1. Gileadantlo Jefthah êk bolixtt zhuzari aslo. To ekê naikinnicho put. Gilead Jefthahcho bapui,
2. punn Gileadachê potinichei taka put zolmol'le ani te vaddlea uprant, potinichea putamnim Jefthahk dhanvddailo, oxem mhonnon: 'Bapaichea daizant tuka vantto na, karonn tum dusrê ostorecho put.'
3. Jefthah aplea bhavam sorxilo pollun gelo ani Tob mulkant ravlo. Jefthahn addkam-naddkam korpiam zobordost mon'xank aplea sangata ghetle; te tachea vangdda luttunk vetale.
4. Thoddea kalla uprant, Amonitamnim Israelacher zhuz manddlem.
5. Amonitamnim Israelacher akromonn kelem tedna, Gileadache zannte Jefthahk Tob thaun haddunk gele.
6. Tãnnim Jefthah-ak mhollem: 'Ie, amcho sardar za; oxem amchê lagim Amonitancher add zhuzunk zatolem.'
7. Jefthahn Gileadachea zannteank zobab dilo: 'Mhozo dvês kel'lo ani mhaka mhojea bapaichea ghorantlo dhanvddailo te tumich nhoi te? Atam tumi sontapak sampoddleat tedna mhojê-xim kiteak ietat?'
8. Gileadachea zannteamnim Jefthahk mhollem: 'Heach pasot ami atam tujê-xim aielanv tum amchê borabor ie, Amonitam add zhuz, ani amcho fuddari za, Gileadant ravtat titleancho-i fuddari za.'
9. Tedna, Jefthahn Gileadachea zannteank vicharlem: 'Tumi mhaka Amonitam add zhuzunk porot vhortat ani Sorvespor tankam mhojê udexim haroit zalear, Hanv tumcho fuddari zatolom ki na?'
10. Tedna Gileadachea zannteamnim Jefthahk mhollem: 'Tunvem amkam sanglam toxem ami korinanv zalear, Sorvespor amchê modem govai zaum.'
11. Jefthah Gileadachea zannteam borabor gelo ani lokan taka aplo fuddari ani sardar mhonn mandun ghetlo; ani Mizpahnt, Sorvespora fuddeant, Jefthahn aple soglle prostav spoxtt sangun dile.
12. Uprant, Jefthahn Amonitanchea razak oxem sangun dut dhaddle: 'Tumkam amchea desant bhitôr ieunk ani tachê add zhuz korunk tumkam amcher kitem vaitt asa?'
13. Amonitanchea razan Jefthahchea dutank oso zobab dilo: 'Jedna Israel porza Ejiptantli bhair sorun aili, tedna Arnon thaun Jabbok ani Jordan porian mhozo dês tinnem aplea tabeant kelo; tôr atam to xantikaien mhaka porot diat.'
14. Jefthahan Amonitanchea raza sorxim ho zobab diunk dutank porot dhaddle:
15. Jefthah oxem sangta 'Israelan Moabacho dês nhoi mhonn Amonitancho dês aplea tabeant korunk na.
16. Jedna Israel porza Ejiptantli bhair sorli, ti oronneantlean Loveanchea Doria porian cholot geli ani Kadesh pavlea uprant,
17. tinnem Edomachea razak oxem sangunk dut dhaddle: tujea desantlean mhaka vochunk di, punn Edomachea razan aikun ghetlem na. Tinnem Moabachea razak-ui sangunk dhaddlem, punn to-i kobul na zalo. Oxi Israel porza Kadeshantuch urli.
18. Uprant, ti oronneantlean fuddem vochun, Edom' ani Moab hea desachea ximam bhailean chol'li ani Moabachea desachê udentik pavli ani Arnon hachê poltoddi tinnem aple tombu tannle, punn ti Moabachea desant bhitôr sorunk na, karonn Arnon Moabachi xim.
19. Uprant, Israelan Heshbonant raj choloitolea Amonitanchea raza Sihonak dut pattoile. Israelan taka sanglem: Hanv vetam tea ganvant pavunk tujea desantlean vochunk mhaka porvangi di.
20. Punn Sihonan Israelak aplea desantlean vochunk dilem na; tannem apli soglli fouz ektthaim keli; Jahaza suater aple tombu tannle ani Israela add zhuz manddlem.
