1. Betaniecho, Lazar nanvacho konn eklo monis piddent aslo. Maria ani tichi bhoinn Marta teach ganvcheô asleô.
2. Somiak pormôllit telan makhlo ani Tache pãi aplea kensamnim pusle ti Maria hi. Ticho bhav Lazar boro naslo.
3. Dekhun bhoinnimnim Jezuk sangun dhaddlem: "Somia, Tuzo ixtt boro na."
4. Hi khobor aikun, Jezun mhollem: "Hê pidden to morcho na; ti Devachê mhoimê khatir ailea; tichê vorvim Devachea Putak-ui mhoima melltoli!"
5. Marta, tichi bhoinn Maria ani Lazar, hancho Jezu môg kori.
6. Toripunn to boro na mhonn Taka khobor pavli Tednam, aslo têch svater Jezu anink don dis ravlo.
7. Tea uprant, Tannem xisank mhollem: "Anink êk pavtt Judeiant vochum-ia."
8. Xisamnim zobab dilo: "Guruji, niktech porian Judev Tuka fatraunk kortale, ani Tum porot thõi vetai?"
9. Jezun portipall kelo: "Eka disak bara tas asat ki na? Disachim choltat tanche pãi adollnant, kiteak tim hea sonvsaracho uzvadd polletat.
10. Punn konn ratchim choltat zalear, tanche pãi adolltat, kiteak tankam uzvadd na!"
11. Oxem uloun zatôch, Tannem tankam mhollem: "Amcho ixtt Lazar nhidla, punn Hanv taka utthounk vetam."
12. Xisamnim Taka sanglem: "Somia, to nhidla zalear, boro zatolo."
13. Jezun tachea mornnachi khobor kel'li, punn To nhidechea visovachi khobor sangtalo mhonn tankam dislem.
14. Tednam Jezun tankam spoxtt sanglem: "Lazar melo;
15. ani Hanv thõi naslom mhonn, tumchê pasot khuxal zatam, kiteak atam tumcho bhavarth ghôtt zatolo. Punn chol-ia, tachê-xim vochum-ia."
16. Zonvllo mhonnlolea Tomasan aplea vangddiam xisank mhollem: "Ami-i vochum-ia, Tachê borabor ami-i morum-ia."
17. Jezu pavlo Tednam, Lazarak somadhint ghalear char dis zale mhonn Taka koll'lem.
18. Betania Jeruzaleak laginch asli, sumar tin kilometranchi vatt.
19. Ani zaitim Judeikaram Martak ani Mariek, tanchea bhava pasot, pacharunk ail'lim.
20. Jezu ieta mhonn aikun, Marta Taka mellunk geli, punn Maria ghorant bosun ravli.
21. Martan Jezuk mhollem: "Somia, Tum hangasôr asloi zalear, mhozo bhav morcho naslo.
22. Ani ozun porian Tum Deva lagim magxi titlem-i Dev Tuka ditolo mhonn hanv zannom."
23. Jezun tika mhollem: "Tuzo bhav novean jivo zatolo."
24. Martan Taka mhollem: "To nimannea disa, punorjivontponnachea somoiar, novean jivont zatolo mhonn hanv zannom."
25. Jezun tika portipall kelo: "Punorjivontponn ani Jivit Hanvuch. Jim konn Mhojer bhavarth dovortat, tim melim-i zalear jivim astolim;
26. ani jim konn jivim asat ani Mhojer bhavarth dovortat tim sasnnak morchim nant. Ho bhavarth asa mum tuka?"
27. Tinnem taka mhollem: "Hôi, Somia, sonvsarant ieuncho aslo to Krist Devacho Put to Tunch mhonn mhaka bhavarth asa."
28. Oxem mhonnttôch, ti aplê bhoinni Mariek apounk geli, ani tika kuxin vhorun mhollem: "Guruji hanga asa ani tuka apoita."
29. Hem aikun, ti rokddich utthli ani Tachê sorxem geli.
30. Jezu ozun gramant pavunk naslo, punn Marta Taka mell'lloli thõich aslo.
31. Tika ghorant buzvônn ditalim tim Judeikaram, Maria veginch utthta ani bhair veta tem polleun, ti somadhi sorxem roddunk veta mhonn chintun, tichê pattlean gelim.
