1. Tednam Pilatan Jezuk dhôrun Tacher jerbond marunk laile.
2. Soinikamnim kantteancho êk mukutt vinnlo ani Tachea mathear bosoilo, ani Tachea bhuzancher ek zambllem avoronn uddoilem.
3. Te Tachê-xim ieun mhonnttale: "Noman, Judevanchea raza!" ani Tacher thapttam martale.
4. Novean bhair ieun, Pilatan tankam mhollem: "Polleiat, tacho mhaka kosloch guneanv mellona mhonn tumkam kollon ieunchê pasot hanv taka bhair haddtam."
5. To kantteancho mukutt ani tem zambllem anglem ghalun Jezu bhair ailo. Pilatan tankam mhollem: "Polleiat, ho asa to monis!"
6. Taka pollena fuddem, mukhel iadnikamnim ani chovkidaramnim oxi bob marli: "Taka khursar mar! khursar mar Taka!" Pilatan tankam mhollem: "Tumich taka vhorat ani khursar marat; mhaka tacho kosloch guneanv mellona."
7. Judevamnim taka portipall kelo: "Amkam Xastr asa, ani amchea Xastra pormannem taka moronn favo, karonn to apnnakuch Devacho put korta."
8. Him utram aikolim Tednam, Pilat odik bhielo.
9. Porot nitixallent vochun, tannem Jezuk vicharlem: "Tum khõicho ga?" Punn Jezun taka zap dili na.
10. Tea pasot Pilatan Taka mhollem: "Tum mhojê kodde uloinãi? Tuka sôddunk ani tuka khursar marunk mhaka odhikar asa mhonn tum noklloi?"
11. Jezun taka portipall kelo: "To tuka voir sorgar thaun diunk naslo zalear, Mhojer tuka kosloch odhikar ascho naslo; hea pasot zannem Mhaka tujea hatant dila, taka odik vhôdd guneanv asa."
12. Hê ghoddiê meren Pilat Taka sôddunk kosli-i tori vatt sôdtalo, punn Judevamnim bob marli: "Hea mon'xak sôddxi zalear, tum Somrazacho ixtt nhoi; apnnakuch raza korta to monis Somrazacho virodhi zata!"
13. Pilatan him utram aikolim Tednam, tannem Jezuk bhair haddlo ani Chirebondi mhonnttat tê svater(Aramaik bhaxen Gab'bata) apunn nitisodrer boslo.
14. To dis Paskachê toiarecho dis aslo; sumar don'par zal'lo. Pilatan Judevank mhollem: "Ho polleiat tumcho raza!"
15. Tim arddunk laglim: "Taka nanch kôr! Taka nanch kôr! Taka khursar mar!" Pilatan tankam mhollem: "Tumchea razak hanv khursar marum?" Mukhel iadnikamnim zobab dilo: "Somraza bogor amkam dusro raza na!"
16. Tednam Taka khursar marunk Pilatan Jezuk tanchê adhin kelo. Tednam tãnnim Jezuk aplea tabeant ghetlo.
17. Ani to Aplo khuris vahun Kott'tteachea mhonnlolea zagear vochunk bhair sorlo: hea zageachem nanv Aramaik bhaxen Golgota.
18. Thõi Taka ani Tachê borabôr anink dogank tãnnim khursar marle: Jezuk modem ani tea dogank Tachê êk-êkê kuxik.
19. Pilatan êk namlêkh boroilo ani to khursa voir ghalo; tacher oxem boroil'lem aslem: 'Nazaretkar Jezu Judevancho Raza.'
20. Jezuk khursar marlo ti svat Xara lagim asli dekhun, zaitea Judeikaramnim to namlêkh vachlo; to Aramaik, Latin ani Grik bhasamnim boroil'lo.
21. Tednam Judevanchea mukhel iadnikamnim Pilatak mhollem: "Judevancho Raza mhonn boroum naka. Punn ho monis apunn Judevancho Raza mhonnttalo mhonn boroi."
