1. Ani Jezu Zoitunanchea Dongrar gelo.
2. Ani bhov sokallim To novean Devmondirant ailo; sogllo lôk Tachê-xim zomlo ani bosun To tankam xikounk laglo.
3. Dhormxastriamnim ani Farizevamnim pordvarant sampoddlolê êkê bailek haddli ani modem ubi keli.
4. Tãnnim Taka mhollem: "Guruji, hi bail atanch pordvar korta thõich astana sampoddlea.
5. Xastrant Moizesan oslea bailank fatraun marunk amkam formailam. Tôr tum kitem mhonnttai?"
6. Jezuk Tachea zobabant dhôrun Tacher arôp manddchê khatir tãnnim oxem vicharlem. Voddôv ghalun Jezu Aplea bottan zomnir borounk laglo.
7. Ani te Tachê kodde vicharit ravle dekhun, ubo ravun Tannem tankam mhollem: "Tumchê modem zaka patok na, to ticher fatôr marunk poilo zauncho."
8. Anink êk pavtt voddôv ghalun To zomnir boroit ravlo.
9. Hem aikun, te soglle, eka fattlean êk , koddsorunk lagle; odik zannte te poile gele. Ekloch urlo Jezu ani modem, ubi asli thõich, ti bail.
10. Novean, nitt zaun, Jezun tika mhollem: "Bai, te khõi asat? Konnench tujer khastichem formonn marunk na mum?"
11. Tinnem mhollem: "Konnench na, Saiba." Ani Jezun mhollem: "Hanv-ui tuka atam guneanvkarnn mhonnona. Voch ani hea fuddem anink patok korum naka."
12. Uprant Jezun novean loka kodde uloun mhollem: "Hanv sonvsaracho Uzvadd. Mhozo pattlav kortat tim kallokhant cholchim nant, punn tankam Jivitacho Uzvadd astolo."
13. Tednam Farizevamnim Taka mhollem: "Tum Tujêch vixim govai dita; Tujê govaikek mol na."
14. Jezun portipall kelo: "Hanv Mhojêch vixim govai ditam zalear-ui, Mhoji govaiki osôl-khori; karonn Hanv khõicho ailam ani khõi vetam tem Hanv zannom; punn Hanv khõicho ailam ani khõi vetam tem tumi nokllot.
15. Tumi mon'xa soimbachê nodren mon'subi kortat; Hanv konnachich mon'subi korina.
16. Punn mon'subi korin zalear, Mhoji mon'subi osôl-khori; kiteak Hanv ekloch na: Zannem Mhaka patthoila to Mhozo Bap Mhojê borabôr asa.
17. Dogam mon'xanchê govaikek mol asa', oxem tumchea Xastrant boroil'lem asa.
18. Hanv Mhojêch vixim govai ditam, ani Zannem Mhaka patthoila to Mhozo Bap Mhojê vixim govai dita."
19. Tea pasot tãnnim Taka mhollem: "Tuzo bap? Khõi asa rê to?" Jezun zap diun mhollem: "Tumi Mhaka vollkhonant ani Mhojea Bapak-ui vollkhonant; tumi Mhaka vollkhol'lo zalear, Mhojea Bapak-ui vollkhotolim asleat."
20. Him utram Devmondirant xikoitana dhormdananchê pettê-xim To uloilo; punn Tacho vêll ozun pavunk naslo dekhun, konnench Taka dhôrlo na.
21. Anink êk pavtt Jezun tankam mhollem: "Hanv chol'lom, ani tumi Mhaka sôdtoleat ani tumchea patkant tumi mortoleat. Hanv vetam thõi tumchean ieunk zaina."
22. Judevamnim mhollem: " 'Hanv vetam thõi tumchean ieunk zaina',oxem to sangta mhonnttôch, to aploch jiv ditolo mhonn to sangunk sôdta kai?"
23. Tannem tankam mhollem: "Tumi sokoilim, Hanv voilo; tumi hea sonvsarantlim, Hanv hea sonvsarantlo nhoi.
24. Tumi tumchea patkamnim mortoleat mhonn Hanvem tumkam sanglam, kiteak ASA TO HANVUCH mhonn tumi bhavarth dhôrina zaxat zalear, tumchea patkamnim tumi mortoleat."
25. Tãnnim Taka mhollem: "Tum konn tôr?" Jezun tankam zobab dilo: "Poilinch thaun Hanvem tumkam sanglam Toch.
26. Tumchê vixim zaitem sangchem ani nivaddchem asa; punn Mhaka patthoila To sotevont, ani jem Hanvem Tachê koddsun aikolam tench Hanv sonvsarak sangtam."
27. To Bapachi khobor sangta mhonn tim somzunk nant.
28. Tea pasot Jezun mhollem: "Tumi Mon'xachea Putak ubartoleat Tednam, tumkam hem kolloni etolem, ki ASA TO HANVUCH. Ani Mhojêch osttongim Hanv kãi korina, punn zoxem Bapan Mhaka xikoilam toxem Hanv uloitam.
29. Ani Zannem Mhaka patthoila To Mhojê sovem asa; Tannem Mhaka eklo sanddunk na, kiteak Taka manta tench Hanv sodam kortam."
