1. Paskachea Utsova adim, Jezu hea sonvsarantlo bhair sorun Bapa-xim vecho Aplo vêll pavlo mhonn zanno aslo. Sonvsarant asloleam Apleancho Tannem sodanch môg kel'lo, punn hea vellar Tannem sopurnnaien tancho môg korun dakhoilo.
2. Tanchem ratchem jevonn choltalem. Jezucho ghat gheuncho mhonn devcharan Simanvachea puta Judas Iskariotachea monant ghal'lem.
3. Bapan sogllem Aplea hatant dilam, Apunn Deva thaun aila ani Deva-xim veta mhonn zanno zaun,
4. Jezu jevnna velo utthlo, Tannem Aplem avoronn kaddlem ani êk rumal gheun to Aplea penkttak bandlo.
5. Uprant, eka tostant udok ôtun, To xisanche pãi dhuunk laglo, ani Apnnak bandlolo tea rumalak te pusunk laglo.
6. To Ximanv Pedru sorxem gelo; Pedrun Taka mhollem: "Somia, Tum mhoje pãi dhutai?!"
7. Jezun Taka portipall kelo: "Hanv kortam tem tuka atam somzona, punn magir somzotolem."
8. Pedrun Taka mhollem: "Mhoje pãi dhuunk hanv Tuka kodinch diuncho na!" Jezun taka portun mhollem: "Hanv tuka dhuina zalear, Mhojea vangdda tuka kãich aschem na."
9. Simanv Pedrun portipall kelo: "Toxem zalear, Somia, mhoje pãich nhoi, bogor mhoje hat ani mhoji tokli-i dhu."
10. Jezun taka mhollem: "Nhala tannem fokot pãi dhulear puro: to soglloch nitôll asa; tumi tôr nitoll asat, punn soglle nitoll nant."
11. Apnnacho ghat konn ghetolo aslotem To zanno aslo; tea pasot Tannem mhollem: "soglle tumi nitoll nant."
12. Tanche pãi dhuun zatôch, Aplim vostram ghalun, Jezu Aplê svater portun ailo. Tannem mhollem: "Hanvem tumkam kitem kelam tem tumi somzoleat mum?
13. Tumi Mhaka Guru ani Somi mhonnttat; ani tumi sarkem uloitat, kiteak Hanv khorench Guru ani Somi.
14. Mhonnttôch, tumcho Somi ani Guru zaun-ui, Hanvem tumche pãi dhule zalear, tumi-i ekamekache pãi dhuunk zai.
15. Hanvem tumkam dêkh dilea: Hanvem tumkam kelam toxench tumi-i korat.
16. Hanv tumkam sot sangtam: aplea dhonia-vôn gulam vhôdd nhoi; toxench patthoil'lo konn apnnak patthoila tachê-vôn vhôdd nhoi.
17. Hem zanno zaun, tumi toxench korxat zalear, tumi subhagi!
18. Hanv tumchi soglleanchi khobor korina; konnank Hanvem vinchun kaddleat te Hanv zannom; punn Povitr Pustokantlem hem utor pallon ieunk zai: Zo mhojê borabôr jevnnak boslolo asa, tannench Mhojer khôntt ubarli.
19. Hem ghoddon ietolem Tednam, Hanvuch to mhonn tumi bhavarth dhôrchê khatir, hem ghòddchê adinch Hanv tumkam sangun dovortam.
20. Hanv tumkam sot sangtam: Hanv dhaddtam tankam manun ghetat tim Mhaka manun ghetat, ani Mhaka manun ghetat tim Mhaka patthoila Taka manun ghetat."
21. Oxem uloun zatôch, Jezu soglloch thorthorlo ani ukteponnim Tannem mhollem: "Hanv tumkam sot sangtam: tumchê bhitorlo eklo Mhozo ghat ghetolo."
22. To konnachi khobor kortalo kai mhonn dubavun, xis ekamakak polleunk lagle.
23. Tachea xisam modlo eklo, Jezu môg kori to, Jezuchê kuxik jevnnak bosun aslo;
24. dekhun Simanv Pedrun taka khunna korun mhollem: "To konnachi khobor korta?"
25. Tannem Jezuchea hodd'ddear bagavon Taka mhollem: "Somia, to konn?"
26. Jezun portipall kelo: "Zaka Hanv unddeacho kuddko buddoun ditolom, toch to." Ani Tannem unddeacho kuddko ghetlo ani to buddoun Judasak, Simanv Iskariotachea putak, dilo.
27. Unddeacho kuddko ghetlea uprant, tachê bhitôr Soitan riglo. Jezun taka mhollem: "Tum korunk vetai tem veginch kôr."
28. Kitea pasot Tannem oxem taka mhollem, hem jevnnak boslolea dusrea konnakuch somzonk na.
29. Judasa lagim pongtichi gantt asli dekhun, Jezu taka oxem mhonntta mhonn kãi zannank dislem: "Utsovak amkam gorjechem tem ghe vô goribank kitem-i ghal."
30. Mhonnttôch, unddeacho kuddko ghetlea uprant, to rokddoch bhair sorun gelo. Rat zal'li.
31. To bhair vetôch, Jezun mhollem: "Atam Mon'xachea Putak mhoima melltoli ani Tachê sovem Devak mhoima mell'lli.
32. Devak Tachê sovem mhoima mell'lli zalear, Dev-ui Taka Apnna sovem mhoima ditolo, ani rokddoch Taka mhoimevont kortolo.
33. Mhojea supurlea bhurgeamnô, anink thoddoch vêll Hanv tumchê sangatim asam. Tumi Mhaka sôdtoleat; ani zoxem Hanvem Judeikarank mhollam, toxem Hanv atam tumkam-i sangtam: Zõi Hanv vetam thõi tumchean ieunk zaina.
34. Êk novi adnia tumkam ditam; ekamekacho môg korat; Hanvem tumcho môg kela, tosoch tumi-i ekamekacho môg korat.
35. Ekamekacho môg korxat zalear, hachê voilean tumi Mhoje xis mhonn sogllea mon'xank kolltolem."
36. Simanv Pedrun Taka vicharlem: "Somia, Tum khõi vetai?" Jezun portipall kelo: "Hanv vetam thõi tujean atam Mhojê pattlean ieunk zaina, punn magir ietoloi Mhojê pattlean."
37. Pedrun Taka vicharlem: "Somia, kitea pasot mhojean atam Tujê pattlean ieunk zaina? Tujê pasot hanv mhozo jiv diunk toiar!"
38. Jezun zobab dilo: "Hôi? Mhojê pasot tum jiv diunk toiar asai? Hanv tuka sot sangtam, kombean sad ghalchê adim, tin pavtti tum Mhaka vollkhonãi mhonn sangtoloi."
