1. Hachê uprant, Judevancho êk Utsôv aslo ani Jezu Jeruzaleak choddun gelo.
2. Jeruzaleak, Xellianchê Tolliek tenkun, êk bandavôll asa; Hebrêv bhaxen tika Bethsaida mhonnttat; tika panch tarangnnam asat.
3. Thôi kudd'ddim, thonttim, aren dhòrlolim, oslim khub piddevontam poddlolim astalim; [tim sogllim udok haltolem mhonn ravtalim.
4. Kiteak Sorvesporacho dut kedna kedna tollient denvtalo ani udok haloitalo; udok haltôch zo konn heram adim udkant bhitôr sortalo, to koslê-i piddentlo boro zatalo.]
5. Thõi êk monis aslo, tachê piddek atthtis vorsam zal'lim.
6. Jezun taka add poddlolo dekhlo ani, to thõi zaito kall oslê gotir aslo mhonn zanno zaun, taka mhollem: "Tum boro zaunk sôdtai?"
7. Piddevontan Taka zap dili: "Saiba, udok halta Tednam mhaka tollient ghalunk mhozo konn na, ani hanv vetam mhonnosôr, dusro ieun apunn mhojê fuddem denvta."
8. Jezun taka mhollem: "Utth, tujem antrunn ukôl ani chol."
9. Ani teach vellar to boro zalo ani aplem antrunn uklun cholunk laglo. To dis Son'var aslo.
10. Dekhun, boro zal'lea mon'xak Judevamnim mhollem: "Aiz Son'var, tujean antrunn uklum nozo."
11. Tannem tankam zap dili: "Zannem mhaka boro kela, tannem mhaka oxem mhollem: 'tujem antrunn ukôl ani chol.' "
12. Tãnnim tachê kodde vicharlem: " 'Tujem antrunn ukôl ani chol,' oxem tuka mhollem to monis konn?"
13. To konn to boro zal'lo monis nokllo aslo; kiteak thõi ji lokachi lutt zal'li, tichê modem Jezu nanch zal'lo.
14. Uprant to Jezuk Devmondirant mell'lo, ani Jezun taka mhollem: "Polle, tum atam boro zaloi; anink patok korinaka, na tôr tuka anink kitem-i paxtt zait."
15. To monis gelo ani apnnak boro kela to Jezu mhonn tannem Judevank sanglem.
16. Ani Jezu osleô vostu Son'vara disa kori dekhun, Judev Tachê pattlean laglole.
17. Jezun tankam mhollem: "Mhozo Bap ozun porian vavr korit asa, toso Hanv vavr korit asam."
18. Hea pasot Judev odikuch Taka jivexim marunk sôdtale; karonn, To nhoich Son'var môddtalo, punn Devak Aplo Bap mhonnun, Apnnakuch Deva sarko kortalo.
19. Jezun tankam mhollem: "Khorench khorem Hanv, tumkam sangtam: Apnnachêch osttongim, Putachean, kãich korunk zaina; punn Bap korta mhonn jem, To polleta, tench To korunk xokta; ani jem Bap korta tench, Put-ui korta.
20. Karonn Bap Putacho môg korta, ani Apunn korta titlem-i, Putak dakhoita; ani tumi ojap zaunchê khatir, hanchê-vôn vhodd kortutvam, To Taka dakhoitolo.
21. Zoso Bap mel'leank utthoita, ani tankam Jivit dita, tosoch Put Apnnak zai, tankam Jivit dita.
22. Bap konnachich mon'subi korina, punn Tannem mon'subi, korcho sogllo odhikar, Putachea hatant dila.
23. Jim konn Putak mandinant, tim Taka dhaddla, tea Bapak mandinant. Zoso Bapak man ditat, tosoch Putak soglleamnim, man diuncho mhonn,
24. Khorench khorem Hanv, tumkam sangtam; jim konn Mhojem utor aikotat, ani Mhaka dhaddla, Tacher bhavarth dovortat, tanchê sovem Sasnnik Jivit asa; osleank anink khastichem, formonn na, punn tim mornnantlim, Jivitak utorlim.
