1. Efraimache monis zhuzak ektthaim zale. Zafonant Jordan nodichê poltoddi gele ani Jefthahk mhollem: 'Amkam borabor vhoro nastana, Ammonitancher zhuz korunk kiteak mhonn tum poltoddi geloi? Ami tujê soit tujem ghor lhasun uddoitoleanv.'
2. Jefthahn zobab dilo: 'Mhojea lokak ani mhaka Ammonitam kodde motti dusmankai asli tedna, hanvem tumkam adarak apoile, punn amkam tanchea hatantle nivarunk tumi aile nant.
3. Konnuch amkam vattaunk iena mhonn polleun, hanvem mhozo jiv sonkoxttant ghalo ani Ammonitancher add zhuzunk gelom; Sorvesporan tankam mhojê adhin kele. Tôr aiz, mhojê lagim zhuzunk tumi kiteak mhojer fuddem sortat?'
4. Tedna, Gileadantlea sogllea mon'xank ektthaim korun, Jefthahn Efraimacher zhuz kelem; Gileadanchea mon'xamnim Efraimak haroilo karonn Efraim mhonnttalo: 'Tumi Gileadkar fokot Efraimantle pollun gel'le, tumi Efraimachea ani Manassechea mazantle.'
5. Uprant, Gileadan Jordan nodiche par utrunk Efraimak bond kelo ani, jedna Efraimantlo konnui pollun vochpi 'Mhaka par utrum di' mhonnit; tedna Gileadkar taka vichartole; 'Tum Efraimkar?' Tannem na mhollear,
6. tedna te 'Borem tôr, Shibboleth mhonn.' Konnem tôr 'Sibboleth' mhollem zalear, tachê lagim tem sarkhem ucharunk zai naslem dekhun, te taka dhôrun Jordanachea paramnim jivexim martale. Hê somoim, bave-challis hozar Efraimkarank jivexim marle.
7. Jefthahn Israelacher sôv vorsam fuddariponn choloilem. Uprant, Gileadkar Jefthah melo ani taka Gilead tachea xarant, purlo.
8. Tachê uprant, Bethlehemantlo Ibzan Israelant fuddari zalo.
9. Taka tis put ani tis dhuvô asleô. Tannem aplea kulla bhair aplea dhuvank logn zaunk dilim, ani, kulla bhair thaun, aplea putank tis hoklô haddleô. To Israelant sat vorsam fuddari aslo.
10. Uprant Ibzan melo, ani taka Bethlehemant purlo.
11. Tachê uprant, Zebulunacho Elon Israelant fuddari zalo. To dha vorsam Israelant fuddari aslo.
12. Magir Zebulunacho Elon melo ani Aijalon Zebulunachea prantant taka purlo.
13. Tachê uprant, Pirathon-antlea Hillelacho put, Abdon Israelant fuddari zalo.
14. Taka challis put ani tis natu asle; te sot'tôr torunn gaddvancher bosun bhonvtale. To atth vorsam Iisraelant fuddari aslo.
15. Pirathonantlo Hillelacho put Abdon melo ani Amalekitanchea dongri ganvant, Efraimachea prantant, Pirathonant taka purlo.
