1. Jerubbaal (mhonngê Gideon) bhov sokallim utthlo ani tachea vangdda aslolo to sogllo lôk-ui; En-Harod suater tannem tombu tannlo; Midianachea tombunchem moll tachê ut'torek, Moreh dongra khal, falkeant aslem.
2. Sorvesporan Gideonak mhollem: 'Midian lokak tujê khala ghalunk, tujê vangdda chodd lôk asa; mhojê bodlek, Israel apnnachem punnem mhonn somzot ani mhonnot: 'Mhojêch xokten mhaka zoit mell''lam.
3. Tôr atam, sogllea lokak hem jahir kôr: 'Konn-ui bhirantin kampta tannem pattim vechem ani Gilboa dongrar thaun polleunchem' Bavis hozar lôk soddun gelo ani dha hozar lôk ravlo.
4. Sorvesporan Gideonak mhollem: 'Ozun-ui ekdom' chodd lôk asa.Tankam udka-xim vhor ani thoim Hanv tankam vinchun tuka ditolom. 'To tujea vangdda vochunk zai' -oxem Hanv sangin zalear, tannem tujea vangdda vochunk zai. 'To tujea vangdda vecho nhoi'- oxem Hanv sangin zalear, tannem vechem nhoi.'
5. Giedonan lokak sokol udka-xim vhelo ani Sorvesporan taka sanglem: 'Sunnea porim je udok chatt'tat tankam tum ekê vatten dovor, ani dimbier ravun udok pietat tankam dusrê vatten dovor.'
6. Hatantlem udok chattun piele te tin'xim asle; her sogllim udok pieunk dimbier poddl'lim.
7. Sorvesporan Gideonak mhollem: 'Udok chattlam tea tin'xim zannank gheun, Hanv tuka suttka ditolom ani Midianak tujê adhin kortolom; sogllea her lokak ap-aplea ghora vochum-di.'
8. Loka lagim aslolo purov ani xingam tãnnim kaddun ghetlim ani Gideonan sogllea Israelkarank tanchea tombumnim porot dhaddle, punn fokot tea tin'xim zannank dovorle. Midiankaranchem tombunchem moll, tachea tombunchea molla khala falkeant aslem.
9. Tê rati, Sorvesporan Gideonak mhollem, 'Tea tombunchea mollar denvun voch, Hanv tem tujê svadin korcho asam.
10. Tuka tôr khala vochunk bhirant dista zalear, tujea chakra Purahk gheun, tum tombum-xim sokol voch;
11. Te kitem uloitat tem aik; oxem tuka tanchea tombum-xim denvun vochunk boll melltolem.' Mhonnttôch aplea chakra Purahk gheun, tombunchea ximê voilea metta-xim gelo.
12. Tollanchea dhatt birea sarke, Midianit, Amalekit ani soglle Kadmonit falkeant manddlole asle; tanchim unttam doria vellechê renvê itlim mezunk zainant titlim aslim.
13. Êk monis dusrea mon'xak aplem sopon sangtalo. Tedna Gideon thoim pavlo; 'Mhaka ek oxem sopon poddlem: zovachea unddeachem ek kap Midianachem tombunchea mollar lotton ailem; eka tombu-xim tem pavlem, taka addoll'lem ani to tombu portilo.'
14. Tachea sangatean mhollem: 'Hem fokot Joashachea putachi, Israelkara Gideonachi torvar zaunk xokta. Devan Midian ani tanchem tombunchem moll tachê svadhin kelam.'
15. Oxem sanglolem sopon ani tachem vivoronn aikona fuddem, Gideon saxttangim poddlo; uprant, Israelkaranchea tombunchea mollant porot gelo ani mhollem: 'Utthat, karonn Sorvesporan Midianachea tombunchem moll tumchê svadhin kelam!'
16. Aplea tin'xim mon'xanche Gideonan tin zome kele. Zonn-ekleak tannem ek xing, ek khali aidon ani aidona bhitôr êk chuddi dili.
17. Tannem tankam sanglem: 'Mhaka polleiat ani Hanv kortam toxem korat. Hanv tombunchê ximer pavtolom tedna, hanv kortolom toxench tumi korunk zai.
18. Hanv mhojem xing vazoitolom ani je mhojea vangdda asat te-i toxench kortole; tedna tumi tombunchea molla sorbhonvtim xingam vazoiat ani oxi bob marat, 'Sorvespora khatir ani Gideona khatir! ' '
19. Mhonnttôch, Gideon ani tachea sangata asle te xembor monis, modlea parachê survatek, novea pahredaramnim aplo zago ghetananch, tombunchea mollachê ximer pavle; tãnnim xingam vazoilim ani aplea hatamnim aslolim aidonam foddlim.
20. Tinui zomeamnim xingam vazoilim ani aplim aidonam foddlim, chuddiô aplea dhavea hatamnim dhorleô ani uzvea hatamnim xingam vazoilim ani oxi bob marli: 'Sorvespora khatir ani Gideona khatir, torvar!'
21. Te soglle tombunchea molla sorvbhontonnim ube ravle. Ak'khem tombunchem moll gonddolak sampoddlem ani Midianit bob marit pollun gele.
22. Te tin'xim monis xingam vazoit asle tedna; ak'khea tombunchea mollant eka mon'xan dusreacher apli torvar uklunk Sorvesporan nirmilem. Zarethan, hachê dixen, Beth-ha-Shittah porian Tabboathachea fuddeant, Abel-Meholahachê degê pasun, soglle pollun gele.
23. Israelkaramnim, Naftali, Asher ani sogllea Manasseh kullanchea mon'xank ektthaim kele ani Midianit lokachea pallank lagle.
24. Gideonan Efraimachea dongri ganvamnim soglleak sondexkar oxem sangunk pattoile: 'Beth-Barahan ani Jordan pasun, Midianak fuddo korunk sokol ieiat ani, tanchê fuddem vochun, par tumchea hatant korat.' Efraimache soglle monis ekttovle ani, Beth-Barah ani Jordan pasun, par apnna adhin kele.
25. Tãnnim Midianache dog sordar, Oreb ani Zeeb hankam ghôtt dhôrle; Orebachea khoddpar tãnnim Orebak jivexim marlo ani Zeebachea soreachea ghanneacher Zeebak jivexim marlo. Te Midianachê pattik lagle; ani, Jordanachê poltoddi, Gideonak, Oreb ani Zeeb hancheô tokleô haddun dileô.