21. Sorvesporan Israelachea Devan Sihon ani tachi soglli fouz Israelachê adhin keli; Israelan khud tankam haroilim ani, hachê vorvim, Israelan thoim ravtolea Amoritancho sogllo dês aplo kelo.
22. Oxem Arnon thaun Jabbok porian ani oronnea thaun Jordan porian sogllo dês Israelan aplea tabeant kelo.
23. Ani atam, Sorvesporan Israelachea Devan Aplê porjek diunk Amoritancho dês kaddun uddoilo mhonnttôch, Israelak kaddun uddounk tujê kodde ghoddot tuka dista?
24. Kemosh tumchea Devan, tumkam dilam tem tumi samballunk favona? Toxench, Sorvesporan amchea Devan, amchea purvozanche hatantlem daiz mhonn amkam dilam tem amchem mhonn ami samballtoleanv!
25. Zipporacho put, Baalak, Moabacho raza, hachê-von tum kitem odhik vhodd? Kedna tori tannem Israelakodde zhogddem kelam vô tichê lagim zhuz kelam?
26. Jedna Heshbon ani tache prant, Aroer ani tache prant ani Arnonachê deger aslolim sogllim xaram Israelan apnna adhin kelim (tin'xim vorsam zaun gelim), tunvem tim tedna kiteak mhonn porot ghetlim nant?
27. Hanvem tumkam koslench luskonn korunk na, punn tum, mhojê add zhuzun, mhaka onit kortai. Zo Sorvespor fuddari Tannench aichea disa Israelitam ani Amonitam modem nirnnoi gheuncho. ' '
28. Punn Jefthahn dhaddlolea sondexachi Amonitanchea razan koslich porva keli na.
29. Sorvesporacho Atmo Jefthahcher denvlo ani to Gileiad ani Manas'se utrun Gileiadchea Mizpak pavlo, ani Gileiad-chea Mizpa thaun Amonitam-xim vochunk tannem vatt dhôrli.
30. Ani Jefthahn Sorvesporak oxi êk angovnn keli: 'Amonitank Tum mhojea hatant ghalxi zalear,
31. Amonitam kodde zhuzun zoitivont zaun hanv portotana mhaka mellunk mhojea ghorachea darantlean poilo bhair sorta to Sorvesporacho zatolo ani tacho hanv Sorvesporak hôm' bhettoitolom.'
32. Jefthah Amonit asle thoim tancher loddai korunk gelo, ani Sorvesporan tankam tachea hatant ghale.
33. Aroer thaun Minith (vis xaram) ani Abelkeramim porian tanchê pattik lagun, tannem tankam har dili. Oxi tankam êk vhodd har poddli, ani Israelitam mukhar Amonit lôk khalto zauncho poddlo.
34. Jefthah Mizpak aplea ghora portotana, tachi dhuv taka mellunk aili; ti dholkeanchea avazar nachtali. Ti tachi eklich dhuv; tichê bhair taka anink dhuv nasli, put-ui naslo.
35. Tika polleli tedna, tannem aplim angvostram pinzlim ani mhollem: 'Dhuvê mhojê, koslem mhonn dukh tum mhaka haddtai? Mhojea durdoivachem karonn tum! Hanvem Sorvesporak bhas dil'li ani dil'lem utor mhojean pattim gheum nozo.'
36. Tinnem zobab dilo: 'Mhojea bapa, tunvem Sorvesporak bhas dil'lii; tujea dusmanam Amonitancher Tannem tuka zoit dilam mhonnttôch, tujê angovnnê pormannem mhojê sorim kôr.'
37. Uprant tinnem aplea bapaik mhollem: 'Mhaka êk upkar kôr, Mhaka don mhoine di. Hanv dongrancher vetam ani mhojea sangatinim borabor mhojem ankvarponn roddtam.'
38. Tannem zobab dilo: 'Voch.' Ani don mhoineank tika suttka dili. Mhonnttôch ti aplea boraborcheam sangatim geli ani dongrar aplem ankvarponn roddli.
39. Don mhoine zatôch, ti aplea bapai-xim portun aili ani tannem aplê angovnnê pormannem tichê sorim kelem. Ti ankvar ravloli. Ani heach khatir Israelant hi chal,
40. dôr vorsa, char dis Israelacheô dhuvô ghordar sôddun, Gileadit Jefthahchê dhuvê khatir vilap-rudon kortat.
