1.Tea disamnim kitem ghoddlem tachi khobor Juditak mell'lli. Ti Merarichi dhuv, Merari Ox-acho put, Ox Juzecho put, Juze Ozielacho put, Oziel Elkiacho put, Elkia Ananiasacho put, Ananias Gideonacho put, Gideon Rafai-macho put, Rafaim Ahitubacho put, Ahitub Elijacho put, Elija Hilkiacho put, Hilkia Eliabacho put, Eliab Natha-naelacho put, Nathanaiel Salamielacho put, Salamiel Sarasadaiacho put, Sarasadai, Israelacho put.
2. Juditacho poti Manas'se, tichêch kullientlo ani ghoranneantlo, zovachea pikachea somoiar melolo.
3. Xetant bhore bandtat tea mon'xancher dollo dovortana, to votachea tapan tollmoll'lo ani to khattir poddun urlo. To aplea khud xarant Betulient melo ani taka aplea purvozam borabor. Dothan ani Balamon hanchê modem asa tea xetant purlo.
4. Ti vidva koxi, Judit tin vorsam ani char mhoine ghorantuch ravli.
5. Pattosa voir tinnem apnnak êk lhan-xem kudd bandlolem. Aplea benddak ti sak bandtali ani vidveponnachim angvostram ghaltali.
6. Son'vara adlo dis toxench Son'var, Amasa-adlo dis toxench Amasachea utsovacho dis ani Israelachea Ghora-nneache utsovanche dis sôddun aplea vidveponnachea dôr disa ti upas kortali.
7. Polleunk ti bhôv sobit-sundor rupachi. Tichea potin Manas'sen tika bhangar, rupem, sevok ani sevika, gorvam ani xetam dovorlolim. Ti hi soglli dovlôt borê bhaxen polletali.
8. Ti itli Devachê bhoktin jietali ki konnuch ticher vaitt uloinaslo. Judit ani zanntte
9. Udok nasun, uchamboll zaun koxê bhaxen lokan odhikariam add khoddok utram uloilim ani konn bhaxen panch disam uprant ak'kho nogôr Assirieka-rachê adhin korun, Uzzian soputa khal tankam bhas dili, tem Juditan aikotôch,
10. tinnem aplea ghoracho karbhar choloitolê sevikek dhaddun Uzziak, toxench Kabris ani Karmis, hea xarachea zanntteank apoun haddle.
11. Te ietôch, tinnem mhollem:`Bethuliechê porjechea fuddariamnô, mhojem aikat. Aiz tumi porjê lagim uloileat, tem sarkem nhoi. Omkeach disam bhitôr, Sorvespor tumchea adarak iena zalear, nogor dusmanachê adhin korunk soput gheun, tumi Sorvespora add geleat.
12. Sorvespo-rachi porikxa korunk ani sogllea loka modle tumkam Tachê voir ghalunk, tumi konn?
13. Tumi Sorvpodvedar Devachi porikxa kortat! Tumi kaich somzonant ani kednach somzochenant.
14. Tum-chean mon'xachea kallzacho thav gheunk zaina, nhoi mhonn tachea monant kitem cholta tem sangunk zaina. Oxem zalear, heô soglleô vostu rochto-lea Devachem mon tumchean koxem somzunk zait vô Tachim chintnam koxim parkunk zait? Na bhavamnô, Sorves-pora amchea Devacho rag choddo-so korinakat.
15. Hea panch disam bhitôr, amkam adar diunk Tachi khuxi nhoi zalearui, amchea dusmanam mukhar amcho bhosm korunk Taka podvi asa, toxench Apnnak khuxi title dis amchi rakhonn korunk-ui Taka podvi asa.
16. Punn Sorvesporacheô ievzonnô nirfoll korunk vavrum naka. Kiteak Devak dhopkaunk to êk monis nhoi, vô taka bhulounk to êk monis-pranni nhoi.
