1. Kristachea ekvottant asun hanv sot uloitam, fôtt sangina; Povitr Atmean uzvaddailolem mhojem ontoskornn-ui mhaka govai dita:
2. jim masa-rogta pormannem mhojêch porjechim, tea mhojea bhavam-bhoinnim pasot mhaka êk vhôdd khônt asa, ani thar dina tosli dukh mhojea kallzant.
3. Dekhun, tankam upkarot zalear, Devacho xirap mhojer poddun mhakach Krista thaun tôddun kadd mhonn hanv magtalom.
4. Tim Israelkaram, tankam Devan Aplim bhurgim korun ghetleant ,tankam Aplê mhoiment vantto dila, tanchê lagim korar keleat; Somurt tanchea hatant ghalea, Devachi bhozônn tankam xikoilea, ani tankam bhasavnniô keleat;
5. porzapoti tanche, ani tanchê thaun rogta-masa pormannem Krist utpon zala: To sogtta-sorvam poros vorto Dev, Taka sasnnachea-sasnnak vakhann'nni! Amen!
6. Devan dil'lem utor varear ubon gelem mhonn hanv sangunk sôdina. Zolman Israelachê kulliechim sogllim khori Israel porza nhoi.
7. Toxench Abrahamachê sonstichim titlim-i tacheô put-dhuvô nhoi, punn "Izaaka vorvim tujê sonstik tujem nanv melltolem."
8. Mhonngê masa-rogta pormannem zolmol'lim bhurgim Devachim bhurgim nhoi, punn bhasavnnê pormannem zolmol'lim bhurgim ki khori sonsôt mhonn lekhon ietolim.
9. Kiteak bhasavnni hea utramnim kel'li asa: "Heach somoiar Hanv portun ietolom ani tednam Sarak bhurgo zatolo."
10. Anink-ui asa: Rebek'ka dogam zonvllea putank kusveant samballun asli: te ekach bapaiche ,amchea purvoza Izaakache.
11. Te zolmunchê adim ani tãnnim kitench borem vô vaitt korchê adim, Devan tika mhollem: "Vhoddlo bhav dhaktteachi chakri kortolo." Tôr hem kitem dakhoita?
12. Jednam Dev konn-eklea mon'xak vinchun kaddta, tednam vinchloleacheô kornniô Dev pollena, fokot thir urta apoitolea Devacho sonkôlp.
13. Hench dakhoun, Povitr Pustokar oxem boroi'llem asa: "Jakobacho Hanvem môg kelo, punn Ezaucho Hanvem dvês dhôrlo."
14. Tôr kitem mhonnchem? Dev onit korta mhonn sangchem? Na tem na!
15. Tôr Moizesak Tannem oxem sanglem: "Mhaka zai tankam Hanv doia dakhoitolom, ani Mhaka zai tanche Hanv churchure dhôrtolom."
16. Mhonnttôch mon'xam kitlim axetat vô proitn korun kitlim khorxetat, hacher kãich dhòrlolem na, sogllem fokot Devachê doiallaiecher dhòrlolem asa.
17. Tôr Povitr Pustok Faraohk sangta: 'Tujê sorim Mhoji podvi dakhounchê khatir ani Mhojem Nanv sogllea sonvsaracher porgôtt zaunchê pasot, Hanvem tuka mud'dom' upzoila."
18. Mhonnttôch Apnnak zai tanche To churchure dhôrta ani Apnnak zai tanchem kalliz To nibor korta.
19. Toxem zalear, tum mhaka mhonnxi: "Koso tôr Tachean konnachoch guneanv korum-iet? Konnachean Tachê khuxecher add vochunk zata?"
20. Mon'xa, Deva lagim vad korunk tum konn ga? Ek matiechem aidon apnnak kel'lea kumbharak "Tunvem mhaka oxem kiteak kelãi?", oxem vicharit?
21. Êkêch matiechem ek aidon kherit somoiar vaprunk ani dusrem sadharonn upeogak korunk kumbharak aplê matiecher sot'tia na kitem?
22. Devan kelam tem-i toxench. Aplo krôdh dakhounk ani Apli podvi porgôtt korunk Tachi khuxi asli. Dekhun, Aplea krodhachim hatiaram kelea uprant, zancho To nas korunk sôdtalo, tankam Tannem tokôs kaddun sõslim.
23. Dusrê vatten, Aplê mhoimechi girestkai dakhounk sôdtalo dekhun, amkam Tannem adinch thaun Aplê mhoimek toiar kelim ani heach pasot Apli doiallai amkam bhôgunk dili.
24. Ami ti Tannem apoiloli porza, fokot Judêv lokantli nhoi punn videxi-i lokantli.
25. Hoseachea pustokar Toch oxem mhonntta: "Mhoji porza nhoi asli tika mhoji porza mhonnttolom: Ani Mhoji mogachi nhoi asli tika: Mhoji mogachi mhonnttolom!"
26. "Ani zõi tankam Hanvem mhonnlolem: 'Tumi Mhoji porza nhoi!', teach zagear tankam lôk oxem pachartolo: 'Him jivea Devachim bhurgim!' "
27. Ani Israela vixim Izaias oso aroddta: "Israelachea bhurgeanchi sonkia vellechê renvê itli zait zalear-ui, fokot eka urlolea zomeak soddvonn melltoli,
28. kiteak veginchê vegim Sorvespor Aplem xikxechem formonn prithumecher sadhun haddtolo to haddtoloch."
29. Izaiasan toxench bhakit korun sanglem: "Dolbharanchea Sorvesporan amchê modlea thoddea zannank rakhun dovrunk naslim zalear, ami Sodoma sarkim zavpachim, Gomorra bhaxen ami zaun vochpachim."
30. Mhonnttôch, ami kitem mhonnchem? Itlench: mon'xank promannik korta tem Devachem doiallaiechem nitivontponn videxi raxttram sôdinaslim; punn tem tankam bhavartha vorvim mell'llem.
31. Portem, Israel-porza apunn Devak manovloli zaunchea monan kaide palltali, punn oxem korun ti Devak manovloli zaunk pavunk na.
32. Kiteak na? Kiteak ti bhavarthacher nhoi, punn apleanch kornniancher patietali. Add-khôll zaunk Devan tanchê vatter ubo kel'lea fatrak adllon tim poddlim.
33. Povitr Pustokar oxem boroilolem asa: "Polleiat, Sionant Hanv lokachê vatter addkhôll zaupacho êk fatôr ubo kortam, mon'xam adllon poddtat toslo fatôr; punn tacher bhavarth dovortat tim lojek sampoddchim nant."
