1. Tumcho bhavarth ddonvddollna zaunk hem Hanvem tumkam sanglam.
2. Tim tumkam devsthanantle bhairaitolim; khorem mhollear oslo vêll pavot ailo, ki jim konn tumkam jivexim martat, tim apunn Devachi bhokti kortat mhonn somzotolim.
3. Ani tãnnim Bapak ani Mhaka-i vollkhunk na dekhun, tim oxem kortolim.
4. Tancho vêll pavtôch Hanvem tumkam heô vostu sangloleô mhonn tumkam ugddas zaunchê khatir, Hanvem teô tumkam sangleat. Hanv tumchea sangata aslom dekhun, survatek thaun Hanvem tumkam heô vostu sangunk nasleô.
5. Punn atam Hanv Mhaka patthoila Tachê-xim vetam; tori Tum khõi vetai kai mhonn tumchê bhitorlo eklo-i Mhaka vicharina.
6. Punn Hanvem tumkam heô vostu sangleat dekhun, tumchim kallzam khontin bhòrleant.
7. Tori astam Hanv tumkam sot sangtam: Hanv gelom zalear, tumkam adavachem; Hanv vochona zain zalear, Xaroti tumchê thãi ieuncho na; punn Hanv gelom zalear, Taka tumchê thãi dhaddtolom.
8. Ani To ietolo Tednam, patok konnem kelam, Devak manta tem konnem kelam, ani Devacho nirnnoi konn, hem sogott dakhoun To sonvsaracho guneanv sid'd kortolo.
9. Konnem patok kelam tem dakhoitolo, kiteak tãnnim Mhojer bhavarth dovorlo na;
10. Konnem Devak manta tem kelam tem dakhoitolo, kiteak Hanv Bapa-xim vetam ani tumi Mhaka anink polleunche nant;
11. Devacho nirnnoi konn to dakhoitolo, kiteak hea sonvsarachea odhikariacher Devan khastichem formonn marlem.
12. Ozun zaiteô vostu Hanvem tumkam sangcheô asat, punn teô tumchean atam monant gheunk zainant.
13. Deva sombondim sot ugddapem korta to Atmo ietolo Tednam, To tumkam purnn sotachê vatten choloitolo, kiteak To Aplea podorchem ulouncho na, punn jem kitem To aikota tem To sangtolo, ani gòddchem asa tem sogllem tumkam kolloitolo.
14. To Mhaka mhoima ditolo, kiteak jem To tumkam kolloitolo, tem To Mhojê koddsun ghetolo.
15. Jem Bapachem tem sogllem Mhojem; hea pasot Hanvem oxem mhollam: jem To tumkam kolloitolo, tem To Mhojê koddsun ghetolo.
16. Thoddeach vellan tumi Mhaka polleunche nant; ani anink thoddea vellan tumi Mhaka novean polletoleat."
17. Tachea xisantlea kãi zannamnim ekamekak mhollem: "To sangta: 'thoddeach vellan tumi Mhaka polleunche nant, ani anink thoddea vellan tumi Mhaka novean polletoleat' ani 'Hanv Bapa-xim vetam' -hem To amkam mhonntta tem kitem?"
18. Tôr te mhonnttale: "To 'thoddo vêll' mhonntta tem kitem? To sangta tem amkam somzona."
19. Te Apnna kodde vicharunk kortale mhonn zanno zaun, Jezun mhollem: " 'Thoddeach vellan tumi Mhaka polleunche nant ani anink thoddea vellan tumi Mhaka novean polletoleat', oxem Hanvem mhollem tacho ôrth tumi ekamekakodde vichartat?
20. Hanv tumkam sot sangtam: tumi roddtoleat ani pinrgotoleat, punn sonvsar khuxalbhorit zatolo; tumi khontibhorit zatoleat, punn khontichê bodlek tumkam melltolo sontôs.
21. Êk bail, porsutt zaunchea vellar, aplo vogôt pavlo mhonn khontibhorit zata, punn bhurgeak zolm ditôch sonvsarant êk monis zolmola mhonn sontosun, tika anink khonticho ugddas zaina.
22. Toxench tumkam atam khônt zalea, punn Hanv tumkam novean polletolom, ani tumchem kalliz khuxalborit zatolem, ani tumchi khuxalkai konnuch tumchê thaun kaddun vhorcho na.
23. To dis ietolo Tednam, tumi Mhaka kãi vicharche nant. Mhojea nanvan Bapa lagim tumi kitem-i magxat zalear, To tumkam ditolo.
24. Ozun porian tumi Mhojê nanvim kitench magunk na. Magat ani tumkam melltolem, ani oso tumcho anond purnn zatolo."
25. Hem sogllem Hanvem tumkam voparimnim sanglam; punn oslo vêll pavot ailo, ki Hanv anink tumchê kodde voparimnim ulouncho na, punn Bapa vixim ugddapim uloitolom.
26. Tea disa tumi Mhojê nanvim magtoleat; ani tumchê khatir Hanv Bapa lagim magtolom mhonn Hanv tumkam sangina;
27. karonn Bap khaxa tumcho môg korta, kiteak tumi Mhozo môg kela ani Hanv Deva-thaun upzolam mhonn tumi bhavarth dhôrla.
28. Hanv Bapa-sun upzolam ani sonvsarant ailam; atam Hanv sonvsar sôddtam ani Bapa-xim vetam."
29. Tachea xisamnim mhollem: "Atam ki Tum ugddapim uloitai, ani koslich vopar vaprinãi.
30. Tum sogllem zannoi mhonn atam amkam koll'llem ani konnem kitench vicharchi Tuka goroz na; hea pasot Tum Deva thaun ailai mhonn ami bhavarth dhôrtanv."
31. Jezun tankam portipall kelo: "Atam tori tumi bhavarth dhôrtat?
32. Oslo vêll pavot ailo, khoreponnim to pavlo, ki tumi soglle ap-aplê vatten ximpoddtoleat ani Mhaka ekloch sanddtoleat. Khorench mhollear, Hanv eklo na, kiteak Mhojea sangata Bap asa.
33. Mhojê sovem tumkam xanti mellchê khatir Hanv tumchê kodde heô vostu uloilam. Sonvsarant tumkam khônt astolich; punn kalljidar zaiat! Hanvem sonvsaracher zoit vhelem!"
