1. Apunn Juanva poros odik, chodd xis korta, ani tankam snan dita, oxem Farizevanchea kanar poddlam mhonn Jezuk gomun ailem.
2. (Khorem mhollear, Jezu Apunnuch snan dinaslo, punn snan ditale te Tache xis.)
3. Tednam To Judeiantlo bhair sorlo ani portun Galileiant gelo.
4. Taka Samarientlean vechem poddtalem.
5. Sikar nanvachea Samariechea eka nogrant To pavlo; Jakoban aplea puta Juzek dil'lea xeta laginch hem nogor aslem.
6. Jakobachi bãi thõi asli, ani Jezu,cholun-cholun thoklolo dekhun, bãichea kanttar boslo. Sumar donpar zal'lo.
7. Samariechi êk bail udok kaddunk thõi aili. Jezun tika mhollem: "Mhaka ilem pieunk dixi?"
8. Tache xis jevnnak kitem-i gheunk mhonn nogrant gel'le.
9. Samariechê bailen Taka mhollem: "Tum Judêv ani hanv Samariekarn, tôr koso mhonn tum mhojê kodde pieunk magtai?" Khorem mhollear, Judêv lôk ani Samariekar lôk ekamekachim aidonam vaprinant.
10. Jezun tika portipall kelo: "Devachem dennem koslem tem tuka tôr gomlolem ani 'Mhaka ilem pieunk dixi?', oxem tuka mhonntta, To konn to tum zanno aslii zalear, tunch Tachê kodde magtoli aslii ani To tuka jivem udok ditolo aslo."
11. Bailen Taka mhollem: "Saiba, udok kaddunk tujê lagim xidi kãi na, ani bãi khôl asa; tôr tujê kodde jivem udok khõichem?
12. Amchea purvoza Jakoba poros tum vhôdd kitem? Tannem amkam hi bãi dili, apunn tichem udok pielo, toxench tachim bhurgim-ballam ani tache hindd."
13. Jezun tika mhollem: "Hem udok pietat tankam soglleank portun tan lagtoli,
14. punn Hanv diin tem udok pietit tankam kodinch tan lagchi na, Hanv tankam diin tea udkachi, tanchê bhitôr êk zhôr zatoli, ani ti tankam Sasnnik Jivit, diit vhanvtoli."
15. Bailen Taka mhollem: "Saiba, tem udok mhaka di, oxi mhaka anink tan lagchi na ani udok kaddunk hanga ieunk-ui poddchem na."
16. Jezun tika mhollem: "Voch, tujea ghovak apoun hadd ani hanga ie."
17. Bailen zap dili: "Mhaka ghôv na." Jezun tika portun mhollem: " 'Mhaka ghôv na', hem tunvem sarkem sangleim,
18. kiteak tuka panch asle ani tujea sangata atam asa to-i tuzo ghôv nhoi; hem tunvem sarkem sangleim."
19. Bailen Taka mhollem: "Saiba, Tum provadi mhonn mhaka koll'llem.
20. Amchea purvozamnim hea dongrar Devak bhôzlo, punn tumi Taka Jerusaleantuch bhôzunk zai mhonn sangtat."
21. Jezun tika mhollem: "Mhojem aik, bai: tumi hea dongrar zaum vô, Jeruzaleant zaum, Bapak bhôzchim nant, oslo vêll ieuncho zalo.
22. Tumi vollkhonant Taka bhôztat; ami zalear vollkhotanv Taka bhôztanv, kiteak taronn Judêv loka thaun ieta.
23. Punn oslo vêll ieta, khorench mhollear ho vêll pavlo, ki khore bhôzpi atmean ani sotan Bapachi bhokti kortole, kiteak mhollear oslech, bhôzpi Bap sôdta.
24. Dev Atmo, ani Tachea bhôzpiamnim, Taka atmean ani sotan bhozunk zai."
25. Bailen Taka mhollem: "Mesias -mhonngê Krist- ieuncho zalo mhonn hanv zanno. To ietolo Tednam amkam sogllem sangtolo."
26. Jezun tika mhollem: "Hanvuch to,tujê kodde uloitam to."
27. Teach vellar Tache xis thõi pavle. Ani êkê bailê lagim To uloita mhonn tankam ojap dislem, punn "tichem Tuka kitem zai?" vô "tichêkodde Tum kiteak uloitai?" oxem konnench vicharlem na.
