1. Vetam-vetam Jezun eka zolmachea kudd'ddeak dekhlo.
2. Ani Tachea xisamnim Tachê kodde vicharlem: "Guruji, konnachea patkak lagun ho monis kudd'ddo zolmolo? tachea vô tachea avoi-bapaichea patkak lagun?"
3. Jezun zobab dilo: "Hea mon'xan vô tachea avoi-bapain patok kelem mhonn nhoi, punn Devachim kortutvam tachê udexim porgôtt zaunchim mhonn to oso zolmolo.
4. Disacho uzvadd astana, Zannem Mhaka patthoila, Tachim kamam Hanvem korunk zai; rat ieta Tednam konnachean vavr korunk zaina.
5. Hanv sonvsarant aso-sôr, Hanv sonvsaracho Uzvadd."
6. Oxem uloun Tannem zomnir luti uddoili, lutien chiktti keli, ani ti chiktti kudd'ddeachea dolleank kaddli,
7. ani taka mhollem: "Voch ani Siloamachê tollient dhu (Siloam mhonngê 'Dhaddlolo'). Kudd'ddean vochun dhulem, ani taka nodor aili, magir to portun ailo.
8. Tachim xeza-samarim ani taka adim bhik magtana pollel'lo tim mhonnunk laglim: "Bhik magunk bostalo to ho nhoi?"
9. Konn-konn mhonnttalim: "Hoch to." Dusrim mhonnttalim : "Na; punn ho tachê bhaxen dista." Tannem mhollem: "Hanvuch to."
10. Tãnnim taka vicharlem: "Tuje dolle koxe ugòddle?"
11. Tannem zobab dilo: "Jezu nanvachea mon'xan chiktti keli ani mhojea dolleank kaddli ani mhaka mhollem: 'Siloam tollient vochun dhu.' Mhonnttôch hanv gelom, hanvem dhulem ani mhaka nodor aili."
12. Tãnnim taka mhollem: "To khõi asa?" Tannem zap dili: "Hanv nokllom."
13. Adim kudd'ddo asloleak tãnnim Farizevam-xim haddlo
14. Jezun chiktti korun tache dolle ugôddlole to dis Son'var aslo.
15. Taka nodor koxi aili kai mhonn Farizevamnim novean vicharlem. Ani tannem tankam mhollem: "Tannem chiktti mhojea dolleank kaddli, hanvem dhulem ani atam mhaka dixtti poddta."
16. Farizevantlea kãi zannamnim mhollem: "Ho monis Devacho khoro bhokt nhoi. To Son'var pallina." Punn dusreamnim mhollem: "Patki monis osleô khunna koxeô korunk xokot?" Tanchê modem veg vegllim motam zalim.
17. Dekhun adim kudd'ddo asloleak anink êk pavtt tãnnim mhollem: "Tuje dolle ugôddleat tachê vixim tum kitem mhonnttai?" Tannem sanglem: "To êk provadi."
18. To kudd'ddo aslolo ani magir taka nodor aili mhonn Judev sotmanina zale; dekhun Tednam nodor ail'leachea avoi-bapaik apoun haddun,
19. tãnnim tanchê kodde vicharlem: "Ho tumcho put? To kudd'ddo zolmol'lo mhonn tumi sangtat, to atam koso polleta tôr?"
20. Tachea avoi-bapain zap dili: "Ho amcho put ani to kudd'ddo zolmol'lo mhonn ami zannonv;
21. punn to atam koso polleta tem ami nokllonv, ani konnem tache dolle ugôddleat tem-i bi ami nokllonv. Tachê kodde vicharat; taka apli pirai asa; to aplem sangtolo."
22. Tacho avoi-bapui Judevank bhietalo dekhun tãnnim oxem sanglem; kiteak Jezu Krist mhonn konnem-i manun ghetlem zalear, taka devsthanantlo bhair ghalcho mhonn tãnnim tharail'lem.
23. Tea pasot tachea avoi-bapain mhollem: "Taka apli pirai asa, tachê kodde vicharat."
24. Tednam, adim kudd'ddo aslolea mon'xak tãnnim dusrê pavtti apoilo ani taka sanglem: "Devak mhoima di. To monis patki mhonn ami zannonv."
25. Tannem zobab dilo: "To patki zalear mhaka khobor na; ek mat hanv zannom: hanv adim kudd'ddo aslom, punn atam mhaka dixtti poddta."
26. Tãnnim taka novean vicharlem: "Tannem tuka kitem kelem? Tuje dolle tannem koxe ugôddle?"
27. Tannem tankam zap dili: "Hanvem tumkam atanch sanglam, ani tumi tem kanar ghenant. Anink êk pavtt kiteak aikunk sôdtat? Tumi-i tache xis bi zaunk sôdtat?"
28. Te taka oxe hinddsunk lagle: "Tum za tacho xis! Ami zalear Moizesache xis!
29. Dev Moizesa kodde uloilo mhonn ami zannonv, punn ho monis khõicho to ami nokllonv."
30. Tea mon'xan zobab diun mhollem: "Ojap tem hem! To khõicho to tumi nokllot, ani tori tannem mhoje dolle ugôddle.
31. Dev patkianchem aikona mhonn ami zannonv, punn konn Devachi bhokti kortat ani Tachi khuxi palltat zalear, Dev tanchem aikota.
32. Sonvsar ghôddloleak konnem kudd'ddo zolmol'leache dolle ugôddleat mhonn kodinch konnench aikunk na.
33. Ho monis Devacho khoro bhôkt nhoi aslo zalear, tachean kitench korunk zaunchem naslem."
34. Tãnnim taka portipall kelo: "Tum nibêl patkant zolmolai ani amkam xikounk ailai?" Ani tãnnim taka bhair ghalo.
35. Tãnnim taka bhair ghalo mhonn Jezuchea kanar poddlem, ani Taka to mell'llo Tednam Jezun taka vicharlem: "Tum Mon'xachea Putacher bhavarth dovortai?"
36. Tannem portun zap dili: "Saiba, hanvem Tacher bhavarth tthevunk, to konn to mhaka sang."
37. Jezun mhollem: "Tunvem Taka dekhlai ani tujê lagim uloita Toch to."
38. Tannem mhollem: "Saiba, hanv bhavarth dhôrtam." Ani pãiam poddun, tannem Jezuk nomoskar kelo.
39. Jezun mhollem: "Nit korunk Hanv hea sonvsarant ailam: zankam dixtti poddona tankam nodor mellchê khatir, ani zankam dixtti poddta tim kudd'ddim zaunchê khatir Hanv ailam."
40. Tachê sorxim aslolea thoddea Farizevamnim hem aikun Taka mhollem: "Ami-i kudd'dde bi?"
41. Jezun tankam mhollem: "Tumi kudd'dde zal'leat zalear, tumkam guneanv ascho naslo; punn atam 'amkam dixtti poddta', oxem tumi mhonnttat dekhun, tumi patkantuch asat.
