1. Tea uprant, Jezu Galileiant bhonvunk laglo; Judeiant bhonvchi Taka khuxi nasli, kiteak Judev Taka jivexim marunk sôdtale.
2. Judevancho Tombuncho Utsôv lagim pavlolo.
3. Dekhun Tachea soireamnim Taka mhollem: "Hangasorlo bhair sor ani Judeiant voch, ani Tum kamam kortai tim Tujea thõisorlea-i xisank polleum-di.
4. Konn apli vollokh ugddapim diunk sôdta tôr, to aplim kamam guptim korina. Tum oslim kamam kortai zalear, Tum khaxa sobhêmazar dixtti podd."
5. Tachea soireamnim porian Tacher bhavarth dhôrlona.
6. Jezun tankam mhollem: "Mhozo vêll ozun pavunk na, punn tumcho vêll sodanch pavlolo asa.
7. Sonvsarachean tumcho dvês korunk zaina, punn to Mhozo dvês kortach, kiteak Hanv tachim kortubam vaitt mhonn sakxi ditam.
8. Tumi Utsovak choddun vochat; Hanv hea Utsovak choddun vochona, kiteak Mhozo vêll ozun pavunk na."
9. Oxem mhonnun, To Galileiant ravlo.
10. Punn Tachim soirim Utsovak choddun vetôch, Jezu Apunn-ui gelo, ukteponnim nhoi, punn konnak kollonastana.
11. Utsovachea somoiar Judev Taka sôdtale ani mhonnttale: "To khõi asa?"
12. Ani Tachê vixim lôk zaitem futfut'talo. Konn-konn mhonno: "To boro monis". Ani konn-konn mhonno: "Na, to lokak fosoita."
13. Toripunn, Judevanchê bhirantin konn Tachê vixim ukteponnim uloinaslo.
14. Utsôv modem-so pavtôch, Jezu Devmondirant choddun gelo ani xikounk laglo.
15. Hem polleun, Judev ojap zaun mhonnttale: "Haka zannvai khõichi rê? Xikxonn kãi na taka."
16. Jezun tankam portipall kelo: "Mhoji xikovnn Mhoji nhoi, punn Mhaka patthoila Tachi;
17. konn Tachi khuxi korunk raji asat zalear, Mhoji xikovnn Devachi vô Mhojeach monantli, tem tankam kollon ietolem.
18. Apleach monantlem kaddun uloitat tim aplich vhoddvik sôdtat; punn apnnank dhaddla tachi vhoddvik sôdtat tim sota pormannem choltat; oslea mon'xam sovem lottikponn na.
19. Moizesan tumkam Somurt dilea ki na? Toripunn tumchê modlo konnuch Somurt samballina. Kiteak mhonn Mhaka jivexim marunk sôdtat tumi ?"
20. Lokan mhollem: "Tujer devchar bosla! Konn Tuka jivexim marunk sôdta?"
21. Zap diun, Jezun tankam sanglem: "Hanvem ek kam kelam ani tem polleun tumi sogllim ojap zatat.
22. Chintun polleiat: Moizesan tumkam sunôt korcho kaido ghalo (ti Moizesa koddchi mhonn nhoi, punn purvozam koddchi ailea) ani Son'vara disa tumi mon'xachi sunôt kortat.
23. Moizesachi Somurt môddina zaunk konn-eka mon'xachi Son'vara disa sunôt zata zalear, Hanvem Son'vara disa eka mon'xachem sogllem ang borem kelam dekhun, kiteak mhonn tumi Mhaka zolltat?
24. Voileavoir polleun nit korinakat, punn nitivontponnan nit korat."
25. Jeruzaleantlea kãi zannamnim mhollem: "Jivexim marunk sôdtat to monis ho nhoi?
26. Ani ho polle to sot'ten uloita ani te taka kãich mhonnonant! Ho khoreponnim Krist mhonn amchea vhoddilank kollon ailam kai?
