1. Tedna Holofernesan mhollem, `Ostoriê, dhir ghe, bhienaka. Sogllea sonvsarachea raza Nebukad-nezzarachi chakri kortolea konnakuch hanvem dukhounk na.
2. Atam porian, dongrancher ravtolê tujê porjen mhozo okman korunk naslo zalear, hanv tancher add mhozo balo ubarcho naslom. Hem tannim apnnacher magun ghetlam.
3. Punn mhaka sang, tum tanchê sorxili pollun, amchê-xim kiteak ailea?... Tem kitem-i zaum, tum vanch-toli. Dhir ghe! Aichê rati ani fuddarak porian tum jivi urtoli.
4. Tuka konn dukouncho na. Portench zalear, mhojea Dhonia Nebukadnezzar razachi seva kortolea heram bhaxen tuka vagnnunk melltoli.
5. Juditan mhollem, `Tuji chakorn kitem korunk sôdta tem upkar korun aik. Tujê hujir, tujê chakornnik ulounk di, aichê rati mhojea Dhoniak hanv fôtt marchina.
6. Tujê chakornichea utrank pallo dilo zalear, Dev tuzo vavr sufôll kortolo ani mhojea Dhoniachea sogllea ievzo-nneank ies melltolem.
7. Sogllea prithvechea razak, Nebukadnezzarak lamb auk mellum, dôr ekê jivê rochnnek nittaier ghalunk tannem tuka dhaddla; tachi podvi sodankal urum! Tuka lagun nhoich monis tachi seva kortat punn tujê podvê khal savzam, gorvam, vareavelim suknnim Nebukadnezzar ani tachea ak'khea ghorannea khatir jietat.
8. `Tujê zannvaiechi ani huxarkaiechi khobor ami aikolea. Ak'khê razvôttkent tujê zannvaiek, onnbhovak ani zhuz manddpachê huxarkaiek lagtolo dusro konn na mhonn, sogllea sonvsarak khobor asa.
9. Tumchê sobhê mukhar, Akioran ulovop korun jem kitem sanglam, tem ami aikolam. Bethuliachea mon'xamnim tacho jiv vanchoitôch, tumkam mhollam tem sogllem, tannem tankam kollit kelam.
10. Atam Dhonia, tannem mhollam tacher visôr ghalinaka; punn tem khorem dekhun, tujea monant samball. Amchem raxttr khastik sam-poddchem na, aplea Deva add patok kelea xivai, tolvarik tanchê add podvi aschi na.
11. Atam mhozo Dhoni harov-cho na, nhoi mhonn tachi ievzonn nirfôll zaunchi na kiteak tancher moronn ieunchem asa, patkan tankam aplea tabeant keleant ani vaitt kortat titlei pavtt, tim Devacho rag choddoit asat.
12. Tanchem jevonn kobar zalolean ani udok sompot ailolean, tannim gorvank marunk ievjilam ani Devan, aplea kaideam vorvim addvarlam tacho vapor korunk, tannim nirnnoi ghetla.
13. Povitr kel'lim ani Jerusaleant tanchea Devachi seva kortoleam iadnikam khatir kuxin kaddun dovorlolim, orovachim prothom' follam khaunk ani soreacho ani telacho dhavo vantto vapddunk tanchem mon zalem. Khorem mhollear, hea vostunk konnachean hat porian lavunk zaina.
14. Sobhechea zannteanchi porvangi magun, tannim Jerusaleant monis patthoileat. Thoinsor vosti korpi toxench kortat.
15. Jedna tankam porvangi mellta ani tea pormannem tim kortat, teach disa tancho nas zaunchê pasot tankam tumchê adhin kortolo.
16. `Jedna mhaka tujê chakornik hem gomlem, hanv tanchê sorxilim pollun gelim. Devan mhaka tumchê thaim oslim kortutvam korunk dhaddlea ki tanchê vixim aikotôch ak'kho sonvsar ojap zatolo.
17. Tuji chakorn Dev-bhirantichi ostori. Dis ani rat ti sorginchea Devachi chakri korta. Mhonnttôch, atam mhojea Dhonia, hanv tujê borabor ravtam. Tannim kedna patok kelam tem mhaka kolloi mhonn Deva lagim magunk, dôr rati hanv falkeant vetolim.
18. Tedna ak'khê foujek gheun tunvem bhair sorchê khatir, hanv ieun tuka kolloito-lim, ani konnachean tuka addaunk zauncho na.
19. Tum Jerusaleak pavo porian, hanv tuka Judeiantlean vatt dakhoitolim. Thoim hanv tuka asonn toiar kortolim. Magir tum tankam gonvlli naslolea xelliam porim dhanvddaitolo ani eka sunneak porian tujer add ieunk dhaddos zaunchem na. Hem sogllem mhaka adim-fuddench kollun ailam ani tuka tem uktem korunk mhaka dhaddlea.
20. Holofernesak ani tachea sevokank ti uloili tem man'lem. Tichê zannvaiê vixim ojap zaun, tannim mhollem,
21. `Prithu-mechê ekê ximê thaun dusrê ximê porian, tichê sarki sobit ani zannar anik dusri ostori na!'
22. Holofernesan tika mhollem, `Amche hat mozbut korunk ani mhojea Dhoniak kikont kel'leancho bhosm korunk, dusream adim tuka dhaddun, Devan borem kelem.
23. Tum rupan sobit ani tujim utram zannvaie-chim. Tunvem bhasailam toxem tum korxi zalear, tuzo Dev mhozo Dev zatolo, tum Nebukadnezzar razachea mhalant biradd kortoli ani ak'khea sonvsarant tuji kirti gaztoli.
