1. Satolleachea poilea disa, Magdalachi Maria bhov sokallim, ozun kallôkh astana, somadhi-xim aili. Tinnem somadhi veli fatôr kaddloli polleli.
2. Mhonnun, Simanv Pedru ani Jezu môg kortalo to dusro xis asle thõi vochun, tinnem mhollem: "Somiak somadhintlo kaddun vhelo ani Taka khõi ghala tem ami nokllonv."
3. Dekhun Pedru tea dusrea xisa borabôr bhair sorlo ani somadhi-xim gelo.
4. Te dog-ui dhanvunk lagle, punn to dusro xis Pedru poros vegim dhanvlo ani somadhi-xim poilo pavlo;
5. ani, voddôv ghalun, tannem zomnir asloleô oli polleleô, punn to bhitôr gelo na.
6. Tednam tachê pattlean Simanv Pedru-i pavlo ani somadhint bhitôr gelo; ani, polle zalear, thõi zomnir oli asleô teô tannem polleleô,
7. ani Tachê tokler ghal'lo to rumal, olim sorxem dovorlolo nhoi, punn kuxin kovoll'lolo.
8. Tednam somadhi-xim poilo pavlolo to-i xis bhitôr sorlo, ani tannem pollelem ani bhavarth dhôrlo.
9. Povitr Pustoka pormannem To mel'leantlo punorjivont zaunk zai aslo mhonn te ozun nokllo asle.
10. Uprant xis ghora portole.
11. Punn Maria somadhi lagim bhair ubi ravun roddtali, ani roddtana voddôv ghalun somadhint polle zalear,
12. dhovim angavlim nheslole dog devdut tinnem pollele: zõi Jezuchi kudd dovorloli, thõi te bosun asle, eklo toklê vatten ani dusro pãiam vatten.
13. Hãnnim tika mhollem: "Bai, tum kiteak roddtai?" Tinnem tankam mhollem: "Kiteak mhojea Somiak kaddun vhelo ani Taka khõi ghala to hanv nokllom."
14. Oxem mhonnlea uprant, pattlean vollon polle zalear, tinnem Jezuk thõi ubo aslo to pollelo. Punn To Jezu mhonn tinnem Taka vollkhunk na.
15. Jezun tika mhollem: "Bai, tum kiteak roddtai? konnak sôdtai tum?" To mali mhonn chintun, tinnem Taka mhollem: "Saiba, tunvem Taka kaddun vhelai zalear, Taka khõi ghalai to mhaka sang, ani hanv Taka kaddun vhortolim."
16. Jezun tika mhollem: "Mariê!" Tinnem vollon Judeikaranchê bhaxen Taka mhollem: "Rab'buni!" (mhonngê Guruji!).
17. Jezun tika mhollem: "Mhaka dhôrun ravum naka! Hanv ozun Bapa sorxim choddunk na: Mhojea Bapa ani tumchea Bapa-xim, Mhojea Deva ani tumchea Deva-xim, Hanv choddun vetam."
18. Magdalachi Maria geli ani apnnem Somiak pollela ani Tannem apnnak oxem-oxem sanglam mhonn tinnem xisank kolloilem.
19. Têch sanjê, mhonngê satolleachea poilea disa, xis zomlole asle thõichim daram Judevanchê bhirantin bond korun dovorlolim; Jezu bhitôr sorlo ani tanchê modem ubo ravlo. Tannem tankam mhollem: "Xanti tumkam!"
20. Hem mhonnun, Tannem tankam Aple hat ani Apli kus dakhoilim. Somiak polleun, xis khuxal zale.
21. Novean Jezun tankam mhollem: "Xanti tumkam! Zoso Bapan Mhaka patthoila, tosoch Hanv tumkam patthoitam."
22. Oxem uloun, Tannem tancher svas sôddlo ani tankam mhollem: "Povitr Atmo gheiat.
23. Zankam tumi tanchea patkanchem bhogsonnem ditat, tankam Dev tea patkanchem bhogsonnem dita; ani jea patkanchem bhogsonnem tumi addaun dovortat, tea patkanchem bhogsonnem Dev addaun dovorta."
24. Jezu ailo Tednam, Baram modlo eklo, Zonvllo mhonnlolo Tomas, tanchê borabôr naslo.
25. Dekhun dusrea xisamnim taka mhollem: "Ami Somiak pollela." Punn tannem tankam mhollem: "Tachea hatancher hanvem khil'leanchi khunna pollelea xivai, ani khil'leanchê svater mhojem bott ghalea bogor, ani mhozo hat Tachê kuxint ghalina zain zalear, hanv sotmancheak na."
26. Atth disam uprant, xis novean ghorant asle, ani tanchê borabôr Tomas. Daram bond astana, Jezu bhitôr ailo, ani tanchê modem ubo ravun Tannem mhollem: "Xanti tumkam!"
27. Uprant tannem Tomasak mhollem: "Tujem bott hanga ghal: he polle asat Mhoje hat! Tuzo hat lagim hadd ani Mhojê kuxint ghal! Hea fuddem bhavarth naslolo zaum naka, punn bhavarth dhôr."
28. Tomasan Taka zap diun mhollem: "Mhojea Somia ani mhojea Deva!"
29. Jezun taka mhollem: "Mhaka polleloi mhonn tunvem bhavarth dhôrloi; pollenastana bhavarth dhôrtat tim khorench subhagi!"
30. Jezun xisam hujir kel'leô anink zaiteô khunna hea pustokar boroun dovrunk nant;
31. punn Jezu khoreponnim Krist ani Devacho Put mhonn tumi bhavarth dhôrchê khatir ani, bhavarth dhôrun, Tachea Nanva vorvim tumkam Jivit mellchê pasot, heô vostu boroun dovorleat.
