1. Mhonnttôch, ami kitem mhonnchem? Devachi doiallai odik subham' zaunchê khatir, ami patkantuch ravchem?
2. Na ki na! Patkak ami tôr meleanv: hem zôr khorem, koxim mhonn ami ozun patkantuch jietoleanv?
3. Amkam soglleank Povitr-Snanachea somoiar Jezu Kristant buddoun kaddleant, mhonngê Tachea mornnant buddoileant: hem tumi nokllot?
4. Mhonnttôch, Povitr-Snana vorvim Tachea vangdda Tacheach mornnant amkam nikhipileant. Kitea pasot? Zoso Bapan Aplê mhoimê bhorit podven Kristak mel'leantlo punorjivont kelo, toxench amchem-i jivit sarkem novem zaunchê khatir oxem kelam!
5. Tachê bhaxen morun Jezu ani ami zôr ekach jivachim zaleanv, tôr Tachê bhaxen punorjivont zaun-ui, To ani ami ekach jivachim zatoleanv.
6. Hea amchea patki soimbacho bhosm korchê khatir ani patkachea gulam'ponnantli amkam suttka mellchê pasot, amchea adlea-pornnea soimbak khursar marlam: hem ami borench somzun gheunk zai.
7. Mon'xam mortat tednam, tim patkachê podventlim suttlim.
8. Punn Krista borabôr ami meleanv zalear, Tachê borabôr ami jivim astoleanv: ho amcho bhavarth.
9. Kiteak Kristak Devan mel'leantlo punorjivont kelo mhonnttôch, Taka anink moronn na; mornnak Tacher anink koslich podvi na: hem ami zannonv.
10. To melo tednam patkachê podventlo êkêch pavttin To sarkoch suttlo, ani Tachem jivit atam sogllench Deva khatir.
11. Tôr tumchê-i vixim oxench somzat ki tumi-i patkachê podvek mel'lim zaleant, ani Krista Jezuchea ekvottant tumchem jivit sogllench Deva khatir.
12. Tumchê mornnadik kuddicher patkan anink raj cholounchem nhoi ani oxem tumi kuddichea vondovnniank pallo diuncho nhoi;
13. nhoi mhonn tumchê kuddiche sandhe khotteponnachim autam korun patkachê chakrek lavum nakat. Portench zalear, tumi mornnantlim jivim zaleant mhonn, Devak tumchem somorponn korat ani Devachi chakri korunk, tumchê kuddiche sandhe Devak man'ta toslea jivitachim autam koxim Devak vopun diat;
14. ani tednam khoreponnim patok anink tumcher apli podvi cholounchem na, kiteak tumi Somurtichê adhin nhoi, punn Devachê doiallaiechê adhin asat.
15. Mhonnttôch kitem? Ami Somurtichê adhin nhoi, punn Devachê doiallaiechê adhin asanv dekhun, ami atam patok korchem? Na ki na!
16. Konn-ekleacheô adnia pallunk tumi gulam'ponnachi koblat korxat tôr, jea konnacheô tumi adnia palltat tachim tumi gulamam zatat: hem tumi nokllot? Mhonnttôch, vô mornnak pavoitolea patkachim, vô Devachê doiallaiechem nitivontponn bhôgunk tumkam pavoita toslea videiponnachim tumi gulamam.
17. Tumi ekdam patkachim gulamam asleat, punn tumkam dil'lê bhavarthachê xikovnnek kallzant thaun tumi khaltim zaleant; ho Devacho vhôdd upkar.
18. Patkachea gulam'ponnantlim sutton, tumi Devak man'ta toslea jivitachê chakrek lagleant.
19. Tumchea soimbachê osoktaiek lagun, mon'xanchea chalteam utramnim uloitam: tumchê kuddiche sandhe pozoddponnachea ani khotteponnachea gulam'ponnak tumi vopun dil'le, ani sogllem tumchem jivit khotteponnuch zal'lem; toxench atam, sogllem tumchem jivit povitr zaunchê khatir, tumche sandhe Devak man'ta toslea jivitachê chakrek vopun diat.
20. Tumi patkachim gulamam asleat tednam, Devak man'ta toslea jivita sorim tumi aplê sot'techim asleat.
21. Tumkam atam loz dista tea kortubancho tumi tednam koslo fôll kaddlo? Moronn xevôtt tancho.
22. Atam patkantlim mekllim zaun ani Devachê sevek laglea uprant, tumcho fôll povitrtai ani hicho xevôtt Sasnnik Jivit.
23. Patok dita to muxaro moronn; Dev dita tem funkeachem dennem amchea Somia Jezu Kristachea ekvottant Sasnnik Jivit.
