punn atam thaun borich chotrai dhôrun rav. Dakam-rôs ani lagta toslo soro pieum naka; ani kãich opovitr khaum naka,
5. kiteak tum gorbhest zatolii ani tuka êk put zolmotolo. Tachea matheak vakôr lagcho na kiteak tea bhurgeak avoichea kusveant thaun Devak bhettoilolo Nazarit mhonn pachartolim. Filistini lokachea hatantli Israel-porjek nivarunk to suru kortolo.'
6. Tedna ti bail hi khobor aplea ghovak sangunk geli: 'Konn-eklo Devacho monis atanch mhojê-xim ailolo; tachem rup Devachea duta sarkem, itlo tezvont to distalo. To khoim thaun aila tem hanvem tachê kodde vicharunk na; ani tannem aplem nanv-ui mhaka ugddapem korunk na.
7. Punn tannem mhaka oxem sanglem: 'Tum gorbhest zatolii ani eka putak zolm ditolii. Atanch thaun dakam-rôs ani lagta-toslo soro pieum naka ani kãich opovitr khaum naka. Kiteak avoichea kusveant thaun moro porian, tea bhurgeak Devak bhettoilolo Nazarit mhonn pachartolim. ' '
8. Tedna Manoahan Sorvesporak oxem prarthon kelem: 'Sorvespora hanv tuka vinoitam, Tunvem pattoilolo to Devacho monis amchê-xim porot ieum-di ani zolmuncho asa tea bhurgeak ami kitem-kat korunk zai tem amkam xikoum-di.'
9. Devan Manoahachem magnnem aikolem ani ti xetant bosloli astana Devacho dut tê ostorêk novean mellunk ailo. Ticho poti Manoah tichea sangata naslo.
10. Ti ostori doddvoddan dhanvun geli ani aplea potik sanglem, 'tea disa mhaka dixtti poddlolo toch monis mhaka novean dixtti poddla.'
11. Manoah utthlo, aplê ghorkarni pattlean gelo ani, tea mon'xa sorxim pavtôch, taka mhollem, 'Hê ostoriê lagim uloil'lo to tunch?' 'Hôi, Hanvuch to,' tannem zobab dilo.
12. Tedna Manoahan vicharlem: 'Tum atam sangtai tem pallun ietôch tea bhurgeachem jivit koxem zatolem?'
13. Sorvesporachea Dutan Manoahk zobab dilo, 'Hê ostorêk hanvem addvarleat teô vostu tinnem pois korunk zai.
14. Dak-valichem ieta tantlem tinnem kainch khaunchem nhoi, nhoi mhonn soro vô lagrem pivonn pieunchem nhoi vô kitench oxud'dh khaunchem nhoi; ani jem sogllem Hanvem tika formailam tem ti pallum di.'
15. Tedna Manoahan Sorvesporachea Dutak mhollem: 'Ami tuka êk bokuddlo toiar kori-sor, tum rav mhonn ami magtanv.'
16. Punn, Sorvesporachea Dutan Manoahak zobab dilo: Tum mhaka rav mhonn prarthtai zalearui, Hanv tujea jevnnant vantto gheuncho na, punn, tuka zai zalear, tujean Sorvesporak êk hom' bhettounk zata.'
17. Manoahan taka mhollem: 'Tujem nanv kitem? tujim utram pallon ietat tedna, ami tuka man diunk?'
18. Sorvesporachea Dutan taka zobab dilo, 'Tum mhojem nanv kiteak vichartai? Mhojem nanv kovtik ani vichitr.'
19. Tedna Manoahan bokuddlo ani bhettovnni ghetlim ani khoddpar tancho hom' koso Sorvesporak, Ochorianchea Ghôddnnakarak bhettoilo. Manoah ani tachi potinpolleit ravlim.
20. Jedna agttem vedi thaun mollba vatten choddlem, Sorvesporacho dut tea ujeachea ulopan Manoah ani tachê potini fuddeant choddon gelo. Tedna tim zomnir saxttangim poddlim.
21. Uprant, Sorvesporacho dut Manoahak ani tachê pottinnik anik dixtti poddlona. Punn to Sorvesporacho Dut mhonn Manoah somzolo.
22. Manoahan aplê potinik mhollem, 'Ami khoreanich mortolim, karonn ami Devak pollela.'
23. Punn potinin zobab dilo, 'Sorvesporak amkam jivexim marunk zai aslim zalear, to hom' ani bhettovnni amchea hatantli manun ghenvcho naslo. Nhoi mhonn ami jem sogllem pollelam tem polleunk dinvcho naslo ani ami aikolam tem aikunk dinvcho naslo.'
24. Tê ostorien eka putak zolm dilo ani Samson mhonn taka nanv dovorlem. To bhurgo vaddlo ani Sorvesporan tacher axirvad ghalo;
25. Sorvesporacho svas taka Zorah ani Eshtaol- hanchê modem, Danachea mollar taka zagrut kortalo.