30. To oxem uloilo Tednam, zaiteamnim Tacher bhavarth dovorlo.
31. Apnnacher bhavarth dovorlo tea Judevank Jezun mhollem: "Tumi Mhojem utor tumchê bhitôr rigun dovorxat zalear, tumi khoreponnim Mhoje xis zatoleat.
32. Ani tumkam sot kollon ietolem ani sot tumkam svotontr kortolem."
33. Tãnnim Taka mhollem: "Ami Abrahamachi sonsôt, ani konnachinch gulamam ami kednanch zaunk nanv. 'Tumi svotontr zatoleat', oxem tum koso mhonnttai tôr?"
34. Jezun tankam portipall kelo: "Hanv tumkam sot sangtam, patok kortat tim patkachim gulamam.
35. Gulam' sodanch ghorabeant urona; put to sodanch ghorabeachoch.
36. Hea pasot Put zôr tumkam svotontr korit, tôr tumi khoreponnim svotontr zatoleat.
37. Tumi Abrahamachi sonsôt mhonn Hanv zannom; tori Mhojem utor tumchê bhitôr rigona dekhun, tumi Mhozo jiv kaddunk sôdtat.
38. Jem Hanvem Mhojea Bapa sovem dekhlam tem Hanv sangtam, ani jem tumi tumchea bapaichem aikolam tem tumi kortat."
39. Tãnnim Taka portipall kelo: "Abraham amcho bap." Jezun tankam mhollem: "Tumi Abrahamacheô put-dhuvô zal'leat zalear, jem Abrahaman kelem tem tumi kortolim asleat.
40. Punn Deva koddsun aikol'lem sot Hanvem tumkam sanglam, toriastana tumi Mhozo jiv kaddunk sôdtat. Abrahaman oxem korunk na.
41. Tumi kortat tim kamam tumchea bapaichim." Tãnnim Taka mhollem: "Kamcharan ami zolmak ieunk nanv; amkam ekloch Bap asa, to mhollear Dev."
42. Jezun tankam mhollem: "Dev tumcho Bap zal'lo zalear, tumi Mhozo môg kortolim asleat, kiteak Hanv Deva thaun upzolam ani ailam; Mhojêch khuxen Hanv ieunk na, punn Tannem Mhaka dhaddla.
43. Hanv sangtam tem tumi kiteak somzun ghenant? Kiteak Mhojem utor tumchean kanar gheunk zaina.
44. Tumcho bap devchar, ani tumchea bapaik zai tem korunk tumchi khuxi. Mudlak thaun to prann ghatki, to kednanch sotant riglo na, kiteak tachê sovem sot na. To lottikponnam sangta Tednam aplea soimba pormannem uloita, kiteak to fottkiro ani fottincho bapui.
45. Punn Hanv sot uloitam dekhunuch, tumi Mhojer bhavarth dovrinant.
46. Tumchê bhitorlo konn-ui Mhaka patok asa mhonn dakhoit? Hanv tumkam sot sangtam zalear, kiteak Mhojer tumi bhavarth dovrinant?
47. Jim konn Devachim, tim Devachim utram aikun ghetat; tumi Devachim nhoi dekhun, tumi tim aikun ghenant."
48. Judevamnim Taka portipall kelo: " 'Tum Samariekar ani tujer devchar bosla', oxem ami mhonnttanv tem sarkem zalem na?"
49. Jezun portipall kelo: "Mhojer devchar na, punn Mhojea Bapak Hanv man ditam ani tumi Mhaka beman kortat.
50. Tori Hanv Mhoji khaxachi vhoddvik sôdina; ti sôdtolo ani nit kortolo Eklo Konn asa.
51. Khorench khorem Hanv tumkam sangtam: jim konn Mhojem utor samballtat, tim kodinch morchim nant."
52. Judevamnim Taka mhollem: "Tujer devchar asa mhonn atam amkam sarkench koll'llem. Abraham melo ani provadi-i morun gele; ani tum amkam sangtai: jim konn mhojem utor samballtat, tim kodinch morchim nant!
53. Amcho bap Abraham morun gelo; tachê poros tum vhôdd kitem? Ani provadi-i morun gele. Tum apunn konn mhonn sangunk sôdtai?"
54. Jezun portipall kelo: "Hanv Mhojich vhoddvik korin zalear Mhoji vhoddvik kãich nhoi; Mhoji vhoddvik korpi Mhozo Bap asa, tumi tumcho Dev mhonnttat Toch;
55. tori tumi Taka vollkhunk na. Punn Hanv Taka vollkhotam; Taka vollkhona mhonn Hanvem mhonnlolem zalear, tumchê bhaxen Hanv-ui fottkiro zatolom aslom. Punn Hanv Taka vollkhotam ani Tachem utor samballtam.
56. Mhozo Dis polleunchê axen Abraham tumcho bap khuxal zalo; tannem to dekhlo ani taka khub anond zalo."
57. Tednam Judevamnim Taka mhollem: "Tuka ozun pon'nas vorsam zaunk nant, ani tunvem Abrahamak dekhloi?"
58. Jezun tankam portipall kelo: "Khorench khorem Hanv tumkam sangtam: Abraham aschê adim HANV ASAM!"
59. Dekhun tãnnim Tacher marunk fator ukôl'le; punn Jezu liplo ani Devmondirantlo bhair sorun gelo.