22. Pilatan zobab dilo: "Hanvem boroilam tem boroun urlem."
23. Jezuk khursar martôch, soinikamnim Tachim vostram ghetlim ani tanche char vantte kele, dôr soinikak êk vantto. Toxench Tachem anglem ghetlem. Angleak xivônn nasli; tem voir-tem sokol ek sarkem vinnlolem;
24. hea pasot tãnnim ekamekak mhollem: "Ami tem pinzchem nhoi, punn sorti ghalun tem konnak poddta tem polleum-ia." Hê porim Povitr Pustokantlim him utram ghoddon ailim: "Tãnnim mhojim vostram apnnam modem vanttlim ani mhojea angleacher sorti ghaleô." Oxem soinikamnim kelem.
25. Jezuchea khursa sorxim Tachi avoi, Tachê avoichi bhoinn Kleofasachi potinn Maria, ani Magdalachi Maria, heô ubeô asleô.
26. Aplê avoik ani tichê kuxik ubo aslolea mogachea xisak polleun, Jezun avoik mhollem: "Ostorê, ho tuzo put!"
27. Uprant xisak mhollem: "Hi tuji avoi!" Ani tea vellar thaun xisan tika apnnachi mhonn ghetli.
28. Hea uprant, sogllem sompadlem mhonn zanno zaun, Povitr Pustok sopurnnaien pallon ieunchê khatir, Jezun mhollem: "Mhaka tan laglea."
29. Xirkean bhòrlolem donddul thõi aslem; tãnnim xirkeant buddoil'lem ek allombem boddiek lavun Tachea tondda-xim pavoilem.
30. Xirko chaklo Tednam, Jezun mhollem: "Sompadlem!" Ani, tokli bagaun, Tannem prann sôddlo.
31. To Toiarecho dis aslo, ani kherit dobajeacho Son'var lagim pavlolo. Dekhun, Son'vara disa kuddi khursar urona zaunk, tanche pãi môddche ani tancheô kuddi kaddun vhorcheô mhonn Judevamnim Pilata kodde maglem.
32. Soinik aile ani Jezu borabôr khursar marloleanche, poileache toxench dusreache-i, tãnnim pãi môddle;
33. punn Jezu-xim pavtôch, To melo mhonn polleun tãnnim Tache pãi môddle nant.
34. Punn eka soinikan êk bhalo gheun Tachi kus vidhli, ani rokddench rogot ani udok vhanvlim.
35. Zannem hem khaxa pollelem, tannench, tumi-i bhavarth dhôrchê pasot, hi govaiki dilea: tachi govaiki khori ani apunn sot uloita mhonn to zanno.
36. Povitr Pustok oxem mhonntta: "Tachem ek-punn hadd môddchim nant." Hem utor khorem zaunchê khatir heô vostu ghòddleô.
37. Povitr Pustok oxem-i mhonntta: "Aspas vidhloleak tim polletolim."
38. Hachê uprant, Arimateiacho Juze, Jezucho xis punn Judevanchê bhirantin guptim ravlolo, hannem Jezuchi kudd kaddun vhorunk Pilata kodde maglem. Pilatan rojia dili. Tannem ieun Jezuchi kudd kaddun vheli.
39. Ani Nikodem-ui (Jezu-xim poilim ratcho ail'lo to) sumar xembôr rat gondhrosachi ani musambhorachi misôllnni gheun ailo.
40. Tãnnim Jezuchi kudd ghetli, ani Judevanchê nikhipinneachê riti pormannem, pormôll lavun ti olimnim guttlaili.
41. Taka khursar marlolo tê svater êk bag asli, ani tê bagent ozun konnak ghalunk naslo tosli êk novi somadhi asli.
42. To Judevancho Toiarecho dis aslo mhonnun ani ti somadhi laginch asli dekhun, tãnnim Jezuk thõi ghalo.