28. Tednam ti bail udkacho kollso thõich sanddun nogrant geli ani lokak mhonnunk lagli: "Hanvem kelam titlem-i konn-eklean mhaka sanglam;
29. ieiat ani taka polleiat; hoch Krist zait kai?"
30. To lôk nograntlo bhair sorun Taka mellunk ailo.
31. Itlea mhonno-sôr xis Tachê kodde magtale: "Rabbi, jêv atam."
32. Punn Tannem tankam mhollem: "Mhaka jem khann-jevonn asa, tanchi tumkam vollokh na."
33. Dekhun xis ekamekak mhonnunk lagle: "Taka konnem jevunk haddun dilam kai?"
34. Jezun tankam mhollem: Zannem Mhaka pattoila Tachi khuxi korunk ani Tachem kam' sompadunk, hench mhojem khann-jevonn.
35. Char mhoine, uprant lunvnni', oxi tumchê modem, mhonn'nni asa nhoi? Hanv tumkam sangtam:,tumche dolle uklun polleiat, xetam zalim dhovim, lunvchim zalim!
36. Lunvtat tim apli mozuri ghetat ani Sasnnik Jivitak pik ektthãi kortat ani oxe vomp'pi ani lunvpi, borabôr sontostat.
37. Hanga hi mhonn'nni lagta: 'eklo vompta, dusro lunvta':
38. jea xetache koxtt tumi, kaddunk nant, tea xetant tumkam Hanvem, lunvunk dhaddleat; dusreamnim tache koxtt kaddleat, ani tanchea koxttanchea follant, tumkam bhag mell'lam."
39. "Hanvem kelam titlem-i tannem mhaka sanglam", oxi tê bailen govai dil'li dekhun, tea nograntlea puskoll Samariekaramnim Tacher bhavarth dovorlo.
40. Dekhun Samariekaram Tachê-xim ailim Tednam, apnnam-xim rav mhonn tãnnim Tachê kodde maglem; ani thõi To don dis ravlo.
41. Ani Tachea utrak lagun anink khub-khub zannamnim Tacher bhavarth tthevlo.
42. Tim bailek mhonnttalim: "Atam anink tujea utrank lagun nhoi, punn aminch Taka aikola dekhun ami bhavarth dhôrtanv, ani To khoroch sonvsaracho Tarôk mhonn amkam kollon ailam."
43. Thõi don dis ravlea uprant, Jezu Galileiak gelo.
44. Khõicheach provadiak aplea ganv ghora man mellona', oxi Jezunuch govaiki dilli.
45. Galileiantlo lôk Utsovak gel'lo; Jeruzaleant Utsovachea somoiar Jezun kel'lem tem sogllem tãnnim dekhlem; dekhun, To Galileiant ailo Tednam, tãnnim Taka boro ieukar diun ghetlo.
46. Mhonnttôch Tannem udkacho soro kel'lo tea Galileiachea Kana ganvant anink êk pavtt To ailo. Ani Kapernaumant eka razodhikariacho put piddent aslo.
47. Jezu Judeiak thaun Galileiant pavla mhonn aikun, to Taka mellunk gelo. Mornnachê tonnir pavlolea aplea putak boro korunk ie mhonn to Jezu lagim magtalo.
48. Jezun taka mhollem: "Khunna ani vismitam dekhlea xivai tumi bhavarth dhôrpak nant."
49. Raz-odhikarian Taka mhollem: "Saiba, mhozo bhurgo morchê adim ie."
50. Jezun taka mhollem: "Voch tum, tuzo put jivo asa." Jezuchea utracher bhavarth dovrun to monis aplê vattek laglo.
51. To vatter astananch, tache chakor taka mellunk aile, ani tacho put jivo asa mhonn tãnnim taka sanglem.
52. Dekhun khõichea vogtar taka borem dislem kai mhonn tannem tankam vicharlem. Tãnnim taka sanglem: "Kal, don'parchea eka voracher tacho zôr gelo."
53. Jea vellar Jezun apnnak "tuzo put jivo asa", oxem mhonnlolem, teach vellar hem ghòddlem mhonn bapaik gomun ailem; dekhun tannem ani tachea ak'khea ghorabean Jezucher bhavarth tthevlo.
54. Judeiantlo Galileiant portun ietôch hi Jezun kel'li dusri khunna.
