1. Holofernesachea Tombunt Zhuza vixim zomat zata Israelit zhuzak toiar zatat, tannim dongrancheô vattô bond keleat, tannim dongrancheô tenkxeô mozbut keleat ani mollancher addkholli ghaleat mhonn, Assirien foujechea sorv mukheliak, Holofernasak khobor pavli.
2. Holofernes ragabhorit zalo. Tannem Moabit kunvrank, Ammonit rajpalank, ani doria degechea sogllea up-rajpalank apoun haddle.
3. Tannem mhollem, `Ka-naanchea mon'xamnô, dongri-vattarant ravpi ho lôk konn? Tim khoinchea xaramnim ravtat? Kedi vhoddli tanchi fouz? Tanchi podvi ani boll khoim thaun ieta? Tanchê voir razvôtt choloita ani foujek fuddakar dita, to raza konn?
4. Ostomtechea lokam bhaxen, tim mhaka kiteak mellunk ieunk nant?
5. Sogllea Amonitanchea fuddarian, Akioran zobab dilo, `Tuzo sevôk jem kitem sangunk veta, tem Mhojea Dhonian upkar korun aikunchem. Tujê lagsar Dongri vattaran ravpi, hea lokanchi khobor hanv tuka ditam. Tujea sevokachea tonddantlean fott mhollear kodinch bhair sorchi na.
6. Ho lôk Kaldeikaranchi sonsôt zaun asa.
7. Tim eka kallar Mesopotamiant ravunk ailim kiteak Kaldeiant aslolea aplea purvozanchea devanchi puza tim korunk sôdinaslim.
8. Apnnem manun ghetlolea, Sorvespora sorginchea Devak nomoskar korunk, tannim aplea purvozanchi vatt sôddun dili. Tanchea khaxea devam koddlim tankam dhanvddaitôch, tim Mesopotamiant pôllun gelim ani thoim tim zaito kall porian ravlim.
9. Jedna Devan tankam tim ravtalim to ganv sôddunk ani Kanaanchi vatt dhôrunk sanglem, thoim tannim pennem kelem ani bhangar, rupem ani gorvanche vhodd hindd punzaile.
10. Uprant jedna Kanaanchea ganvant dukôll poddlo, tedna tim Ejiptak gelim ani jevonn-khann mellosor thoim tim ravlim. Thoim tim mezum nozo titli vhôdd urponz zalim.
11. Punn Ejiptacho raza tancher portolo ani tancho faido kaddlo ani tannem tankam itte korpachea zodd vavrak laile, tankam gulam' korun, tancho man denvoilo.
12. Tannim aplea Devak ulo marlo, Tannem Ejiptachea ak'khea desacher nivollchina tosli pidda dhaddli ani Ejiptkaramnim tankam dhanvddaile.
13. Sorvesporan tanchê mukhar tambddo doria suko-so kelo
14. ani Sinai dongra ani Kadesh-Barnea vatten tankam vhelim. Oronneant ravpi soglleank dhanvddailea uprant,
15. ta-nnim Amoritanchea desant pennem kelem ani aplem boll vapddun Hesh-bonachea sogllea lokacho sotianas kelo. Magir Jordan nôd par kelea uprant, tannim sogllea dongri-vattharacho tabo ghetlo,
16. ani aplê nodrê mukhar aslolea Kanaanitank, Perizzitank, Jebusitank, Shekemitank ani Girgashitank dhanv-ddaile ani zaitim vorsam porian thoim pennem kelem.
17. Jê meren tannim aplea Deva add patok korunk na, tê meren tim zoitivont zalim, kiteak vaittacho dvês korta toslo Dev tanchea sangata asa.
18. Punn tannem dakhoil'li vatt tannim sôddtoch, tanchê modlim thoddim ekar-êk zhuzak lagon, tanchê modlea thoddeancho sotianas zalo, dusreank nirvaxit korun, porkea ganvant vhelim. Tanchea devachem mondir môddun uddoilem ani tanchim xaram, tanchea dusmanamnim aplea tabeant kelim.
19. Pun atam tim Deva-xim portun aileant, tankam ximpddailolê tê svatê velim tim portun ailim, tanchem Devmondir aslem tea Jerusaleacho tabo ghetlo ani konn ravonaslolea dongri va-ttarant, tannim thikann kelem.
20. Mhonn-ttôch, atam mhojea Dhonia, hea lokan Aplea Deva add patok kelam mhonn khatren kolltôch ani tancho guneanv koslo tem amkam sidh zatôch, amchean vochun tancher akromonn korum-ieta.
21. Punn tanchem raxttr guneanvam mekllem zalear, tanchê add vechem nhoi kiteak Sorvespor tancho Dev tanchi rakhonn kortolo ani sogllea raxttram mukhar ami kenddnniancho mhal zatolim.
22. Akioran hem sogllem uloun sompoitôch, tombu bhonvtim ubo aslolea sogllea lokan tacher add nixedh marlo. Holofernesachea unchlea odhikariamnim, toxench doria kin'narer ravtolea lokamnim ani Moabitannim hem aikolea uprant, tache kuddkean-kuddke korche mhonn agro dhôrlo.
23. `Israelitank ami kiteak bhienvchem? Tim osokt ani podvi naslolim, khôr loddaiek tanchean fuddo korunk zaunchona.
24. Mhonnttôch ami vochun tancher akromonn korum-ia. Tuji vorixtt fouz, Dhonia Holofernesa tankam ekach ghansak gilltoli!
