1. Ostomtênt mohim' Nebukadnezzarachê razvôttke- chea otthravea vorsa , poilea mhoi-neachea bavisavea disa, Assiriecho raza Nebukadnezzar apnnem dhomki dilea tea pormannem sogllea desanchi sudd gheta mhonn rajmahalant khobor posorli.
2. Aplea sogllea montriank ani unchlea odhikariank apoun haddun, êk gupit boska ghetli ani hea sogllea vattaracho sotianas korunk apleach vonttamnim fôddun sanglem.
3. Razacho hukum' aikunk na tea soglleank jivexim marunk tannem ievjilem.
4. Boska somptôch, Assiriechea raza Nebukadnezzaran Holofernesak apoun haddlo. Ho tachê foujecho mukhel odhikari aslo ani razak bhairaun anik konnak tacher odhikar naslo. Ani razan taka mhollem,
5. `Sogllea sonvsaracho Dhoni, Vorto Raza oxem sangta, "Voch ani tujea sangata bollvont mon'xank, ekxem vis hozar soinikank ani gho-ddeam soit bara hozar ghoddesvarank ghe ani
6. ostomtechea ganvancher hol'lo kôr, kiteak tannim mhojea adniank pallo diunk na.
7. Zomin ani udok toiar korunk lai kiteak mhojea ragan hanv tancher loddai manddunk toiar zalam, mhojea soinikank hanv ak'kea desant ximpddaitolom ani lutt marchê khatir, to tanchê adhin kortolom.
8. Falkim ani zhori, tanchea ghaiall zal'leamnim bhortoleô ani mel'lea moddeank lagon, nhoio bhoron ot'toleô.
9. Tankam nirvaxit korun, prithumechea ximam porian hanv vhortolom.
10. Atam voch! Ho sogllo vattar mhojê pasot jikhun, gheun, suru kôr. Te tujê adhin zait zalear, tankam khast launchê khatir hanv ie porian, tujea tabeant dovor.
11. Punn te tujer add iet, konnachich doia korum naka, punn tankam marun uddoi ani tujê adhin kel'lo dôr-êk prant lutt.
12. Kiteak mhojea jivachean ani mhojea rajeachea bollan sangtam: Jem kitem hanv uloilam, tem mhojêch podven xarthi pavoitolom.
13. Ani tum, tujea Dhoniachi êk porian adnia môddinaka, punn vêll ibaddinas-tana, hanvem tuka formailam toxem xarthi pavoi."
14. Razachea dolleam mukhavelo kodd-sorlea uprant, Holofernesan rokddech Assirieche foujechea sogllea senapo-tink, fouzadhipoti ani odhikariank ektthaim kele,
15. Aplea Dhonian apnnak formailolem toxem tannem ekxem vis hozar soinikank ani anink bara hozar dhanuxia zomea-zomeamnim mezle.
16. Hankam soglleank tannem zhuzak vetolê, êkê foujê bhaxen manddle.
17. Uprant saman vhorunk tannem zaitim unttam, gaddvam ani kochram viktim ghetlim ani jevnna khatir, zaiteô xelliô, boil ani bokddiô haddleô.
18. Zonn ekleak jevnnachem sogllem purvonn mell'llem, toxench raz-mahalantlem zaitem bhangar ani rupem.
19. Aplea ron'gaddeam, ghoddesvaram ani soinikam sangata, ak'khê ostomte-chea vattharacho tabo gheunk, Nebu-kadnezzar raza adim, aplê ak'khê foujek gheun, to mohimek bhair sorlo.
20. To-llam itli vô zomnichê dhul'lê itli, mezunk zaina titli êk vhôdd urponz tachê fattlean geli. Holofernesachea Akromonnache Panvdde
21. Ninevehk thaun te bhair sorle ani Bektilet molla vatten, tin dis porian chol'le. Bektilet thaun vochun, unchlê Silisiechê ut'torê vatten aslolea dongram lagsar, tannim pennem kelem.
22. Thoim thaun Holofernes apli ak'khi fouz, paim-dôll, ghoddesvar ani ron'-gadde gheun dongri vattaramnim gelo.
23. Put ani Lud, hea ganvcho tannem nas kelo ani Keleonachê dokhinnê vatten oronneachê ximer ravtolea Rassisachea ani Ishmaelachea putank tannem nirvaxit korun vhele,
24. Tea uprant, tannem Eufrates nôd par keli ani to Mesopotamient pavlo ani doria-xim pavo porian, Abron vhallachê degek aslolea sogllea mozbut xarancho tannem nas kelo.
25. Magir tannem Silisiechea prantancher akromonn kelem, apnnak virodh kortoleank jivexim marle ani Arabiak fuddo korun aslolea Jafetachea ximam porian pavlo,
26. tannem Midianitank veddho ghalo, tanche tombu lhasun uddoile ani xellianche hindd chorun vhele,
27. ani gonvanchê pikê somoiar, to Damaska-chea mollar pavlo, xetank uzo lailo, hinddancho bhosm kelo, tannem xaram luttun tanche ganv padd kele ani sogllea tornnateank tolvarin jivexim marle.
28. Sidon ani Tir, Sur, Osina ani Jamnia hea doria deger aslolea ganvamnim ravtolea lokancher bhirant ani kampero suttlo. Toxench Azotos ani Askalon ravpi lôk bhirantin koddkoddlo.
