1.Hê porim Juditan Israelachea Devak ulo marlo. Tichem magnnem somptôch,
2. ti zomniveli utthli, aplê sevikek apoili ani Son'vara disa ani utsovam somoiar ravtali tea kuddant geli.
3. Aplea angak pangurlolo gonn kaddlo, ani vidveponnachim angvost-ram kaddun, ti nhali, aplea angar bhôrpur pormôll ghalo, aple kens ugoile, mukutt ghalo ani aplo ghov Manasse jivo astana ghaltali toslim sonni-suta-chim angvostram ghalim.
4. Aplea paiank vhannô ghaleô, golleak mall ghale, kank-nnam, mudiô, kanantlim ani soglle daginne aplea angar choddoile, ani apnnak polletolea khoincheach mon'xak bhulovpa, itli sobit ti zali.
5. Tinnem aplê sevikê kodde soreachi bhuli ani telachem aidon dilem. Bazlolea zovachi êk polli, sukoilolea follancheô bhakriô ani ut'tom pittachi bhakri - hem sogllem guntllaun tichê kodde dilem.
6. Uprant tim bhair sorlim ani Bethulia xarachea darvonttea-xim gelim. Thoim tankam Uzzia mell'llo. To Kabris ani Kharmis - hea xarachea dog zannteam borabor also.
7. Ticho bodol'lolo bhês ani nhesonn polleun, tichê suropaien te dipkovle. Tannim tika mhollem:
8. Amchea purvozanchea Deva thaim tuka kurpa mellum!Israelachea bhurgeanchê mhoimê khatir,Ani Jerusaleachê vortê mhoimê pasot, To tujea ievzonnank ies dium!
9. Juditan Devak nomoskar kelo ani tinnem tankam mhollem, `Tumi mhaka anvddelam tem xarthi pavounk, hanv vechê khatir, mhojê pasot xaracho darvontto ukto korat.' Tinnem maglo-lem toxem tannim kelem ani tichê khatir darvontto ukto korunk, sevokank hukum' dilo.
10. Tinnem toxem kortôch, Judit aplê sevikê borabor bhair sorli, ti dongravelean denvtana ani falkeantlean vetana, nodrê bhair poddo-sor, nograntle monis tika pollet ravle.
11. Bailô falkeantlean cholun vetana, Assiriechea foujechea pahro korpeam-nim tankam addailim,
12. ani Juditak dhôrun, tichê lagim vichar korunk lagle, `Tum khoinchea lokantli? Tum khoim thaun ietai? Tum khoim vetai?' Tinnem zobab dilo, `Hanv Hebrevanchi dhuv ani hanv tanchê sorxilim pollun aileam kiteak te thoddeach vellan tumchi xikar zaunche asat.
13. Gorjechi mahiti diunk, tumchê foujechea mukheliak, Holo-fernesak, hanv mellunk vetam. Aplea êk punn mon'xacho vô jivacho ibadd korinastana, ak'kho dongri vattar jikhun gheunk, khoinchi vatt dhôrchi ti, hanv taka dakhoitolim.'
14. Tika aikotale tedna, tannim tichem mukhamoll pollelem, tanchê nodrek ti ekdom' sobit distali.
15. Tannim tika mhollem, `Vêll ibaddinastana tujêch ostongim amchea Dhoniak mellunk ieun, tunvem tuzo jiv vattoiloi. Chol atam tachê tombunt voch, tanchê modle thodde tuka sangat ditole ani tachê-xim pavoitole.
16. Tachê mu-khar bhieum-naka punn atanch amkam sanglam tem sogllem taka sang ani to tuka borê bhaxen ghetolo.'
17. Uprant tika ani tichê sevikek sangat diunk tannim xembor mon'xank dhaddle ani hannim tankam Holofernesachea tombu-xim vhelim.
18. Tichea ienneanchi khobor tombum-nim posorli ani tombuchea mollar ghodd-bodd zalo. Holofernesak tichi khobor di porian, ti tombu bhair ubi asli tedna êk vhôdd zomo tichê bhonvtim ektthaim zaunk laglo.
19. Te tichi sobitai polleun thottakle ani tika lagun, Israelitam vixim ojap zale. Te eka-mekak mhonnttale, `Osleô bailô aslolê porjek konnachean kikont korunk zait? Tanchê modlea ekleak porian mon'xak jivo do-vorcho nhoi, konnui jivo urlear, ak'kho sonvsar te aplea chopkean dovrit!
20. Uprant Holofernesache rakhonddar ani sevôk bhair aile ani tannim Juditak tombunt vheli.
21. Holofernes aplê khattir add poddun aslo. Khatti voir zambllea lugttacho, bhangaran nettoilolo mattôv aslo, mannkamnim ani motiamnim to xrungailolo aslo.
22. Ti ailea mhonn taka gomtôch, to tombuchea dara-xim ailo ani tachê mukhar rupeacheô divtiô gheun asle.
23. Judit Holofernes ani tachea sevoka mukhar aili tedna, tichi sobitai polleun, te thottakle. Ti saxttangim poddli ani taka nomoskar kelo, punn tachea sevokamnim tika zomniveli voir kaddli.