27. Tori ho khõicho to ami zannonv; punn Krist ietolo Tednam, to khõicho to konnak kollchem na."
28. Dekhun Devmondirant xikoitana Jezun arddun mhollem: "Tumi Mhaka vollkhotat khorem? Ani Hanv khõicho ailam, tem-i tumi zannont? Khorem mhollear, Hanv Mhojêch osttongim ieunk na; Mhaka patthoila To sotevont, ani Taka tumi vollkhonant.
29. Hanv zalear Taka vollkhotam, kiteak Hanv Tachê thaun ailam ani Tannem Mhaka patthoila."
30. Te Taka dhôrunk sôdtale; punn konnench Tacher hat ghalunk na, kiteak Tacho vêll ozun pavunk naslo.
31. Tori loka modlea zaiteamnim Tacher bhavarth dovorlo; tim mhonnttalim: "Krist ietolo Tednam, hannem keleat tanchê-vôn odik chodd khunna kortolo kai?"
32. Tachê vixim futfutun lôk osleô gozali korta mhonn Farizevamnim aikolem. Mukhel iadnikamnim ani Farizevamnim Taka dhôrun haddunk chovkidarank patthoile.
33. Tednam Jezun mhollem: "Anink ilo vêll Hanv tumchê modem asam ani uprant Mhaka patthoila Tachê-xim vetam;
34. tumi Mhaka sôdtoleat, punn Hanv tumkam mellcho na. Hanv astolom thõi tumchean ieunk zaina."
35. Judevamnim ekamekak mhollem: "Amkam mellona zaunk ho khõi vochunk korta kai? Zõi videxiam modem amcho lôk ximpoddla, thõi videxiank xikovnn diunk vetolo kai?
36. Tumi Mhaka sôdtoleat ani hanv tumkam mellcho na, ani hanv astolom thõi tumchean ieunk zaina', oxem to mhonntta tacho ôrth kitem?"
37. Utsovachea nimannea ani dobajik disa, ubo ravun Jezun arddun mhollem: "Konnank zôr tan laglea, tãnnim Mhojê-xim ieunchem,
38. ani Mhojer bhavarth tthevtat tãnnim pieunchem. Povitr Pustok oxem mhonntta: 'Tachê bhitorleô jivea udkacheô zhori ghosghoxit vhanvtoleô.'
39. Jim konn Jezucher bhavarth tthevtolim aslim, tankam Atmo mellcho aslo, hachê vixim Tannem oxem mhollem. Jezu ozun mhoimevont zaunk naslo, dekhun Devan ozun Atmo diunk naslo.
40. Him utram aikun, kãi zannamnim mhollem: "Khorench ho êk provadi."
41. Dusreamnim mhollem: "Hoch to Krist." Punn heramnim mhollem: "Krist Galileiantlo ievpacho na, oxem nhoi?
42. Krist Davidachê sonstintlo ani Davidachea Bethlehem nograntlo ietolo mhonn Povitr Pustok sangina?"
43. Oxi Tachê vixim loka modem futt poddli.
44. Kãi zann Taka dhôrunk sôdtale, punn konnench Tacher hat ghalunk na.
45. Tednam chovkidar mukhel iadnikam ani Farizevam sorxim portun gele. Hãnnim tankam mhollem: "Tumi taka kiteak dhôrun haddunk na?"
46. Chovkidaramnim mhollem: "Ho monis uloita tê bhaxen kodinch konn ulounk na!"
47. Farizevamnim tankam zobab dilo: "Tumi-i fosovleat kitem?
48. Vhoddilantlea ani Farizevantlea konnem tori tacher bhavarth dovorlo mhonn asa?
49. Punn hi zat Xastrachi vollokh nasloli, xirap poddloli!"
50. Tanchê modlea eklean, Jezu-xim adim ail'lo tea Nikodeman, tankam mhollem:
51. "Eka mon'xachem poilem aikolea bogor, ani to kitem korta tachi vollokh ghetlea xivai, amchem Xastr tachi mon'subi korta zait?"
52. Tãnnim mhollem: "Tum-i bi Galileikar kitem? Chovkoxi korun polle ani eklo-i provadi Galileiantlo upzona mhonn tuka kollon ietolem."
53. Te ap-aplea ghora portole.
