1. Ehudachea mornna uprant, Israelkaramnim Sorvesporachea dolleam mukhar porot vaitt tem kelem.
2. Ani Sorvesporan tankam Kanaanachea raza Jabinachea tabeant kelim, to Hazor nanvacho senapoti raj choloitalo. Tacho sordar Sisera aslo, to Haroshetha-Goiim nanvachê suater ravtalo.
3. Israelkaramnim Sorvesporak ulo marlo karonn, lokonddache nnoixim roth gheun, Jabinan vis vorsam Israelkarank piddapidd dil'li.
4. Tea kallar, Lappidothachi potinn, bhaknnarinm Deborah, Israelacher fuddariponn choloitali.
5. Ti 'Deborahchea khazur maddachea' ponda Ramah ani Bethel hanchê modem, Efraimachea dongri prantant bostali ani Israelacho lôk tichê sorxim neai gheunk ietalo.
6. Tinnem Naftalichea Kedesh thaun, Abinoamachea putak, Barakak apounk dhaddlo ani taka mhollem: ' Chol, Tabor porvota-xim voch ani tujea sangata Naftalichea ani Zebulunachea kullantle dha hozar dadleank vhor.
7. Jabinachea senapoti Siserak Hanv, tachea rotham ani soinikam soit, Kishon vhalla-xim tuka mellunk vochunk bhuloitolom ani taka tujea hatant ghaltolom'- oso Sorvespora Israelachea Devan hukum ghala nhoi?'
8. Barakan tika zobab dilo: 'Tum mhojea sangata iexi zalear, Hanv vetolom; Tum mhojea sangata iena zaxi zalear, Hanv vechona, kiteak Sorvesporacho dut mhaka ies ditolo to dis venchun kaddunk Hanv nokllom.'
9. Hanv dubhava vinnem tujea sangata vetolim'- tinnem zobab dilo- 'punn tum bhair sortai tea kamant tum mhoima zoddcho-nai, karonn Sorvespor Siserak ekê ostorêchea hatant ditolo.' Mhonnttôch Deborah toiar zali ani Baraka sangata Kedesh geli.
10. Barakan Zebulunak ani Naftalik apoile ani dha hozar monis tachê pattlean gele ani Deborah-i tachea sangata geli.
11. Keniti Heber aplea Kainchea kullacho koddsorlolo ani tosoch Moizesachea sasrea Hobabachea putam koddcho koddsorlolo; tannem Zaanannimant xindur rukha lagim Kedesha sorxim aplo tombu tannlolo.
12. Barak, Abinoamchea putan Tabor porvotacher tombu tannleat mhonn Siserak khobor mell'lli. Mhonnttôch, Harosheth-ha-Goiim thaun Kishon valla lagim aple soglle nnoixim lokonddache roth ani soglli fouz Siseran apoun ektthaim keli.
13. Siseran aple soglle ghoddesvor mhonngê, lokhonddache nnoixim ghoddesvor ani tachê-xim aslolea sogllea soinikank Harosheth-ha-Goiim thaun Kishon nodicher apoun haddle.
14. Deboran, Barakak mhollem, 'Utth! Kiteak aichea disa Sorvespor Siserak tujea tabeant ditolo. Tumchea mukhar Sorvesporuch veta nhoi?' Tedna Barak ani tachêpattlean dha hozar monis Tobotporvotar thaun sokla denvle.
15. Jedna Barak fuddem sorlo tedna Sorvesporan Siseracher hol'lo korun kampero haddlo, tache soglle ghoddesvor ani tachi ak'khi fouz marun uddoili. Siseran aplea ghoddesvora thaun sokla uddi marli ani dhanv marun pôll kaddli.
16. Barakan tachea ghoddesvorancho ani foujecho, Harosheth-ha-Goiim meren fatt ghetli. Siserachi ak'khi fouz tolvarik boli poddli; ektto porian jivo urlo na.
17. Itlem mhonnosor, Sisera dhanvun-dhanvun Kenitkar Heberachê bailechea tombu lagim pollun gelo. Kiteak, Hazoracho raza Jabin ani Kenitkar Heberachea kuttumba modem xantitai asli.
18. Jael, Siserak mellunk bhair ailo ani taka mhollem, 'Bhieum naka dhonia! Hanga mhojê fuddeant tum rav.' To tichea tombunt tichea sangata ravlo, ani tinnem taka kamboll ghalun pangurlo. (tachea angar kamboll ghatli).
19. Tannem tika mhollem, 'Mhaka pieunk ilem udok di, kiteak Hanv tanelam.' Dudachem aidon ugddun tinnem taka dud pieunk dilem ani porot tachea angar kambôll ghatli.
20. Magir tannem tika mhollem, 'Tombuchea darant ubi rav ani zôr konnui ieun tuka vicharit, 'Hangasor konnui monis asa?' tôr 'Na' mhonn sang.'
21. To thoklo dekhun taka sust nhid poddli. Tedna Jael Heberachê bailen tombuchi khutti ani tutio ghetlo ani gopchup tachê-xim geli ani ti khutti tinnem tachê kuddint romboili. Ti aspas vochun zomnint rombli tedna to melo.
22. Magir Barak Siserachea sôdik laglo. Jael taka bhettli ani tinnem mhollem, 'Bhitôr io, ani tum sôdta tea mon'xak Hanv tuka dakhoitam.' To tichea tombunt bhitôr gelo ani pollet zalear Sisera morun poddla ani tachê kuddint tombuchi khutti asli.
23. Hê toren tea disa, Sorvesporan Kanaanachea raza Jabinak Israelitam mukhar kirkollailo.
24. Israelitamnim, Kanaanachea raza Jabinacher ies melloit ravle ani xevttim tacho bhosm kelo.
