1. Ami zôr ghott asanv, osokt asat tancheô osoktaiô sõsun gheunk amcho kaido; amchich khuxi ami korchi nhoi.
2. Bhavam-bhoinnink bhavarthant ghott korchê khatir tankam kitem borem tem polleun, zonn-eklean dusreank man'ta tem korchem.
3. Tôr Kristan-ui Apnnakuch man'ta tem korunk sôdlem na. Portench zalear, Povitr Pustokar boroilolem hem utor Tachea jivitant khorem zalem: "Tuka kênddtat tancheô kênddnniô mhojer poddleô."
4. Jem sogllem adim boroun dovorlam, tem amcho bhorvanso upzounk boroilam, kiteak Povitr Pustokar boroilolem asa tem amkam thir ravunk xikoita ani dhir dita.
5. Sõsnnikaiecho ani ghottaiecho Dev tumkam tumchêch modem, Jezu Kristachi dêkh gheun, eka monachim korum;
6. oxem tumi eka kallzan ani eka tallean Devak, amchea Somia Jezu Kristachea Bapak, vakhannunk pavtoleat.
7. Mhonnttôch, zoxem Kristan tumkam moipasan lagim haddleant, toxench, Devak mhoima diunchê pasot, tumi-i ekameka thãi moipaxi zaiat.
8. Hôi, hanv tumkam sangtam: porza potink kel'leô bhasavnniô visvaxiponnan pallchê khatiruch nhoi, bogor videxiamnim Devak Tachê doiallaiê pasot vakhannchê khatir, Krist sunôt kel'lea Judevancho chakôr zalo. Tôr Povitr Pustok sangta: "Hea pasot raxttram modem Tuka nanvaddtolom, Tujea Nanvachea manak stotram-gitam gaitolom."
10. Ani dusrea eka zagear oxem sangta: "Raxttramnô, Tachê porjê borabôr anondbhorit zaiat."
11. Ani anink êkê kodden oxem sangta: "Somest raxttramnô, Sorvesporak vakhannat; sorvoi porzamnô, Taka nanvaddat."
12. Tea bhair, Izaias oxem mhonntta: "Jes'sechem Pall ubem zatolem, raxttrancher odhikar cholounk To dixtti poddtolo: Tacher raxttram aplo bhorvanso dovortolim.
13. Bhorvanso dita to Dev tumchea bhavarthant tumkam anondan ani xantin bhorum; oxem Povitr Atmeachea bollan tumcho bhorvanso odik-odik vaddot vochum.
14. Mhojea bhavam-bhoinnimnô, tumchê vixim mhaka mhojea monant kosloch dubav na: tumi khorench borim mon'xam, bhavarthachi sarki vollokh tumkam asa, ani dekhun tumchean ekamekak budh diunk zata.
15. Tori astana, tumkam novean ugddas korunk, Devan mhaka hem dennem dilam mhonnun thoddê kodden kalljidarponnan hanvem tumkam boroilam.
16. Hem tem Devan mhaka dil'lem dennem: Tannem mhaka videxiam modem Jezu Kristacho muniari kela: mhonngê iadnik zaun, Xubhvortoman porgôttchem muniarponn hanv choloitam, ani oxem videxianchem somorponn Devak man'ta toslem ani Povitr Atmean sonvskarlolem zaunk pavta.
17. Dekhun, hanv Deva pasot vavurlam tê vixim, Jezu Kristachea ekvottant mhaka obhiman bhôgunk nimit asa.
18. Videxiank Devak khaltim korunk mhojea utram ani kornniam vorvim jem Kristan kelam tachi mat khobor hanv dhir dhôrun sangtam:
19. mhojê udexim Tannem vhodd-vhodd khunna ani vismitam kelim ani mhojê sovem Devachea Atmeachi xokti fankoili. Oxem Jeruzaleak thaun Ilirikuma porian bhonvun kaddun Kristachea Xubhvortomanachi hanvem zata titli porgôttnni keli.
20. Punn zõi Kristachem Nanv porgôtt zalam, thõi hanvem Xubhvortoman porgôttchem nhoi: ho nêm' hanvem obhimanan dhôrlo, kiteak dusrean ghal'lê buniadicher bandunk mhaka khuxi nasli.
21. Oxem Povitr Pustokantlem utor khorem zata: "Zankam Tachi khobor porgôtt zaunk na, tim Taka polletolim; ani zãnnim Tachê vixim aikunkuch na, tim somzotolim."
22. Heach pasot tumchê thãi vochunk sobar pavtti sôdun-ui, mhaka ozun porian zalem na.
23. Punn atam hea ganvamnim ravunk mhaka anink nimit na; ani sobar vorsam thaun tumchê sorxem vochunk axa dhôrun aslom
24. dekhun, Ispaniek hanv vochon tednam, vatter tumkam bhett diunk sôdtam. Ani tumcho sangat thoddo vêll bhôglea uprant, fuddem vochunk tumi mhaka adar ditoleat mhonn ravtam.
25. Punn atam, Jeruzaleant astolea Devachea bhoktanchi seva korunk hanv thõi vochunk asam.
26. Jeruzaleachea Devachea bhoktam modem gorib-dubllim asat tanchê pasot êk bhavponnachi vorgonni zomoun dhaddunk Masedoniek ani Akaient aslolea Povitr Sobhamnim udar monan tharailam.
27. Hôi, oxem hãnnim ap-khuxen tharailam, punn khorem mhollear tim tanchea rinnant asat; kiteak tanchea atmik denneamnim bhavarthi videxiank vantto mell'lla mhonnttôch, hea sonvsarachea denneamnim tankam bhavponnan modôt korun videxi bhavarthi ek rinn farik kortat.
28. Hem kam' sompoitôch ani zoma kel'li ani mhozo xik'ko asloli ak'khi vorgonni tanchea hatant dilea uprant, hanv tumchê vatten sorun Ispaniek vetolom.
29. Tumchê-xim ietolom tednam, Kristachea axirvadachi bhorti gheun pavtolom mhonn mhaka khatri asa.
30. Bhavam-bhoinnimnô, mhojea vangdda ravun ani khotkhotit magnneamnim Devak vinoti korun mhaka tumi samballat. Amchea Somia Jezu Kristachea nanvan, ani Povitr Atmo kallzamnim ghalta tea moga pasot, oso hanv tumkam ulo kortam.
31. Judeiant ravtat ani amcho bhavarth manun ghenant tea Judevanchea hatantlo hanv suttom mhonn ani Jeruzaleant hanvem korchi asa ti seva Devachea bhoktank manom mhonn magat.
32. Tedna, Devachi khuxi zalear, tumchê sorxem khuxalkaien ietolom ani tumchê sangatim mhozo jiv somadhan zatolo.
33. Xanti dita to Dev tumam-somestam sovem asum. Amen.
