1. Abimeleka uprant, Tola, Puahacho put, Dodocho natu, Israelak suttka diunk upzolo. To Issakar kullacho, Shamirant Efraimachea dongri prantant ravtalo.
2. Israelant tevis vorsam fuddariponn choloilea uprant to melo ani Shamirant taka purlo.
3. Tachê uprant Gileadantlo Jair upzolo ani bavis vorsam tannem Israelacher fuddariponn choloilem.
4. Taka tis put asle ani boska aslolea gaddvancher te bhonvtale ani Gileadachea prantant tis xaranche dhoni asle; hea xarank aiz porian Harvoth-Jair mhonn nanv asa.
5. Jair melo tedna, Kamonant taka purlo.
6. Israelkaramnim Sorvespora mukhar vaitt tem novean kelem. Tãnnim Baal, ani Astarte hanchi, Aramache ani Sidonache dev, Moabache dev, Amonitanche ani Filistinanche dev hanchi seva keli. Tãnnim Sorvesporak patt keli ani Tachi seva anink korunk na.
7. Tedna Sorvesporacho rag Israelacher pettlo ani Tannem tankam Filistinanchê ani Amonitanchê adhin kele.
8. Hannim, tea vorsa thaun otthra vorsam porian, Israelkarank mostile ani piddapidd dili- mhonngê, Gileadant Amonitanchea desant, Jordanachê poltoddi ravtolea Israelkarank.
9. Tea bhair, Amoniti Jordan utortale ani Judah, Benjamin ani Efraimacher zhuz kortale; hea pasot Israel trasank sampoddlolo aslo.
10. Tedna Israelkaramnim Sorvesporak oso ulo marlo: 'Ami tujer okman kela, kiteak Sorvespora amchea Devak sôddun, Baal devanchi ami seva kelea.'
11. Sorvesporan Israelkarank zobab dilo: 'Ejiptkaramnim ani Amonitamnim, Aminitamnim ani Filistinamnim,
12. Sidon'karamnim, Amalekitamnim ani Midianitamnim tuka piddapidd dili ani tunvem Mhaka ulo marloi tedna, Hanvem tanchea chopkeantle tumkam soddounk nant?
13. Punn atam, tumi Mhaka sanddlo ani dusrea devank tumi bhozleat dekhun, Hanv tumkam anink kednanch vattaichona.
14. Tumi vinchun kaddleat tea devam-xim vochat ani tankam ulo marat; atam tumi trasant asat mhonnttôch, tãnnim tumkam vattaum-di.'
15. Israelkaramnim Sorvesporak mhollem: 'Ami patok kelam. Tuka dista toxem amchê sovem kôr,f fokot aichea disa amkam vattai.'
16. Tãnnim aplea porkea devank apnnam modle bhair uddoile ani Sorvesporachi seva keli. Israelachi durdoxa anink sôsunk Sorvesporak nozo zalem.
17. Amonit ektthoule ani Gileadant aple tombu tannle. Mizpahnt Israelkar toxech zoma zale ani tombu tannle.
18. Ani lokan ani Gileadachea sardaramnim eka-mekak mhollem 'Amonitam add zhuz suru korunk konn fuddem sortolo? Toch monis Gileadant ravtolea soglleancho fuddari zatolo.'
