1. Sogllim mon'xam sorkari odhikariank khaltim ravchim, kiteak Devan dilea xivai odhikar na; odhikar choloitoleanchea hatant Devanuch odhikar ghala.
2. Mhonnttôch, jim konn odhikar choloitoleank virôdh kortat, tim Devachê sthapnnek virôdh kortat; virôdh kortat tim apunnuch apnnancher khastichem formonn oddun haddtat.
3. Borem kortoleank nhoi, punn vaitt kortoleank ki odhikarianchi bhirant asunk zai. Odhikariank bhienastana asunk sôdtai? Tôr borem tem kôr ani tanchi tuka vakhann'nni astoli.
4. Tujea boreak tim Devachi seva kortat. Vaitt mat korxi zalear bhieun rav: torvar gheun ravla to bexttoch nhoi; to Devachi seva korta dekhunuch, vaitt kortat tanchê koddsun to Devachea krodhachem farikponn gheta.
5. Mhonnttôch, Devachea krodhachê bhirantikuch lagun nhoi, punn tumchem ontoskornnuch tumkam oxem korunk sangta dekhun, tumi odhikariank khaltim ravunk zai.
6. Tumi dôndd farik kortat tachem karonn tench; kiteak sorkari mon'xam ghas gheun ho aplo kaido palltat tednam, tim Devachich seva kortat.
7. Zonn-ekleak farik korchem asa tem taka farik korat: dôndd farik korunk zai taka dôndd farik korat; xidav farik korunk zai taka xidav farik korat; bhidda dhôrunk zai tanchi bhidda dhôrat; man diunk zai tankam man diat.
8. Konnacheach kosleach rinnant ravum nakat; tumkam ekuch rinn asunk zai tem hem: ekamekacho môg korop. Karonn jim konn peleacho môg kortat, tãnnim ak'khi Somurt pall'li.
9. "Pordvar korum noiê; jivexim marum noiê; chorum noiê; axa dhorum noiê; ani asat titlêo her soglleô adnia hê êkêch adnient attaploleô asat:
10. "Tuzo môg kortai toso tujea peleacho kôr." Môg peleak kãich vaitt korina; mhonnttôch, jim konn môg kortat, tim Somurt sopurnnaien palltat.
11. Kall pavlo mhonn tumi tôr zannont; nhidentlim utthcho vogôt zalo. Ami bhavarth dhôrlo tea disa poros amchi soddvonn atam odik lagim asa.
12. Rat sorot aili, dis lagim pavlo; dekhun kallokhacheô vaitt kornniô sôddun dium-ia ani zhuzachim hatiaram gheun disa-uzvaddachea kornniank lagum-ia.
13. Disa-uzvaddak sobta toxem, mannsugen ami cholum-ia; dhumxannam nakat, bebdikai naka, pozoddponn vô bemoriad naka, zhogddim ani nattkaiô nakat.
14. Tumchea patki soimbachea vondovnniam pormannem cholum nakat; punn tancher zhuz korunk, dusrim hatiaram sôddun, khud Somia Jezu Kristak dhôrat.
