1. Oxem uloitôch, Jezu Aplea xisam sangatim Kedron vhallachê poltoddi gelo. Thõi êk bag asli; tantum To Aplea xisam borabôr bhitôr sorlo.
2. Ghatki Judas-ui ho zago vollkhotalo, kiteak sobar pavtti Jezu thõi Aplea xisam borabôr vocho.
3. Soinikancho êk zomo gheun ani mukhel iadnikamnim ani Farizevamnim dhaddlolea chovkidarank haddun, Judas ailo: divttiô, uzvaddiô ani ostram-xostram gheun te thõi pavle.
4. Tednam Jezu, Apnnak kitem ghòddtolem aslem tem sogllem zanno zaun, fuddem sorlo; Tannem tankam mhollem: "Konnak sôdunk aileat tumi?"
5. Tãnnim Taka zobab dilo: "Nazaretkara Jezuk." Jezun tankam mhollem: "Hanv to." Ghatki Judas tanchê borabôr ubo aslo.
6. Jednam Tannem Hanv to mhollem, Tednam te pattim sorle ani zomnir xevttole.
7. Novean Tannem tanchê kodde vicharlem: "Konnak sôdunk aileat tumi?" Ani tãnnim mhollem: "Nazaretkara Jezuk."
8. Jezun portipall kelo: "To Hanv mhonn Hanvem tumkam sanglem; mhonnttôch, tumi Mhaka sôdunk aileat zalear, hankam vochum-di."
9. Oxem Tannem mhonnlolem tem utor ghoddon ieunk zai aslem: 'Tunvem Mhaka dileai tanchê bhitorlea ekleak legun Hanvem ibadd zaunk diunk na.'
10. Simanv Pedru kodde êk torsad asli, ti tannem bhair kaddli, ani porom-iadnikachea chakracher marun tacho uzvo kanuch katorlo. Tea chakrachem nanv Malku.
11. Jezun Pedruk mhollem: "Tuji torsad poteant ghal; Bapan Mhaka dilam tem patr Hanvem pieunchem nhoi?"
12. Soinikanchea zomean, tanchea sordaran ani Judevanchea chovkidaramnim Jezuk dhôrlo ani bandlo.
13. Tãnnim Taka poilo An'nasager vhelo kiteak to Kaifasacho, tea vorsachea porom'-iadnikacho, sasro aslo.
14. Porjê khatir eklo monis melear odik faideachem mhonn Judevank budh dil'li to hoch Kaifas.
15. Simanv Pedru ani dusro eklo xis Jezu pattlean gele. Ho xis, porom'-iadnikachê vollkhicho aslo dekhun, Jezu borabôr porom'- iadnikachea angnnant bhitôr sorlo,
16. punn Pedru dara bhair ravlo. Porom'-iadnikachê vollkhicho aslo tea dusrea xisan dar-rakhnnê kodde utor ghalem ani Pedruk bhitôr kaddlo.
17. Dar-rakhônn kortalem tea cheddvan Pedruk mhollem: "Tum-i hea mon'xachea xisantlo nhoi?" Tannem mhollem: "Hanv nhoi."
18. Itlea mhonnosôr, hinv khatalem dekhun, kollxeancho dhogtto kel'lo tachê bhonvtim ravun chovkidar ani chakram xektalim; Pedru-i tanchê borabôr ubo aslo ani xektalo.
19. Porom'-iadnik, Jezuk kãi vichar ghalun, Tachea xisam ani xikovnnê vixim Tachi chovkoxi korunk laglo.
20. Jezun taka zobab dilo: "Hanv sobhêmazar spoxtt uloilam; sodanch Hanvem devsthanant ani Devmondirant, sogllo Judêv lôk ektthãi zata thõi, xikovnn dilea; guptim Hanv kitench ulounk na.
21. Mhojê lagim kiteak vichartai? Hanvem kitem mhollam tem Mhaka aikolam tanchê lagim vichar; Hanvem sanglam tem tim borim zannont."
22. Tannem oxem mhonnona fuddem, thõi ubo aslolea eka chovkidaran Jezucher thapott marlem ani mhollem: "Porom'-iadnikak tum oso zobab ditai?"
23. Jezun oxi zap dili: "Hanv vankddem uloilam zalear, vankddem kitem tem dakhoi; punn zôr Hanv sarkem uloilam, zalear kiteak mhonn tum Mhaka martai?"
24. Tednam An'nasan Taka bandun Kaifas porom'-iadnikager pattoilo.
25. Simanv Pedru ozun thõi ubo aslo ani xektalo. Tãnnim taka mhollem: "Tum-i tachea xisantlo nhoi?" Tannem na mhollem: "Hanv nhoi."
26. Porom'- iadnikachea eka chakran Pedruk mhollem: "Arê! hanvem tuka tachê borabôr bagent polleunk nam rê?" (Ho chakôr Pedrun kan katorlolo tacho soiro aslo).
27. Pedrun anink êk pavtt na mhollem, ani tednanch kombean sad ghalo.
28. Sokall zatôch tãnnim Kaifasager thaun Jezuk nitixallent vhelo. Apunn battona zaunk, punn apnnank Pask-Jevonn korunk mellchê khatir, te nitixallent bhitôr gele nant.
29. Dekhun Pilatan apunnuch tanchê-xim bhair ieun mhollem: "Hea mon'xacher tumi koslo arôp gheun aileat?"
30. Tãnnim taka zobab dilo: "Ho monis noxtto nhoi aslo zalear, ami taka tujê adhin korche nasleanv."
31. Pilatan tankam mhollem: "Tumich taka vhorat ani tumchê Somurti pormannem tachi nit korat. " Judevamnim taka mhollem: "Amchean konnachoch jiv kaddum nozo."
32. Apunn koso mortolo aslo, hachê vixim jem Jezun sangun dovorlolem, tem khorem zaunchê khatir oxem ghòddlem.
33. Pilat novean nitixallent gelo ani Jezuk apoun tannem Taka vicharlem: "Judevancho raza tum?"
34. Jezun portipall kelo. "Hem tum tujêch osttongim mhonnttai vô dusreamnim tuka Mhojê vixim oxem sanglam?"
35. Pilatan mhollem: "Hanv Judêv tôr? Tujeach lokan ani mukhel iadnikamnim tuka mhojê adhin kela. Kitem kelãi tôr tunvem?"
36. Jezun portipall kelo: "Mhojem raj hea sonvsarantlem nhoi; Mhojem raj hea sonvsarantlem zal'lem zalear, Hanv Judevanchea hatant poddona zaunk Mhoje sevok zhuztole asle; punn Mhojem raj hangasorlem nhoi."
37. Pilatan Taka mhollem: "Mhonnttôch, raza tum?" Jezun zobab dilo: "Hanv Raza mhonn tunvench sangleim. Heach pasot Hanv zolmolam, heach pasot sonvsarant ailam: sotak govai diunk. Jim konn sot manun gheunk toiar asat, tim Mhozo tallo aikotat."
38. Pilatan Taka vicharlem: "Sot mhonngê kitem?" Oxem uloun, novean Judevam sorxem bhair vochun, tankam mhollem: "Mhaka tacho kosloch guneanv mellona.
39. Punn Paskachea somoiar hanvem ekleak suttka dil'li tumkam zai?"
40. Tãnnim porot bob marun mhollem: "Haka sôddinaka, punn Barab'basak!" (Barab'bas mhollear êk pundd aslo.)
