1. Paskachê Porbek sô dis asat mhollear, Jezu Betaniek ailo; Tannem mel'leantlo jivont kel'lo to Lazar hanga ravtalo.
2. Thõi Taka ek jevonn kelem; Marta poramôs kortali ani Tachê borabôr jevnnak bosloleam modem Lazar aslo.
3. Osôl zottamanxechem chodd molachem êk rat-bhôr pormollit tel gheun, Marien Jezuche pãi makhle ani aplea kensamnim te pusle, ani telachea domdomit pormollan ghor bhòrlem.
4. Tednam Tachea xisam modlo eklo, Tacho ghat ghetolo aslo to, Judas Iskariot, hannem mhollem:
5. "Kiteak mhonn hem pormollit tel tin'xim dinarank vikunk na ani tache poixe kiteak mhonn goribank diunk nant?"
6. Taka goribanchem poddlolem mhonn nhoi, punn to chôr aslo dekhun tannem toxem mhollem; tachê lagim pongtichi gantt astali ani tantum lôk ghaltalo tem to apnnak kaddi.
7. Jezun mhollem: "Asum-di tika! Mhojea nikhipinneachea disak tika ho pormôll samballum-di.
8. Dubllim sodanch tumchê modem asat, punn Hanv tumchê modem sodanch na."
9. Jezu thõi asa mhonn Judeikarantlea zaitea zannank koll'lem. Mhonnttôch tim thõi ailim Jezuchêch pasot mhonn nhoi, punn Tannem mel'leantlo novean jivont kel'lea Lazarak-ui polleunk.
10. Mhonnun mukhel iadnikamnim Lazarak-ui jivexim marcho mhonn tharailem,
11. kiteak, taka lagun, zaitim Judeikaram tankam sôddun Jezucher bhavarth tthevtalim.
12. Dusrea disa, Utsovak ail'lea zaitea lokan Jezu Jeruzaleak aila mhonn aikolem.
13. Dekhun, maddancheô chuddtiô gheun Taka mellunk to lôk bhair sorlo ani oso arddunk laglo: "Zôi! Zôi! Sorvesporachea nanvan ieta Taka zôi! Israelachea Raiak zôi !"
14. Ani Jezuk ek lhan-xem gaddum mell'llem ani tacher To boslo; kiteak oxem boroil'lem aslem:
15. "Sionachê porjê, bhieum naka; ho polle tuzo Raza ieta, gaddvachea poracher bosun ieta!"
16. Tache xis poilim heô vostu somzole nant, punn Jednam Devan Jezuk mhoimevont kelo, Tednam Tachê vixim oxem boroil'lem aslem mhonn ani Taka oxem kel'lem mhonn tankam ugddas ailo.
17. Lazarak somadhintlo bhair apoilo ani taka mel'leantlo utthoilo Tednam Jezu borabôr aslo to lôk hê ghòddnê vixim govai ditalo.
18. Heach pasot lokachi urpônz Taka mellunk bhair sorli: Jezun hi khunna kel'li mhonn tãnnim aikol'lem.
19. Tednam Farizevamnim ekamekak mhollem: "Pollelem mum? Amchem kãich cholona: ak'kho sonvsar tachê pattlean chol'lo!"
20. Utsovachea somoiar, Devak bhôzunk Jeruzaleak choddun ail'leam modem thoddo Grik lôk aslo.
21. Galileiantlê Bethsaidechea Filipa sorxim ieun, tãnnim oxi magnni keli: "Saiba, ami Jezuk polleunk sôdtanv."
22. Filipan vochun Andrek sanglem; Andren ani Filipan borabôr Jezuk sanglem.
23. Jezun tankam portipall kelo: "Devan Mon'xachea Putak mhoimevont korcho vêll pavlo.
24. Khorench khorem Hanv tumkam sangtam: gonvacho konno zomnir poddun morona zalear, to tosoch urta; punn morot zalear, zaitem pik dita.
25. Jim konn aplea jivacho môg kortat, tim aplo jiv ibaddtat; ani jim konn hea sonvsarant aplea jivacho dvês kortat tim aplo jiv Sasnnik Jivitak samballtat.
26. Konn-ui Mhoji seva kortat zalear, tãnnim Mhozo pattlav korunk zai; ani zõi Hanv asam, thõi Mhojim sevokam-i astolim. Konn-ui Mhoji seva kortat zalear, Mhozo Bap tankam man ditolo."
