1. Rogta-masa pormannem amchea purvoza Abrahama vixim ami kitem mhonnchem?
2. Zôr aplea kornniam udexim Abraham' promannik zalo, tôr tannem boddai dakhoum-iet, punn Deva mukhar nhoi.
3. Tôr Povitr Pustok kitem sangta? "Abrahaman Devacher bhavarth dovorlo ani, hea tachea bhavarthak lagun, taka Devan Apnnak manovlolo kelo."
4. Apnnem kel'lea kamancho konn muxaro ghetat tôr, ho tancho muxaro funkeachem dennem mhonn lekhinant, to tankam devo mhonn lêkhtat.
5. Urfattim, dusrim konn, apnnem kel'lim kamam fuddem ghalinastana, patkiank porian Dev Apnnak manovlolim korta mhonn zanna zaun, hea Devacher bhavarth dovortat; osleank, hea tanchea bhavarthak lagun, toch Dev Apnnak manovlolim korta.
6. Dekhunuch, jea mon'xank kornniam virêt Dev Apnnak manovlolim korta, tea mon'xank David hea utramnim bhagi mhonn porgôtt'ta:
7. "Guneanvachem bhogsonnem zôr mell'lem, patkachem khot zôr dhuun kaddlem, monis kitlo bhagi!
8. Zanchim patkam Sorvespor lekhak dhôrina, tim mon'xam kitlim mhonn bhagi!"
9. Hem bhagiem konnank lagta? Sunôt kel'leankuch, vô sunôt korunk na tankam-i? Tôr 'Abrahamak tachea bhavarthak lagun Devan Apnnak manovlolo kelo', oxem ami mhonnttanv.
10. Hem kednam ghòddlem? Tannem sunôt kelea uprant, ki korchê adim? Kelea uprant nhoi, punn ti korchê adim;
11. ani tachea bhavartha vorvim taka Devan Apnnak manovlolo kelo mhonn, hacho xik'ko koso Deva koddchi tannem sunotichi khunna ghetli. Hê porim sunôt korinastana bhavarth dhôrtat titleancho-i to bapui zata, kiteak hankam-i tanchea bhavarthak lagun Dev Apnnak manovlolim korta.
12. Ani sunôt kel'leancho-i to bapui, fokot tãnnim sunôt keli mhonn nhoi, punn kiteak amchea bapa Abrahaman sunôt korchê adinch dhôrlolea bhavarthachea margan tachê fattlean tim-i choltat.
13. Sonvsar tanchem daiz zatolem mhonn ji Devan Abrahamak ani tachê sonstik bhasavnni keli, ti tannem Somurt pall'loli mhonn nhoi, punn tannem Devacher tthevlolea bhavarthak lagun taka Devan funkea Apnnak manovlolo kelo dekhun.
14. Kiteak daiz Somurt palltat tanchench zait zalear, bhavarth zalo polko ani bhasavnni zali ôrth-nasloli.
15. Khorench Somurt fokot Devacho krôdh oddun haddta; punn Somurt zôr na, thõi konnuch Somurt môddunk xokona.
16. Mhonnttôch Devachi bhasavnni bhavarthacher tharail'li asa: kiteak ti ek funkeachem dennem ani hem Abrahamachê sogllê sonstik khatren mellpachem mhonngê fokot Devachi Somurt pavlea tankanch nhoi, punn Abrahama porim bhavarth dhôrtat tankam-i, kiteak to amam-somestancho bapui.
17. Tôr Povitr Pustokar oxem boroilolem asa: "Khub raxttrancho Hanvem tuka bapui kela". Khorench, zo Dev mel'leank jivit dita ani nant teô vostu aso-xeô korta, Tacher bhavarth dovrun Abraham' Deva mukhar amcho bapui.
18. "Tuji sonsôt itli vhôdd zatoli", oxem taka Devan dil'lea utra pormannem, bhorvanxeachem ek kirnn porian asum nozo aslem tednam bhorvanso dhôrun, tannem oso bhavarth dhôrlo ki khub lokancho to bapui zaunk pavlo.
19. Taka ogllim-unnim xembôr vorsam zal'lim; tôr apli kudd mel'lea mon'xachê kuddi sarki zalea ani tosoch Saracho kusvo jiv-naslolo zala mhonn polleun-ui, tacho bhavarth donvddoll'lo na;
20. Devachê bhasavnnê mukhar dubhavun to pattim-fuddem sorlo na; punn bhavarthantli tannem ghottai ghetli ani Devak vakhann'nni dili.
21. Tôr Apnnem bhasailam titlem-i xarti pavounk Devak podvi asa mhonn taka purnn khatri asli;
22. dekhunuch, hea tachea bhavarthak lagun, Abrahamak Devan Apnnak manovlolo kelo.
23. Punn "bhavarthak lagun taka Devan Apnnak manovlolo kelo", oxem jem Povitr Pustokar boroilolem asa, tem tachêch pasot nhoi,
24. punn amchê-i pasot. Amchea Somia Jezuk mel'leantlo punorjivont kela Tacher ami bhavarth dovortanv ani haka lagun amkam-i Dev Apnnak manovlolim kortolo;
25. kiteak khorem mhollear amchea opradhank lagun Devan Taka mornnachê adhin kelo ani amkam Apnnak manovlolim korchê pasot Taka punorjivont kelo.