17. Portench zalear, Tachê suttkechi vatt polletana, amkam adar di mhonn magum-ia. Taka khuxi zalear, To amchea uleak zap ditolo.
18. `Ani khorem mhollear atanchea kallar ani aiz porian adim bhoztale toxem, hatamnim kel'lea devank nomoskar kortolem amchem ek kull vô ghorannem vô ganv vô nogor porian na,
19. haka lagun amchea purvozank tolvari svadhin korun luttum-xe kele ani dusmanachea hatantlean tanchem nisonttonn zalem.
20. Punn amkam zalear Tachê bogor dusro Dev na; haka lagun To amkam hinnsaucho na, nhoi mhonn amchea raxttrak poro ghalcho na mhonn amkam bhorvanso asa.
21. `Punn tumi ravtat tê bhaxen tannim amkam aplea tabeant kelear, tedna sog-llem Judeia-i tanchea tabeant poddto-lem, ani amcheô povitr svatô lutt'tole ani hê tanchê boxttavnnek lagon, ami rogtan zobab diuncho poddtolo.
22. am-chea bhavam-bhoinninchem nisonn-tonn, amchea ganvchem gulam'ponn, amchea daizachi bhigoddnni, hem sogllem amkam gulam' kortolea porzam modem amcheach mathear poddtolem, ani amche nove Dhoni amkam zulum' koxe vagoitole ani amcho okman kortole,
23. amkanch tanchê adhin korun amkam tanchem boreponn mellchem na. Portench zalear, Sorvespor amcho Dev, hi êk lojechi vost kortolo.
24. Mhonn-ttôch bhavamnô, ami amchea bhavank dêkh zaum-ia kiteak tanchem jivit amcher dhorlolem asa, ani povitr-sthan, mondir ani vedi - aminch samballunk zai.
25. `Ani oxem astana-i, porikxa kortolea Sorvespora amchea Devak, argam dium-ia.
26. To Abrahama thaim koso vaglo, Tannem Izakachi koxi porikxa keli ani aplea avoichea bhava Labanachim menddram rakhtana, Siriechea Mesopo-tamiant, Jakobak kitem ghoddlem tacho ugddas korat.
27. Punn he atte-vitte Ta-nnem tanchim kallzam topasunk dhaddle, mhonnttôch atam-i Dev amchi sudd ghena punn apunn môg kortoleank xiddkavnni dita.
28. Uzzian zobab dilo, `Jem kitem tunvem atanch mhollai tem promannik kallzantlem ieta, ani konnachean ek utor sarkem nhoi mhonnunk zaunchem na.
29. Aiz poilêch pavtt tuji zannvai dixtti poddlea oxem nhoi; tujea bhurge-ponnar thaun tum kitli chotur ti ani tujem kalliz kitlem nitoll tem, sogllo lôk zanno.
30. Punn tanek lagun, lokan jem kitem korunk amkam agro kelo tem ami bhasailem ani tannim amkam moddum nozo toslo soput gheunk lailo.
31. Tum êk devbhirantichi ostori, paus dhaddun amcheô udkacheô baiô bhôr mhonn, Sorvespora kodde mag, hê toren amchi tan nopoit zatoli.
32. Juditan zobab dilo, `Mhojem aikun gheiat, hanv jem kitem korunk vetam, tacho ugddas, amchê sonsti modem pillgechê pillgek urtolo.
33. Aiz rati tumi nograchea darvonttea-xim asunk zai. Hanv mhojê sevikek gheun bhair sortolim. Tumi nogor dusmanachea tabeant diunk tharailolea vella adim, Sorvespor mhojê vorvim Israelak soddoitolo.
34. Hanv kitem korunk vetam, tea vixim tumi vichar korcho nhoi, hanvem tem kori porian, hanv tumkam sangchina.'
35. Uzzian ani mukhel odhikarian mhollem, `Xantin voch. Amchea dusmanachi sudd gheunk, Sorvespor tumkam vatt dakhoum.'
36. Ani unchlo kudd sôddun, te aplê svater gele.