27. "Atam Mhojea jivacher akant aila. Hanvem kitem mhonnchem? Bapa, hea vellantlo Mhaka nivar, oxem mhonnum? Na, heach pasot Hanv hea vellak pavlam.
28. Bapa, Tujea Nanvak mhoima zôddun ghe." Tednam sorgar thaun êk tallo ailo: "Hanvem Mhojea Nanvak mhoima zôddun ghetlea ani novean mhoima zôddun ghetolom."
29. Hem aikun, lagim aslolea lokan mhollem: "Gôddgôdd marla." Dusreamnim mhollem: "Êk devdut Tachê kodde uloila."
30. Jezun portipall kelo: "Ho tallo Mhojê pasot nhoi, tôr tumchê pasot aila.
31. Atam hea sonvsarachi mon'subi zata; atam hea sonvsarachea odhikariak Dev bhair ghaltolo.
32. Ani Jednam Mhaka zomni velo ubartit, Tednam Hanv sogllea mon'xank Mhojê-xim oddun haddtolom."
33. Oxem mhonnun, Apunn koslê torechem moronn bhôgcho aslo, tem Tannem khunnailem.
34. Lokan Taka zobab dilo: "Krist sodankal jivo astolo mhonn ami Xastrantlem aikolam. Mon'xachea Putak ubarunk zai mhonn tum koso sangtai tôr? Konn to Mon'xacho Put?"
35. Jezun tankam mhollem: "Anink iloch vêll tumchê sovem uzvadd asa. Uzvadd astana cholot ravat, na tôr tumi kallokhak sampoddtoleat; kallokhant choltat tim apunn khõi vetat tem nokllot.
36. Tumi Uzvaddachim bhurgim zaunchê khatir tumkam Uzvadd astana Uzvaddacher bhavarth dovrat." Oxem sangun, Jezu tanchê sorxilo gelo ani liplo.
37. Zori Tannem itleô khunna tanchê hujir kel'leô, tori tãnnim Tacher bhavarth tthevlo na;
38. Izaias provadian sangun dovorlolem tem ghoddon ieunchê khatir hem oxem zalem; tachim utram him asat: "Sorvespora, ami porgôttlea ti khobor konn sotmandit? Ani hê ghòddnnent Sorvesporacho bollixtt hat konnak tori dokhôl zala zait?"
39. Khorench tanchean sotmanunk zalem na, kiteak mhollear oxem-i Izaiasan sangun dovorlolem:
40. "Aplea dolleamnim tãnnim pollena zaunk, aplea monan tankam somzona zaunk ani Hanvem tankam borim korchê khatir tim Mhojê-xim portun iena zaunk, tanche dolle Tannem kudd'dde keleat ani tanchem kalliz datt nibor kelam."
41. Jezuchi mhoima dekhli Tednam Tachê sombondim Izaias oso uloil'lo.
42. Tori astana, odhikariantlea zaitea zannamnim Tacher bhavarth dovorlo, punn te hem bhailean dakhoinasle, kiteak tankam Farizevanchi bhirant asli ani apnnank devsthanantle bhair ghaltit mhonn te bhietale;
43. karonn, Devachê mhoimê poros, mon'xam modem zôddlolê vhoddvikechi te odik porva kortale.
44. Jezun vhoddlean mhollem: "Mhojer bhavarth tthevtat tim Mhojeruch nhoi, bogor Mhaka patthoila Tacher bhavarth tthevtat.
45. Ani Mhaka polletat tim Mhaka patthoila Taka polletat.
46. Hanv sonvsarant uzvadd koso ailam; dekhun Mhojer bhavarth dovortat tim kallokhant urchim nant.
47. Mhojim utram aikoleam astana konn-ui tim pallinant zalear, Hanv tanchi mon'subi korina, kiteak sonvsarachi mon'subi korunk Hanv ieunk na, punn sonvsarachem taronn korunk ailam.
48. Jim konn Mhoji beporva kortat ani Mhojim utram manun ghenant, tanchi mon'subi korunk asa konn: jem utor Hanv uloilam tench nimannea disa tanchi mon'subi kortolem.
49. Kiteak Mhojêch osttongim Hanv ulounk na; Bapan Mhaka patthoila ani Hanvem kitem sangchem ani kitem ulounchem, hachê vixim Tannench Mhaka adnia dilea.
50. Ani Tachê adniê pormannem Hanv uloitam tem Sasnnik Jivit haddta mhonn Hanv zannom. Mhonnttôch jem kitem Hanv uloitam, tem Bapan Mhaka sanglam toxench uloitam."
