1. Tôr hanv vichartam: mon'xa, dusreancher tum nitichem formon nmartai? Konn-ui zaxi tum, oxem korunk tuka hôk'kuch na. Karonn dusrim mon'xam kortat tinch kortubam tum-i kortai; mhonnttôch, team dusreanchi tum zhôddti kortai tednam, tum tujeruch tujea guneanvachem khastichem formonn martai.
2. Oslim kortubam kortoleancher Dev khastichem formonn marta tednam, Tachem formonn nitichem mhonn ami zannonv.
3. Punn tum, mon'xa, dusreancher khastichem formonn martai ani teach borabôr tinch kortubam kortai, ani oxem korun Devachem khastichem formonn tuka chuktolem mhonn dista tuka?
4. Vô To subham' konnvallaiecho, vhôdd sonsnnikaiecho ani mhatmeponnacho mhonn, tum Tachi beporva kortai? Devachi konnvallai jivit bodlunk tuka oddun haddta mhonn noklloi tum?
5. Tujem kalliz nibor korun jivit bodlunk tum kobul zainãi; oxem korun, Devacho niticho nirnnoi porgôtt zatolo tea Tachea krodhachea Disak Tachea krodhacho bhar tujea mathear tum vaddoit asai.
6. Tea disa To zonn-ekleak ap-aplea kornniam pormannem farik kortolo:
7. jim konn boreô kornniô korit ravtat ani mhoima ani man ani ovinaxiponn sôdtat, tankam To Sasnnik Jivit ditolo;
8. punn jim konn aploch adav sôdtat, sot manun ghenant ani khotteponnak lobhdol'lim asat, tankam krodhacho uzo dovorlolo asa.
9. Koxtt ani tollmolle vaitt kortolea zonn-eklea mon'xak ravtat - Judevank poilê svater, punn Grikank-ui;
10. mhoima ani man ani xanti borem kortolea zonn-ekleak - Judevank poilê svater, punn Grikank-ui.
11. Tôr Dev hachem-tachem tondd polleun Aplo nirnnoi dina.
12. Zãnnim Somurti virêt patok kelam, tea mon'xancho Somurti virêt nas zatolo; zãnnim Somurt gheun patok kelam, tanchi Somurti pormannem mon'subi zatoli.
13. Somurt aikol'lean mat konnuch Devak manovlolim zainant; punn Somurt palltat tankam ki Dev Apnnak manovlolim kortolo.
14. Somurt naslolim videxi mon'xam soimbachea uzvaddan Somurti pormannem choltat tednam, zorui tankam Somurt na, torui tim apnnankuch somurt zatat.
15. Somurt formaita tem aplea kallzancher boroil'lem asa mhonn tim aplê chalin dakhoitat; tanchem ontoskornn hakach govai dita, kiteak mhollear tanchinch chintna kednam-kednam tim opradi mhonn ani kednam-kednam tim niropradhi mhonn tankam dakhoitat.
16. Hanv porgôtt'tam tea Xubhvortomana pormannem, Jezu Krista vorvim mon'xanchea gupit chintnam-bhavnanchi porian Dev mon'subi kortolo tea Disa hem dokhol zatolem.
17. Atam tujem kitem? Tum apunn Judêv mhonnttai, Somurticher tum patieun asai, tujea Devacho tuka obhiman asa,
18. Tachi khuxi tum vollkhotai, ani Somurt xiklai dekhun vaitt sôddun kitem borem vinchun kaddchem tem tum somzotai;
19. tum kudd'ddeank vatt dakhoupi, kallokhant asloleancho tum uzvadd,
20. budh-nasloleancho tum xikoupi, sadheam-bholeancho tum guru mhonn tuka tujich khatri zalea, kiteak Somurtint soglli zannvai ani sogllem sot attaplolim tuka melltat.
21. Tum herank tôr xikoitai, tukach kiteak xikoinãi? Chorum noiê mhonn dusreank updês ditai, tôr tunch koso chôrtai?
22. Pordvar korum noiê mhonnttai - ani tunch pordvar kortai? Hem kitem? Kuddea devancho kanttallo dhôrtai khorem - ani tanchim devllam nagoitai to tunch nhoi?
23. Tum Somurtichi vhoddvik sangtai ani tori tunch Somurt môddtai mhonnttôch, tum Devachem Nanv bhoxttaitai.
24. Tôr Povitr Pustokar oxench boroilolem asa: "Raxttram modem Devachea Nanvachi ninda zata ti tumkanch lagun."
25. Tum Somurt samballtai zalear, sunôt tuka upkarta khori; punn Somurt môddtai zalear, sunôt tunvem kelea astam-i, ti korunk naslolê porim zaloi.
26. Sunôt korunk na to videxi monis Somurtiche kaide pallta zalear, Deva mukhar to sunôt kel'lea Judêv mon'xa sarko zauncho na?
27. Boroiloli Somurt hatant gheun ani sunôt korun-ui tum Judêv Somurt môddtai mhonnttôch, aplê kuddichi sunôt korunk na to videxi monis Somurt pallun tum opradhi mhonn dakhoun ditolo.
28. Tôr khoro Judêv konn? Ani khori sunôt khõi asa? Zo bhaileanuch Judêv, to khoro Judêv nhoi; ani sunôt kuddichich zalear, ti khori sunôt nhoi.
29. Zo konn bhitorlean Judêv, to ki khoro Judêv; tachi sunôt kallzachi sunôt; hi sunôt boroilolê Somurtichi nhoi, punn Devachea Atmeachem kam'. Oslea mon'xak mon'xam koddchi nhoi, bogor Deva koddch ivakhann'nni mellta.