32. Jezu aslo thõi pavtôch, Taka polleun Maria Tachea pãiam poddli; tinnem mhollem: "Somia, Tum hanga asloi zalear, mhozo bhav morcho naslo."
33. Maria roddtali ti ani tichê sangatim ail'lim tim Judeikaram roddtalim tim polleun, Jezu bhov kollvoll'lo ani soglloch thorthorlo.
34. Tannem vicharlem: "Taka tumi khõi ghala?" Tãnnim Taka sanglem: "Somia, ie ani polle."
35. Jezuk roddunk ailem.
36. Dekhun Judeikaramnim mhollem: "Polleiat, ho tacho kitlo môg kori!"
37. Punn tanchê bhitorlea thoddeamnim mhollem: "Hannem nhoi rê kudd'ddeache dolle ugôddle? tôr tachean haka mornnantlo nivarunk zainaslo?"
38. Tednam novean soglloch kollvollon Jezu somadhi-xim ailo; ti êk dhôl asli ani tichea tonddar êk fatôr ôddloli.
39. Jezun mhollem: "Fatôr kuxin kaddat." Martan, mel'leachê bhoinnin, Taka mhollem: "Somia, atam taka ghann martoli; taka char dis zale."
40. Jezun tika sanglem: "Tum bhavarth dhôrxi zalear, Devachi mhoima polletoli mhonn Hanvem tuka sangunk na?"
41. Mhonnttôch tãnnim fatôr kuxin kaddli. Tednam dolle ubarun Jezun mhollem: "Bapa, Mhojem aikoleim dekhun Hanv Tuka dhinvastam.
42. Mhojem sodanch aikotai mhonn Hanv zannom aslom, punn bhonvtonnim aslolea loka pasot, Tunvem Mhaka dhaddlai mhonn tãnnim bhavarth dhôrchê khatir Hanv oso uloilam."
43. Hem mhonnlea uprant to vhoddlean oso arddolo: "Lazar, bhair sor !"
44. Mel'lo to bhair ailo, tache hat ani pãi falliamnim bandlole, ani tachem tondd rumalan dhamplolem. Jezun tankam sanglem: "Tache bandpas sôddat, taka vochum-di."
45. Tannem kel'lem tem polleun, Mariê-xim ail'lea Judeikarantlea zaitea zannamnim Tacher bhavarth tthevlo.
46. Punn tanchê bhitorlea kãi zannamnim Farizevam-xim vochun, Jezun kel'lem tem tankam kolloilem.
47. Mhonnttôch mukhel iadnikamnim ani Farizevamnim Mha-Dhormsobhechi boska apoili. Tãnnim mhollem: "Ho monis zaiteô khunna korun dakhoita Ani ami kitem kortanv?
48. Ami taka osoch sôddlo zalear, sogllo lôk tacher bhavarth dovortolo, ani Romi odhikari ietole ani amchea Devmondiracho ani amchea raxttracho bhosm kortole."
49. Tanchê modlo eklo, Kaifas nanvacho, tea vorsacho porom-iadnik aslo; tannem tankam mhollem: "Tumi kãich somzonant.
50. Amchea ak'khea raxttracho bhosm zaunchê poros, porjê pasot eklo melear odik faideachem: hem tumi somzoch nant."
51. Hem tannem apleach monantlem sangunk na; punn tea vorsacho porom-iadnik koso tannem oxem bhakit kelem, ki Jezu porjê pasot morcho aslo,
52. ani nhoi fokot porjê pasot, punn Devachea ais-pois ximpoddlolea bhurgeank zoma korun êk korchê pasot.
53. Tea disa thaun Taka jivexim marunk tãnnim tharav ghetlo.
54. Dekhun Jezu Judeikaram modem ukteponnim bhonvona zalo, punn thõisorlo bhair sorun oronnea lagim aslolea prantant, Efraim nanvachea nogrant, gelo ani thõi Aplea xisam borabôr ravlo.
55. Judevanchem Pask lagim pavlolem. Paska adim apli xud'dhi korunk zaito lôk ganv-ganvam thaun Jeruzaleak choddun gel'lo.
56. Tim Jezuk sôdtalim ani Devmondirant ekamekak mhonnttalim: "Tumkam kitem dista? To Utsovak ietolo ki na?"
57. Jezuk dhorchê khatir to khõi asa ti konnak khobor asot zalear apnnank tem kollounchem mhonn mukhel ladnikamnim ani Farizevamnim hukum' ghalo.
