1. Bhavarthant amchi bhoinn Febe visvas favo-asloli bhoinn mhonn tumkam tichi vollokh korun ditam. Kenkreiant asa tê Povitr-Sobhechi ti sevika.
2. Somiachea nanvan Devachea bhoktank sobta toxem tika borê bhaxen gheiat; ani tumchi tika kosli-i goroz poddot zalear, tika adar diat, tôr sobar zannank ani mhaka-i ti pavlea.
3. Priskek ani Akuilak hanvem vicharlam mhonn sangat; Jezu Kristachê sevent tim mhojim bhagidaram.
4. Mhozo jiv rakhunk aploch jiv sonkottant ghalunk tim pattim sorunk nant; dekhun hanvuch nhoi, punn videxiancheô soglleô Povitr-Sobha tanchea upkarant asat.
5. Tanchea ghorant zomta tê Povitr-Sobhek-ui mhozo nomoskar. Epenetak, mhojea ixttak, hanvem vicharlam mhonn sangat; to Aziechea prantan Kristak dil'lem prothom' foll.
6. Mariek mhojem noman; tinnem tumchê pasot zaito vavr kela.
7. Andronikak ani Juniusak mhozo manacho nomoskar; te mhojê bhaxen Judêv porjentle ani mhojea vangdda te bondkhonnint asle; te nanvvoste dhormdute asle ani mhojê adim Kristachê pattlavdar.
8. Ampliatusak noman: Somia sovem to mhozo chôdd mogacho ixtt.
9. Kristachê sevent amchea soho-vangddia Urbanak ani Stakusak, mhojea mogachea ixttak, noman.
10. Apellesak noman: Kristacho apunn visvaxi sevôk mhonn tannem dakhoilam.
11. Aristobolus hachea ghoranneantlea zonn-ekleak noman. Herodionak vicharlam mhonn sangat: mhojê bhaxen to-i Judêv. Somiacho patthlav kel'lea Narsizachea ghoranneantleank noman.
12. Trifenak ani Trifosak mhozo nomoskar: Somiachê sevê-chakrent tim koxtt korun vavurtat. Persis, mhojê chôdd mogachê ixttinik, noman: tinnem-i Somia khatir khub vavr kela.
13. Rufusak, hea Somiachea vinchlolea sevokak, ani tachê avoik mhozo môg sangat: ti mhaka aplo put koso ballgita.
14. Asinkritus, Flegon, Hermes, Patrobas, Hermas, hankam ani tanchea vangdda aslolea amchea bhavam-bhoinnink hanvem tancho ugddas kela mhonn sangat.
15. Filologusak ani Juliek, Nereusak ani tachê bhoinnik, toxench Olimpasak, ani tanchea vangdda aslolea Devachea somest bhoktank noman kortam.
16. Somiachea ekvottant tumi bhav-bhoinn mhonnun, ekamekak tumchea mogachi khunna diat. Kristachea sogllea Povitr-Sobhancho tumkam maiêmogacho nomoskar.
17. Bhavam-bhoinnimnô, jim konn tumchê modem futti ghaltat ani tumi ghetlolê xikovnnechê vatter addkholli ghalun tumkam bhavartha thaun koddsoraunk sôdtat, tanchê vixim chotur ravat ani tankam pois dovrat mhonn hanv tumchê lagim magtam.
18. Oslim mon'xam Krista amchea Somiachim nhoi, bogor aplea pottachi chakri kortat. Godd-godd ani bhulovnnechea utramnim tim nennteank fosoitat.
19. Tumi bhavarthak khaltim mhonn sogllê kodden khobor pavlea dekhun, tumchê vixim hanv dhadoxi; punn tumi fokot borea vixim xannim ani sogllea vaitta vixim nenntim zaiat: itlench mhaka zai.
20. Ani xanti dita to Dev Soitanak veginch tumchea pãiam tolla ghalun mostitolo. Jezu Krist amcho Somi tumkam sodanch Aplem bholeponn dakhoum mhonn magtam.
21. Mhozo sohokari Timot tumkam noman korta; toxench Lusius, Jason ani Sosipater: he-i mhojê bhaxen Judev.
22. Hanv, Tersius, hem potr boroun kaddlam to, Somiachea ekvottant tumkam noman kortam.
23. Gaiusachea ghora hanv ravtam ani hangach amchi ak'khi sobha zomta. Tacho-i tumkam nomoskar; Erastus, hea xaracho bhanddari, ani amcho bhav Kuartus tumkamnoman kortat.
25. Sasnnak thaun asli ti Devachi ievzônn oxi atam xarti pavli: iugam kallam thaun Devan lipoun dovorlolem tem Sot provadianchea borovpam vorvim atanchea kallar prokaslem. Tachi vollokh atam sorv videxi raxttrank pavli ani oxem tim khaltikaien bhavarth dhôrunk xoktat. Hê ievzonnê pormannem Jezuk tumchê modem porgôttun, Xubhvortomanacho hanvem tumkam prochar kela. Tumi atam dhôrlolea bhavarthant tumkam ghott korunk Devak tank asa: tôr Taka mhoima! Hôi, zannvai-aslolo ekloch eklo mhollear Dev: Takach Jezu Krista udexim mhoima sasnnachea sasnnak! Amen!
