1. Tea disamnim Israelant Raza naslo. Atam tea disamnim Danachem kull apnnak ravunk dês sôdit aslem, karonn tê meren tankam Israelachea kullam modem khoinchoch prant diunk naslo.
2. Danitamnim aplea kullantle panch kalljidar mon'xank dhaddle, tãnnim Zorah thaun tem Eshtaol porian, to dês topasunk ani tacho thav gheunk. Tãnnim tankam mhollem, 'Vochat ani to dês topasun kaddat.' Te panch zann Efraimachea dongri prantant, Mikahchea ghora porian aile ani rat thoim sarli.
3. Te Mikahchea ghora lagim astana, tea tornattea Levitacho avaz tãnnim vollkholo, ani lagim vochun taka vicharlem, 'Tuka hangasor konnem haddla? Tum hanga kitem kortai? Tum hanga kiteak ravtai?'
4. Tannem zobab dilo, 'Mikahn mhojê lagim koblat kelea. To mhaka mozuri dita ani Hanv tacho pujari koso vavurtam.'
5. Tãnnim zobab dilo, 'Toxem tôr,, Deva lagim budh mag, ami asam tê iatrecher amkam iês melltolem zalear amkam kollum-di.'
6. Pujarean zobab dilo, 'Xantin vochat; Sovespor tumchê iatrechi rakhonn korta.'
7. Te panch zonn, tedna bhair sorle ani Laish pavle. Thoincho lôk somadhanan jieta. Sidoni lokanchê sonvoiê pormannem, thoim xantitai ani visvas vosta ani tea desant koslich vost unni vô komi na, te Sidonikaram thaun borech pois asat ani Arameankaram lagim tankam sombondh na hem sogllem tãnnim pollelem.
8. Tedna te Zorah ani Eshtaol aslolea aplea bhavam sorxim porte gele, ani jedna tea bhavamnim tankam vicharlem, 'Tumchê lagim koslo vako asa?'
9. Tãnnim mhollem, 'Uttha! Ami vochon tanchê lagim zhuzunk zai, karonn ami to dês pollela ani to ekdom boro, kainch kori nastana hanga bosum nakat! Bhair soronk ani to dês tumchea tabeant korunk vogot ibaddi nakat.
10. Jedna tumi thoim pavxat tumkam visvaxi lôk melltolo. To dês lamb-rund aslolo, ani Devan to tumchê adhin kela. Koslich vost thoim na mhonn na.'
11. Mhonnttôch hea svata thaun, Zorah-ant ani Eshtoalant Danachea kullantle, zhuzak toiar zaun soixim monis bhair sorle.
12. Te gele ani Judantlea Kiriath-Jearim svater tãnnim aple tombu tannle, ani hech khatir tê svatek aiz pasun Danachea Tombunchem Moll mhonnttat. Ti svat Kiriath-Jearim hachê ostomtek asa.
13. Thoim thaun, Efraimchea dongri prantant te bhitôr sorle ani Mikahchea ghora aile.
14. Desachi topasnni korunk ailolea tea panch mon'xamnim, tedna aplea bhavank mhollem, 'Hea ghoramnim êk efod asa, thoddeô ghorcheô murti, êk kantoiloli murti ani êk nokxil'li protima asat mhonn tumi zannot? Mhonnttôch, tumi kitem tanchem tem ievzun kaddat.'
15. Rosteachea nakear vollon, tornno Levit ravtalo thoim te gele, Mikahchea ghora ani tãnnim taka xantitaien voddkilo.
16. Tedna zhuzak toiar zal'le, Danitanche soixim monis, darvontteachea umbrear ube ravle.
17. Desachi topasnni korunk gelole panch monis ghorant bhitôr gele ani kantoiloli efod, ghorcheô murti ani rupean nokxil'li protima heô soglleô vostu vheleô. Tea mhonnosor darvonteachea umbrear, zhuzak toiar aslolea soixim mon'xam sangata pujari ravlo.
18. Hea mon'xamnim, Mikahchea ghorant bhitôr sorun, kantoiloli murti, efod, kull devancheô murti ani nokxiloli protima hem sogllem vhelem. Punn pujarin mhollem, 'Tumi kitem kortat?'
19. Ogi rav' tãnnim zobab dilo, 'Tujea tonddar hat dovor ani amchea sangata ie, ani amcho bapui ani purohit za. Kitem tuka odik borem eka mon'xacho kull iadnik vô Israelacho eka kullacho vô gotracho iadnik zaunk.'
20. Pujari ekdom' khuxal zalo; tannem efod, kull Dev ani kantoiloli murti vhelim ani loka sangata ravunk gelo.
21. Tim choltalim ti vatt novean dhôrli, ani bailank, bhurgeank, zonnavorank, ani samon apnna fuddem dovorlem.
22. Mikahchea ghora sun tim thoddich vatt cholona fuddem, Mikahchea ghora bhonvtonnim ravtolea lokan arodd marli ani Danitanchi patth gheunk bhair sorle.
23. Danitam patthlean bob marit te gele tedna tãnnim vollon Mikahk vicharlem, 'Hê porim bob marunk tuka kitem zalam?'
24. Tannem zobab dilo 'Mhozo Dev zo hanvem kelolo, to tumi vhelo ani mhozo pujari-i bi. Tumi vochun gelear ani mhaka kitem urlam? Ani unchlean tumi mhaka vichartat, 'Kitem zalam? ' '
25. Danitamnim mhollem, 'Tujem anink aikunk ami toiar na, ragixtt monis tuji patth gheunk lagle, ani haka lagon tuka ani tujea ghorabeak jivacho ghat zaunk pavot.'
26. Oxe Danit aplê vatten gele, ani Mikah, te odhik ghôtt asat mhonn, zanno zaun vollon ghora gelo.
27. Mikahn kelolo dev ani tachea iadnikak gheun Danitamnim, Laishantlea xant ani visvaxi lokam sorxim gele. Tancher tolvarin hol'lo kelo ani uzo laun tea xaracho bhosm kelo.
28. Sidon pois aslolean ani Aramaenkaram-xim sombond dovrunk zaunk naslolean tanchea adarak konn pavunk na. Hem xar Beth-Rehob he khonnint aslem. Magir tem xar tãnnim novean bandlem ani thoim te ravunk lagle.
29. Taka tãnnim Dan mhonn nanv dilem, jem Israelachea purvozachem nanv Dan aslem.Toripunn xarak Laish oxem mhonnttale.
30. Danitkaramnim apnna khatir kantoiloleô murteô ubeô keleô. Dês pordêsant vocho meren Moizesacho natu Jonathan, Gershomacho put ani Jonathanache put tachê uprant Dan kullieche iadnik asle.
31. Devachem ghor Shiloh hanga aso meren, Mikahn toiar keloli kantoiloli murti thoim dovorli.
