1. Oxem uloilea uprant, Aple dolle sorgak lavun Jezun mhollem: "Bapa, vêll pavlo: Putan Tuka mhoima diunchê pasot, Tujea Putak mhoimevont kôr.
2. Tunvem Taka dillea somestank Tannem Sasnnik Jivit diunchê khatir, ak'khea mon'xakullacher Tunvem Taka odhikar dilai.
3. Tuka, ekleach khorea Devak, ani Zaka Tunvem patthoilai tea Jezu Kristak vollkhun ghevop", hench tem Sasnnik Jivit.
4. Hanvem Tuka prithumecher mhoima dili; Tunvem Mhaka korunk dil'lem kam Hanvem sompadlem.
5. Atam, Bapa, sonvsar aschê adim ji Mhaka Tujea sangata mhoima asli, têch mhoimen Mhaka bhôr.
6. Sonvsarantle kaddun Tunvem Mhaka dileai tea mon'xank Hanvem Tuka vollkhunk pavoile; te Tuje asle, ani Tunvem te Mhaka dilei, ani tãnnim Tujem utor samball'lam.
7. Jem sogllem Tunvem Mhaka dilãi tem Tujê koddsun ieta mhonn atam tankam koll'llem.
8. Ji xikovnn Tunvem Mhaka dileai ti Hanvem tankam dilea, ani tãnnim ti manun ghetlea, ani Hanv Tujê-sun ailam mhonn tãnnim khoreponnim vollkhun ghetlam; ani Tunvench Mhaka patthoilai mhonn tãnnim bhavarth dhôrla.
9. Tanchê pasot Hanv magtam; sonvsara pasot magina, punn Tunvem Mhaka dileai tanchê pasot magtam, kiteak te Tuje.
10. Jem Mhojem tem sogllem Tujem, ani jem Tujem tem sogllem Mhojem; ani tanchê vorvim Mhaka mhoima mell'lea.
11. Ani atam Hanv anink sonvsarant na, punn te sonvsarant asat, ani Hanv Tujê-xim ietam. Povitr Bapa, Tunvem Mhaka dileai te Amchê vori êk zaunchê khatir, tankamTujê Nanvim samball.
12. Tanchê sangatim astana, Tunvem Mhaka dileai tancho Tujê Nanvim Hanv samball kortalom. Hanvem tankam rakhle, ani Povitr Pustokantlem utor khorem zaunchê khatir, zachem nisontton zaunk zai aslem taka ekleakuch bhairaun, tanchê bhitorlo konnuch ibadd zalo na.
13. Punn atam Hanv Tujê sorxim ietam, ani Mhozo sontôs tankam sopurnnaien mellchê pasot, ozun sonvsarant astana heô vostu uloitam.
14. Hanvem Tujem utor tankam dilam; ani zoso Hanv sonvsaracho nhoi, toxe te-i sonvsarache nhoi dekhun, sonvsar tancho dvês korta.
15. Tum tankam sonvsarantle kadd mhonn Hanv magina, punn Noxtteachea hatantle tankam rakh mhonn magtam.
16. Zoso Hanv sonvsaracho nhoi, toxe te-i sonvsarache nhoi.
17. Sota vorvim tankam sonvskarlole kôr: Tujem utor sot.
18. Zoxem Tunvem Mhaka sonvsarant patthoilai, toxench Hanvem-i tankam sonvsarant pattoileat.
19. Ani te sota vorvim sonvskarlole zaunchê khatir, tanchê pasot Hanv Mhakach sonvskartam.
20. Hanv magnnem kortam tem hanchêch pasot nhoi, tôr jim konn tanchea utra vorvim Mhojer bhavarth dovortolim, tea-i mon'xam pasot.
21. Tim sogllim êk zaum. Zoxem Tum, Bapa, Mhojê sovem asai ani Hanv Tujê sovem asam, toxench tim-i Amchê sovem êk zaum, ani, hê porim, Tunvem Mhaka patthoilai mhonn sonvsar bhavarth dhôrum.
22. Zoxem Ami Êk, toxim tim êk zaunchê khatir, Tunvem Mhaka dileai ti mhoima Hanvem tankam dilea.
23. Hanv tanchê sovem ani Tum Mhojê sovem asun tim sopurnnaien êk zaum; oxem, Tunvem Mhaka patthoilai mhonn, ani zoso Tunvem Mhozo môg kelai, tosoch Tunvem tancho môg kelai mhonn sonvsar vollkhun gheum.
24. Bapa, zõi Hanv asam, thõi Tunvem Mhaka dileãi tim-i aschim mhonn Mhoji khuxi, ani oxem Tunvem Mhaka dileai ti mhoima tãnnim polleunchi, kiteak sonvsar roch'chê adim Tunvem Mhozo môg keloi.
25. Nitivont Bapa, sonvsaran Tuka vollkhun gheunk na, punn Hanv Tuka vollkhotam ani Tunvem Mhaka patthoilai mhonn hãnnim vollkhun ghetlam.
26. Hanvem tankam Tuji vollokh dilea ani ozun ditolom; hê porim, jea mogan Tunvem Mhozo môg kelai toch môg tanchê sovem astolo; ani Hanv-ui tanchê sovem astolom."
