1. Tea uprant, Tiberiasachea Doria-xim Jezu novean xisank dixtti poddlo. Hê porim To dixtti poddlo:
2. Simanv Pedru, Zonvllo mhonnlolo Tomas, Galileiantlea Kanacho Natanael, Zebedevache put, ani Tachea xisam modle anink dog ektthãi asle.
3. Simanv Pedrun tankam mhollem: "Hanv maslli marunk vetam." Tãnnim taka mhollem: "Ami-i tujê borabôr ietanv." Te gele ani hoddeant choddle; punn tê rati tankam kãich mell'llem na.
4. Sokall zatôch Jezu veller ubo aslo; to Jezu mhonn xisank koll'llem na.
5. Jezun tankam mhollem: "Arê babamnô, maslli kitem tori poddlea mum?" Tãnnim Taka zobab dilo: "Kãich na."
6. Tannem tankam sanglem: "Hoddeachê uzvê vatten rampônn ghalat ani tumkam maslli poddtoli." Tãnnim rampônn ghali, ani maslli ekdom chôdd poddli dekhun, tanchean rampônn oddunk zaina zali.
7. Jezu môg kori tea xisan Pedruk mhollem: "To Somi!" To Somi mhonn aikun, Simanv Pedrun aplem voilem anglem penkttak bandlem (kiteak to sarko nheslolo naslo) ani doriant uddki marli.
8. Punn her xis hoddear bosun ani masllen bhòrloli rampônn oddit-oddit aile; te toddik laginch asle, sumar deddxem hat bhair.
9. Toddir pavle Tednam, tãnnim thõi unddo dekhlo ani kollxeanchea ujear dovorloli maslli.
10. Jezun tankam mhollem: "Tumi atam dhôrlea tantli maslli hanga haddat."
11. Hoddear choddun Simanv Pedrun rampônn toddir oddun haddli. Ti ekxem treponn vhoddlea maslliamnim bhòrloli asli; ani itleô maslliô astana-i, rampônn pinzli na.
12. Jezun tankam mhollem: "Nasteak ieiat." Tum konn kai mhonn vicharunk nasteak bosloleantlea konnakuch kalliz zalem na; To Somi mhonn te zanno asle.
13. Tednam Jezun fuddem sorun unddo ghetlo ani tankam dilo; toxench maslli-i dili.
14. Mel'leantlo punorjivont zalea uprant Jezu xisank dixtti poddlo ti hi tisri pavtt.
15. Nasto zatôch Jezun Simanv Pedruk mhollem: "Simanv, Juanvachea puta, hanchê poros odik Mhozo môg kortai mum tum?" Tannem Taka mhollem: "Hôi, Somia, hanv Tuzo môg kortam mhonn Tum zannoi!" Jezun taka mhollem: "Mhojea menddrank chorvak vhor."
16. Dusrê pavtti Tannem taka vicharlem: "Simanv, Juanvachea puta, Tum mhozo môg kortai?" Tannem Taka zobab dilo: "Hôi, Somia, hanv Tuzo môg kortam mhonn Tum zannoi." Jezun mhollem: "Mhojea xelliank rakh."
17. Tannem taka tisrê pavtti vicharlem: "Simanv, Juanvachea puta, Mhozo môg kortai mum tum?" 'Mhozo môg kortai mum tum?', oxem apnnak tisrê pavtt vicharlem dekhun Pedruk khônt zali, ani tannem oso portipall kelo: "Somia, Tum sogllem zannoi; hanv Tuzo môg kortam mhonn Tum zannoi." Jezun taka mhollem: "Mhojea xelliank chorvak vhor.
18. Khorench khorem Hanv tuka sangtam: tum lhan asloi Tednam, tujea penkttak bandtaloi ani tuka zai thõi tum vetaloi; punn tum mhataro zatôch, tuje hat vistartoloi ani dusro konn tujea penkttak bandtolo ani tuka naka thõi tuka gheun vetolo."
19. Koslea mornna vorvim to Devak mhoima ditolo aslo tem dakhounk, Jezun toxem mhollem. Tea uprant mhollem: "Mhojê patthlean ie."
20. Pedru voll'lo ani Jezucho mogacho xis apnna patthlean ietalo to tannem pollelo; heach xisan, ratchea jevnnar Jezuchea hodd'ddeak tenkun, Taka mhonnlolem: "Somia, Tuzo ghat ghetolo to konn?"
21. Taka pollelo Tednam, Pedrun Jezuk mhollem: "Somia, hachem kitem?"
22. Jezun taka mhollem: "Hanv ie-sôr to ravlolo Mhaka zai zalear, tuka kiteak poddlam? Tum Mhojê pattlean ie."
23. Ho xis morcho na mhonn bhavam-bhoinnim modem khobor zali; punn "to morcho na", oxem Jezun Pedruk mhonnunk naslem, punn "Hanv ie-sôr to ravlolo Mhaka zai zalear,tuka kiteak poddlam?"
24. Hoch xis hea vostunchi govai dita: tannench heô vostu boroun dovorleat; ani tachi govaiki khori mhonn ami zannonv.
25. Jezun kel'leô anink-ui zaiteô vostu asat; teô soglleô ekan-êk boroun dovorloleô zalear, borounk poddtolim aslim tim pustokam dovrunk sonvsar legun pavcho naslo mhonn mhaka dista.
