1. Ninevehchea vhoddlea xarant, Assiriekaram voir, Nebukadnezzar razvôttki choloitalo, tea baravea vorsa, Arfaxad , Ekbatanant, Persiekaram voir razvôttki choloitalo.
2. Tannem tin hat dhattaieche ani sov hat lambaieche kantoilole fator gheun, xara sorbhonv-tim durgam bandlim. Durgachi unchai sot'tôr hat, rundai pon'nas hat asli.
3. Darvontteam-xim tannem xembor hat unchaieche gopur bandle, tanchem mull satt hat rund aslem.
4. Aplea ron'ga-ddeank ani foujek sompeponnim bhair-bhitôr sorunk mellchê khatir, tannem darvonnteanchi unchai sot'tôr hat ani rundai challis hat keli.
5. Tedna Ragae prantant aslolea vhodda mollar Nebukadnezzar razan, Arfaxad razacher zhuz kelem.
6. Taka tenko diunk dongri mulkantlo sogllo lôk; Eufrates ani Tigris ani Hidaspes, hea nhoian-chea dodder ravpi lôk ani Elimaeancho raza, Ariok hachê khal aslolo mollar ravpi lôk, ailo. Keleouditanchea zhuzant vantto gheunk zaitim raxttram ektthaim zal'lim.
7. Assiriechea razan, Nebukadnezzaran Persient vosti kortoleank, ostomtek ravtoleank, Silisia, Damaskus, Lebanon, Anti-Lebanon ani doria deger ravto-leank,
8. Karmel, Gilead, Unchlem Galileia, Esdraelonachem vhoddlem moll, hanga ravtolea sogllea lokank,
9. Samarient ani tichea nogramnim ravtolea lokank, Jordana poltoddi, Jerusalem, Betania, Khelous, Kadesh, Ejiptachi nhoi, Tahpanhes, Rameses ani Goshencho sogllo vatthar porian,
10. to-xench Tanisa ani Memfisa fuddeant ani Ejiptant vosti kortoleank, Ethiopiechê ximê porian, sondêxkar dhaddle.
11. Punn hea desamnim ravtolea lokan, Assiriechea raza, Nebukadnezzarachea uleachi beporva keli ani zhuzant taka sohokar dilo na. Tim taka bhienaslim kiteak tanchê pormannem, to eklo-eksuro aslo. Mhonnttôch tannim tachea son-dexkarank, koslench ies mellonastana ani lojen porot dhaddle.
12. Hea sogllea desancher, Nebukadnezzar ragabhorit zalo. Silisiachea, Damaskachea ani Siriechea, Moabitanchea ani Amonitan-chea, Judeiachea prantamnim jieto-leancho, toxench don dorianchê ximê porian Ejiptant jietoleancho sudd gheunk, ani tankam soglleank tolvarin marun uddounk, tannem aplea xinvaso-nachean ani rajeachean soput ghetlo. Arfaxada add mohim'
13. Tachê razvôttechea sotravea vorsa, aplê sogllê foujek gheun, tannem Arfaxad raza add zhuz kelem ani taka haroilo. Arfaxadachê sogllê foujecho, tachea ghoddeancho ani ron'gaddean-cho tannem sotianas kelo,
14. tannem tachim xaram aplea tabeant ghetlim, uprant to Ekbatanant ailo, tannem hea xarache gopur aplea tabeant kele ani tache veaparache zage luttle ani tachea adlea manacho beman kelo.
15. Uprant tannem Ragae dongrancher, Arfaxadak dhôrlo ani aplea baleamnim taka sasnnak marun uddoilo.
16. Uprant to ani tachi ak'khi fouz ani tachê borabor asle te soglle Ninevehk portole. Thoim tannem ani tachea fouzamnim visôv ghetlo ani ekxem vis dis mouz keli.
