1. Tisrea disa, Galileiachea Kana ganvant ek logn aslem, ani Jezuchi avoi thõi asli;
2. tea lognak Jezuk-ui ani Tachea xisank apovnnem aslem.
3. Soro somplo. Tednam Jezuchê avoin Taka mhollem: "Tanchê lagim soro na."
4. Jezun tika mhollem: "Ostorê, tuka ani Mhaka hem kiteak poddlam? Mhozo vêll ozun pavunk na."
5. Tachê avoin chakrank mhollem: "To sangit titlem-i tumi korat."
6. Thõi, Judevanchê xud'dhi korpachê riti pormannem, fatrachim sô donnam aslim; dor ekant char te sô kollxe zatale.
7. Jezun tankam mhollem: "Donnam udkan bhôrat." Ani tãnnim tim oto-sôr bhôrlim.
8. Tannem tankam mhollem: "Tantlem ilem kaddun logna-utsovachea karbhariak vhorun diat." Tãnnim toxem kelem.
9. Karbharian soro zal'lem udok chakun pollelem. To soro khõicho ailo tem to nokllo aslo, punn udok kaddlolem te chakor mat zanno asle. Dekhun karbharian novreak apoun haddlo,
10. ani taka mhollem: "Soglleanger poilo boro soro ditat, ani lôk borench pietôch, holko to vantt'tat. Punn tunvem boro soro atam porian dovorlai."
11. Hi aplea khunnam modli poili khunna Jezun Galileiachea Kana ganvant keli, ani Apli mhoima fankoili; ani Tachea xisamnim Tacher bhavarth tthevlo.
12. Tea uprant, Aplê avoik, bhavam-bhoinnink ani xisank sangatak gheun to Kapernauma denvun gelo; punn tim chodd-xe dis thõi ravlim nant.
13. Judevanchem Pask lagim pavlolem; Jezu Jeruzaleak choddlo.
14. Devmondirant boil, xelliô ani parve viktale te, ani aplea veaparachea manddar boslole savkar Taka sampoddle.
15. Tannem dorianchi êk soiti keli, ani tankam soglleank, xelliam boilam soit, Devmondirantle dhanvddaile, savkarancheam nanneancheô raxi xevttun uddoileô ani tanche mandd omtile.
16. Parve viktoleank Tannem mhollem: "Hem sogllem hangasorlem kaddat; ani Mhojea Bapachem ghor tumi veaparachem ghor korum nakat."
17. "Tujea ghoracho man rakhchê axen lhasta mhojem kalliz", oxem Povitr Pustokar boroil'lem asa mhonn Tachea xisank Tednam ugddas zalo.
18. Judevamnim Taka mhollem: "Oxem korunk Tuka podvi asa mhonn kosli khunna Tujean amkam dakhounk zata?"
19. Tankam portipall korun Jezun mhollem: "Hem Devmondir tumi môddat, ani tin disamnim Hanv tem novean bandun ditam."
20. Judevamnim Taka mhollem: "Hem Devmondir bandunk sovêchallis vorsam laglim ani tin disamnim tem Tum novean bandtoloi?"
21. Punn To Aplê kuddichea Devmondirachi khobor kortalo.
22. Jednam Devan Jezuk mel'leantlo punorjivont kelo, Tednam Tannem oxem mhonnlolem mhonn Tachea xisank ugddas zalo; ani Povitr Pustokacher ani Jezun uloil'lea utracher tãnnim bhavarth tthevlo.
23. Pask-Utsovak To Jeruzaleant astana, Tannem kel'leô khunna polleun puskôll lokan Tacher bhavarth dovorlo;
24. punn Jezun zalear Aplo visvas tancher tthevlo na,
25. kiteak To sogllea mon'xank pok'ko vollkhotalo, konnachêch vixim konnench Taka kitench sangchi goroz nasli; mon'xam bhitôr kitem cholta tem Taka tthavem aslem.