25. Khorench khorem, Hanv tumkam sangtam: mel'lim mon'xam Devachea, Putacho tallo aikotolim, ani jim konn to aikotat, tankam Jivit melltolem, oslo vêll ieuncho zalo -hoch to vêll!
26. Karonn, zoxem Bapak Jivit, Apnnachêch sovem asa, toxench Putak-ui Jivit, Tachêch sovem aschem mhonn, Bapan Taka dennem kelam,
27. ani mon'subi korchi, Taka podvi dilea, kiteak To Mon'xacho Put.
28. Hachê vixim ojap zaum nakat: somadhimnim asat tim sogllim, Tacho tallo aikun, tantlim bhair sortolim:
29. zãnnim borem kelam tim, Jivit bhôgunk, ani zãnnim vaitt kelam tim, khast sõsunk ut'thtolim, oslo vêll ieuncho zalo!
30. Mhojêch podven, Mhojean kãich korunk zaina; zoso Hanv aikotam toso, Hanv nirnnoi ditam; ani Mhozo nirnnoi niticho, kiteak Hanv Mhoji khuxi nhoi, punn Mhaka patthoila Tachi, khuxi korunk sôdtam.
31. Hanvuch Mhojê vixim govai, diin zalear, Mhojê govaikek mol na.
32. Mhojê vixim govai ditolo, Dusro Konn asa, ani ji govai To Mhojê vixim dita, tika purnn mol asa mhonn, Hanv zannom.
33. Tumi tumchea niropiank Juanva-xim pattoile, ani tannem sota vixim govai dili.
34. Hanv mon'xanchê govaikecher dhòrlolo na; punn Hanv oso uloitam zalear, tumchea taronna pasot uloitam.
35. Juanv êk zollti ani loklokit ponntti zaun aslo ani tachea uzvaddak ilo vêll murgottunk tumkam borem dislem.
36. Punn Mhaka asa ti govaiki Juanvachê govaikê poros vhôdd: jim kamam Bapan Mhaka sompadunk dileant Hanv kortam tinch kamam Bapan Mhaka patthoila mhonn Mhojê vixim govai ditat.
37. Bapan Mhaka patthoila ani Tannench Mhojê vixim govai dilea. Tacho tallo tumi kodinch aikunk na, Tachem rup-ui tumi kodinch polleunk na,
38. ani Tacho Sôbd tumchê bhitôr riglolo na, kiteak Zaka Tannem dhaddla Tacher tumi bhavarth tthevinant.
39. Dhormxastrachea borovpamnim Sasnnik Jivit asa mhonn somzun, tumi tim chit ghalun xiktat; khorem mhollear tinch Mhojê vixim sakxi ditat;
40. toripunn tumkam Jivit mellchê khatir Mhojê-xim ieunk tumi rajinant.
41. Mon'xancho zo man Mhaka mellot, tachi Hanv porva korich na.
42. Punn Hanv tumkam pok'kim vollkhotam: Devacho môg tumchê sovem nanch.
43. Mhojea Bapachea nanvan Hanv ailam, tori tumi Mhaka manun ghenant; dusro konn apleach nanvan ailo tôr, taka tumi manun ghetoleat.
44. Tumkam bhavarth koso asum-iet? Kiteak mhollear tumi ekamekacho man gheun khuxi zatat, punn ekleach Deva koddcho zo man ieta tachi tumi porva korich nant
45. Bapa mukhar Hanv tumkam lavun ditolom mhonn somzum nakat; Moizesacher tumi bhorvanso dovortat, tôr toch Moizes tumkam lavun ditolo.
46. Tumi Moizesacher bhavarth dovorlolo zalear, Mhojer-ui tumi bhavarth dovortolim asleat, karonn tannem boroilam tem Mhojê vixim boroilam.
47. Punn tachea borovpancher tumkam bhavarth na zalear, Mhojea utrancher koso mhonn tumkam bhavarth asum-iet?"
