1. Dusrea disa, tombuntle bhair sorun Bethulia add vochunk, toxench dongri vattarantle khindd, aplea tabeant korunk ani Israelitancher zhuz man-ddunk, Holofernesan ak'khê aplê foujek ani apnnak sangat ditoleam ixtt raxttranchê foujek hukum' dilo.
2. Fouzô teach disa tombuntleô bhair sorleô. Tanchi fouz mhollear êk lakh sot'tôr hozar paim-dôllache soinik, bara hozar ghoddedôll, tea bhair zaitem saman ani tem hatallpi paim dollache soinik - oxi êk vorixtt fouz asli.
3. Te Bethuliachea xezariak zhori-xim aslolea falkeant rigle ani rundaien Dothan tem Balbaim porian ximpoddle ani lambaien Bethulia tem Esdraelonak fuddo korun aslolea Saiamona porian pavle.
4. Jedna Israeli-tamnim iedi vhôdd urponz polleli, te thortole ani ekamekak mhonnunk lagle, `Atam te sogllo dês girasun uddoitole. Soglleam von unchle dongor, falkim ani dongurleô tankam attapunk xokcheô-nant.'
5. Dôr-eka mon'xan aplim hatiaram ghetlim, gopurancher dive pettoile ani ak'khi rat-bhôr pahro kelo.
6. Dusrea disa, Holofernesan aplo ak'kho ghoddedôll Bethuliant, Israelachê nodrê mukhar bhair kaddlo.
7. Tanchea nogrant vetoleô vattô, toxench udkacheô zhori, tannem sôdun kaddleô, teô tannem aplea tabeant keleô, thoim rakhonddar dovorle ani foujê-xim porot aile.
8. Edo-mitanche ani Moabitanche mukheli, toxench kin'narê vattarantle mukheli, tachê-xim aile ani tannim mhollem,
9. `Amchea Dhonian amchem aikolem zalear, tachê foujentlo eklo porian ghaiall zauncho na.'
10. Hea Israelitan-chem boll tanchea bhaleancher dhor-lolem na punn te ravtat tea dongran-chea unchaiecher dhorlolem asa. Ani khorem mhollear, tea dongranchea mathear choddunk, titlem sompem nhoi.
11. `Oxem aslolean Dhonia, khôr zhuz manddchi goroz na ani tujê foujentlo êk porian monis ibadd zauncho na.
12. Tum tombu bandil'lea mollar rav, tujê sogllê foujek thoim dovor. Ani tuje sevok dongra tolla bhair sortoli zhôr aplea tabeant kortole.
13. Hi zhôr Bethuliant ravpi lokak udkachi purvonn korta. Tanek lagun te aplo nogor sôddun ditole. Itlem mhonnosor ami ani amche monis lagxilea dongrachê tenkxer vetole ani nograntlo konn bhair sorona zaunk, thoim ami pennem kortoleanv.
14. Tan-cheô bailô ani bhurgim bhuken jiv sôddtolim ani tankam tolvar lagchê adinch, tim aplea ghora bhair rostear poddlolim astolim.
15. Ani tujer kolpolim ani xanti korunk toiar na zalim dekhun, tannim farikponn diunchem poddtolem.
16. Tanchim utram aikun, Holofernes ani tache soglle odhikari khuxal zale ani tannim sanglam toxem korunk, to toiar zalo.
17. Mhonnttôch, Assirieche anik panch hozar mon'xank gheun, Moabi-tanchi fouz bhair sorli. Tannim falkeant pennem kelem ani Israelitanchea udka purvonnacher ani zhôrincher tabo dovorlo.
18. Itlea mhonnosor, Edomit ani Ammonit gele ani Dothana mukhar unchlea mollancher aple zage ghetle, tannim aplea thoddea mon'xank dokhi-nnê toxench udentê vatten aslolea Egrebelant patthoile. Ho ganv Kousa lagsar Mokmur Wadint asa. Urlolê Assiriechê foujen mollar aplem pennem kelem, soglli svat lokamnim bhorloli, tanche tombu ani tanchem samon hixôp korunk zaina titlem aslem, itli vhôdd tanchi urponz!
19. Israelitamnim Sorvesporak, Aplea Devak ulo marlo, tanchem boll virun gel'lem kiteak dusmanamnim tankam veddho ghal'lo ani tanchean pollun vochunk zainaslem.
20. Chovtis dis porian, Assiriechê foujen, soinik dollamnim, ron'gaddeamnim, ghodde dollamnim tankam veddho ghal'lo. Bethuliachea mon'xam lagim aslolem dôr-êk udkachem aidon khali zal'lem,
21. tancheô udkacheô tanki sukot vetaleô; kiteak udok vanttun dil'lean, khoincheach disa mon'xan pott bhor pieunk zainaslem.
22. Tanchea bhurgeank gunvoll ietali, bailô ani tornnatte tanek lagun, nogranchea rosteacher ani darvonnttea-xim bhuim poddtale; tanchê sovem anink boll naslem.
23. Tedna sogllo lôk, tornnatteam, bhur-geam-bailam soit êk urponz koxi Uzzia-xim ani xarachea odhikariam-xim geli, zannteam mukhar tannim vhoddlean mho-llem,
24. `Dev tumchê ani amchê modem nit korum! Assiriekaram thaim xanti korun, tumi amchê thaim vhôdd onit adarli,
25. ani atam amkam konna-choch adar na. Portench zalear, Sorves-poran amkam tanchê adhin korun, tanên ani niradaran, tanchê mukhar poddom-xim keleant.
26. Mhonnttôch tankam begobeg apoun haddat; ani lutticho mhal koso ak'kho nogor Holofernesa-chea mon'xanchê ani tachê foujechê adhin korat.
27. Kitem-i zaum, ami atam asanv tê poristhiti poros tancho lutti-cho mhal zalear odhik borem; ami cha-kor zatoleanv tem khorem, punn ami jivim urtoleanv ani amchea supurlea ballkancho, toxench bail-bhurgeancho nas zal'lo polleunk panvchim nanv.
28. Sorgachean, sonvsarachean ani amchea toxench amchea purvozanchea patkank lagon, amkam khast laitolea, Sorvespora, amchea purvozanchea De-vachea nanvan, jem kitem ami mhollam, tem Tunvem aizuch korchem mhonn ami vinonti kortanv.'
29. Soglli sobha fugar zaun vilapli ani Sorvespora, aplea Devak vhoddlean ulo marlo.
30. Uprant Uzzia tanchê lagim uloilo, `Bhavamnô, dhir gheiat! Anink panch dis ami ravum-ia. Titlem mhonnosor Sorvespor amchi doia kortolo, kiteak To amkam sarkoch sôddun diunchona.
31. Ani amkam kosloch adar mello-nastana, he dis somple zalear, tumi sangtat toxem hanv kortolom.'
32. Oxem mhonnon, tannem lokak ap-aplea zagear porot dhaddlo. Dadle nograchim durgam ani gopur rakhunk gele ani bailank ani bhurgeank ghora dhaddlim. Sogllo nogôr odruxttak sampoddlo.
