1. Nikodem nanvacho, Farizevanchea pokxantlo, Judevanchê Mha Dhormsobhecho vangddi, konn eklo monis aslo,
2. To ekdam ratcho Jezu-xim ailo. Tannem Jezuk mhollem: "Rabbi(mhonngê Guruji), Tum Deva koddsun ail'lo xastri mhonn ami zannonv, kiteak apnna sovem Dev na zalear, Tum kortai tosleô khunna konnuch korunk xokona."
3. Jezun taka portipall kelo; "Khorench khorem Hanv tuka sangtam: novean zolmolea bogor, konnachean Devachem raj polleunk zaina."
4. Nikodeman Taka mhollem: "Mhataro zal'lo monis koso mhonn zolmotolo? Tachean anink êk pavtt aplê avoichea kusveant bhitôr sorunk ani zolmunk zait?"
5. Jezun portipall kelo: "Khorench khorem Hanv tuka sangtam: udka ani Atmea thaun zolmolea xivai, konnuch Devachea Rajeant bhitôr sorunk xokona.
6. Mon'xa thaun zolmotat tim mon'xa soimbachim, ani Atmea thaun zolmotat tim Atmeachea soimbachim.
7. Tumi novean zolmunk zai, oxem Hanvem tuka mhollam dekhun, tum ojap zaum naka.
8. Varem apnnak zai thõi marta, ani tum tacho avaz aikotai, punn tem khõi thaun ieta vô khõi veta tem tum noklloi; jim konn Atmea thaun zolmoleant tanchê sovem toxench ghòddta."
9. Nikodeman Taka porot mhollem: 'Hem koxem zaunk xokta?"
10. Jezun taka zobab dilo: "Tum Israel porjecho xastri ani tori tum hem noklloi?
11. Khorench khorem Hanv tuka sangtam: ami zannonv tem uloitanv, ani ami dekhlam tachi sakxi ditanv, punn tumi amchi sakxi manun ghenant.
12. Tumkam sonvsarachea vostunchi khobor sangtam Tednam tumi sotmaninant; sorginchea vostunchi khobor sangin tôr, tumi ti koxi sotmanxat?
13. Sorgar thaun denvlolea Mon'xachea Puta bogor konnuch sorgar choddunk na.
14. Zoso Moizesan oroneant sorôp ubarlo, tosoch Dev Mon'xachea Putak ubartolo: oxem Putacher bhavarth tthevtolea somestank Sasnnik Jivit mellchem mhonn Devachi ievzônn.
16. Khorench, Tacher bhavarth tthevta tea dôr-eka mon'xacho nas zaina zaunk punn taka Sasnnik Jivit mellchê khatir, Devan Aplea ekleach Putak dilo: itlo Tannem sonvsaracho môg kelo!
17. Kiteak sonvsaracher khastichem formonn marunk nhoi, punn Puta vorvim sonvsarachem taronn zaunchê khatir Devan Putak sonvsarant dhaddlo.
18. Jim konn Tacher bhavarth tthevtat, tankam khastichem formonn na; punn jim konn Tacher bhavarth tthevinant, tancher khastichem formonn poddlolem asa, kiteak tãnnim Devachea ekleach Putacher bhavarth dovrunk na.
19. Ani ho asa nivaddo: sonvsarant Uzvadd ailo, punn mon'xamnim Uzvadda poros kallokhacho odik môg kelo, kiteak tanchim kortubam noxttim aslim.
20. Khorench, khotteponn kortat tim Uzvaddak kanttalltat ani aplim kortubam koslim tim kollon iena zaunk Uzvaddak ienant.
21. Punn sota pormannem choltat tim, apleô kornniõ Devache khuxê pormannem keleat mhonn ugddapim kollon ieunchê khatir, Uzvaddak ietat."
22. Uprant Jezu ani Tache xis Judeiachea prantant gele; thõi To tanchea sangata ravlo ani snan ditalo.
23. Salima lagim, Aenonant, thõi udok chodd dekhun, Juanv-ui snan ditalo; ani lôk thõi vetalo ani snan ghetalo.
24. Juanvak ozun bondkhonnint ghalunk naslo.
25. Ekdam Juanvacheam kãi xisamnim eka Judeva lagim xud'dhi vixim vivad suru kelo.
26. Ani Juanva-xim ieun tãnnim mhollem: "Rabbi (mhonngê Guruji) Jordana poltoddi zo tujea sangata aslo ani zachê vixim tunvem govai dilii, to polle apunn-ui snan dita ani sogllo lôk tachê-xim veta."
27. Juanvan zap diun mhollem: "Devan dilea xivai konnak kãich mellona.
28. Hanv Krist nhoi, punn Tachê mukhar vochunk Devan mhaka dhaddla', oxem hanvem sanglam mhonn tumich mhojê vixim govaiki ditat.
29. Hokol mhollear novreachi; taka lagim aslolo novreacho ixtt, novreacho tallo aikun, vhoddê khuxalkaien murgott'ta. Hich mhoji khuxalkai; ti atam bhoron ailea.
30. To vaddot vochunk zai, punn hanv zalear odik-odik lhan zaunk zai."
31. Voir thaun ieta To soglleam-von vorto. Prithumentlim upzotat tim prithumechim, ani tanchem ulovnnem prithumechem. Sorgar thaun ieta To soglleam-von vorto.
32. Apnnem dekhlam ani aikolam tachi To sakxi dita, toripunn konn Tachi sakxi manun ghena;
33. Tachi sakxi manun ghetat tim Dev sotevont mhonn ruzu kortat,
34. kiteak Zaka Devan patthoila, To Devachim utram uloita: Dev Taka map-mezop nastana Atmo dita.
35. Bap Putacho môg korta ani Tannem soglleô vostu Tachea hatant dileat.
36. Putacher bhavarth dovortat tanchê sovem Sasnnik Jivit asa; Putak khaltim zaunk kobul nant tim Jivit bhogunk pavchim nant, punn Devacho krôdh tanchea mathear asa.
