1. Dekhun vichartam: Devan Aplê porjek sôddun dili zait? Kodinch zaum nozo! Tôr hanvui Israelkar, Abrahamachê sonsticho, Benjaminachea kullacho.
2. Devan hê porjek poilinch thaun Apli mhonn ghetlea; tôr Tannem tika koxich soddun diunk na! Elijachi khobor kaddun Povitr Pustok kitem sangta tem nokllot tumi? Deva mukhar Israelacho guneanv korun tannem oxem mhollem:
3. "Sorvespora, Tujea provadiank tãnnim jivexim marle ani Tujeô vedi môddun uddoileô. Urlam to ekloch hanv, ani mhozo-i zalear te jiv kaddunk sôdtat."
4. Ani Devan taka kitem zobab dilo? "Baala mukhar dimbi môddunk na tosle sat hozar dadle vinchun Hanvem kuxin kaddun Mhaka dovorleat."
5. Toxench atam-i Devachê doiallaien vinchloleancho êk lhan zomo asa.
6. Doiallaien mhollam mhonnttôch, tanchea kornniank lagun nhoi, oxem zalem. Na zalear, doiallai anink khõi urli?
7. Mhonnttôch kitem? Israel porza sôdtali tem tika mell'lem na; punn vinchun kaddloleank tem mell'lem, heranchim kallzam nibor zalim.
8. Povitr Pustokar oxem boroilolem asa:" Devan tankam zodd monachim keleant; aicho dis porian, dolle asun tankam disona, kan asun tankam aikona."
9. Toxench Davidan mhollem: "Tanchem jevonn tankam fas zaum, dusreank manddlolea zallant tinch farom, dusreank manddlolea addkhollink adllon tinch khala poddum, dusreank ghal'li birmôt tancheruch poddum.
10. Tankam dixtti poddona toxem tanchea dolleancher kallôkh ieum, tancho fatticho konno sarko bagovlolo urum."
11. Tôr hanv vichartam: tim pãi adllon poddleant khorem, punn tanchem nisontton zaunchê khatir poddleant mhonn sangchem? Kednanch na! Punn tanchea guneanvak lagun videxiank taronn mell'llem, ani Judevamnim atam hurben tanchi dêkh gheunk zata.
12. Tanchea guneanvan ak'khem mon'xakull girest zalem zalear ani tanchea ovisvaxiponnan videxiank subham' axirvad mell'llo zalear, sogllo Judêv lôk bhavarth dhôrunk pavtolo tednam kitlo odik vhôdd zauncho na somestancher denvtolo to axirvad?!
13. Tôr tumkam, videxiamnô, oxem sangtam: hanv videxiancho Dhormdut mhonnttôch, hea muniarponnant mhaka obhiman bhògta;
14. ani mhojea Israel porjentlea bhavam-bhoinnim modem nattkai vaddounk ani oxem tanchê modlea kãi zannank taronn favo korunk hanv pavum mhonn mhoji axa.
15. Tim bhavartha thaun koddsoron mon'xakullak zôr Deva-xim ieunk favo zalem, tim apunuch bhavarth dhôrun Deva-xim portun pavtolim tednam, hacho ôrth konn mhonncho? Khorench khorem, mel'lim mon'xam novean jivont zaleant mhonnpachem!
16. Poilench kaddlolem muttbhôr pitt Devak sonvskarlem zalear, sogllem môllun toiar kel'lem pitt-ui sonvskarlolem zalem. Toxench rukhachem pall Devak sonvskarlolem zalear, tache khande-i sonvskarlole zale.
17. Ballgil'lea eka zoitunache khande moddun uddoile mhonn somzat, ani eka zonglli zoitunachi khandi garf korun tea ballgil'lea zoituna bhitôr rigoili; tumi, [videxiamnô,] tea zonglli zoituna sarkim, punn atam ballgil'lea zoitunachea palla thaun choddlolê puxtticho tumkam vantto mell'lla.
18. Toxem zalear, môddun uddoilolea khandeam mukhar [mhonngê Judevam mukhar] tumi boddai dakhoum nakat; tumchean boddai koxi dakhounk zata? Tumi fokot êk khandi; tumi pallak ghottai-puxtti dinant, pall ki tumkam ghottai-puxtti dita.
19. "Mhaka garf korun zoitunant lavchê khatir, te khande môddun uddoileat", oxem tumi mhonnttoleat.
20. Hôi, tem khorem. Tãnnim bhavarth dhôrlo na dekhun, tankam môddun uddoile; tumi ghôtt ubim asat tim tumchea bhavarthak lagun. Mhonnttôch hachê vixim gorvan bhorom nakat, bhirantin cholat.
21. Devan zôr soimbachea khandeank soimba pormannem vaddonk dovorle nant, tôr tumkam-i To vaddonk dovrina zait.
22. Dev borabôr dulôb ani khôr mhonn ugddas dhôrat: ovisvaxi zaleant tanchê sorim To khôr; punn Tachê dulobaient tumi ravxat zalear, Dev sodanch dulôb astolo; na tôr, tumi-i bhair poddtoleat.
23. Judêv lokan aplo onbhavarth sôddun dilo zalear, tankam To portim bhitôr kaddtolo; kiteak novean bhitôr kaddunk Devak tank asa.
24. Zonglli zoitunache fantte tumi, tori astana Tannem tumkam tumchê zati bhair ballgil'lea zoitunak garf korun laileant; toxem tôr, jê zatin ballgill'lea zoitunache khande asle, te tanchea khaxa zoitunak porot lavunk Devak kitlem odik sompem!
25. Bhavam-bhoinnimnô, hea sogttant ek sot liplolem asa, ani tem tumi zanno zal'lim mhaka zai; na tôr, apunnuch xannim mhonn chintun tumi tumchêch sombondim murgottxat. Tem sot mhollear hem: Israel-porjecho êk vantto aplea vadeacho zaun gelo, tem fokot sorv videxi raxttrancho lôk bhitôr soro porian.
26. Ani hê bhaxen Dev ak'khea Israelak soddvonn ditolo. Tôr oxem boroilolem asa: "Siona thaun ietolo Taronn-Dinnar, Jakobachea Ghorannea thaun tanchi obhokti To pois kortolo.
27. Jednam tanchim patkam kaddun uddoitolom, tednam Hanv tanchê kodde ho korar kortolom."
28. Devachem Xubhvortoman tãnnim manun gheunk na dekhun, Judêv lôk Devacho dusman zalo khorem, punn tem tumam videxiank lagun; tori tim vinchun kaddloli Devachi porza mhonnttôch, tim vixexponnim Devachê chôdd opurbaiechim, punn hem tanchea purvozank lagun.
29. Dev Aplem mon kodinch bodôlna: dil'lim dennim To fattim ghena, zankam apoileant tanchem apovnnem To pattim kaddina.
30. Tumi-i eka vellar Devachea adniank khaltim nasleat, punn Judêv lôk Devak khalto na zalo dekhun, tumkam videxiank atam Tachi doiallai favo zali;
31. toxench, tumkam videxiank favo zal'li doiallai polleun, tankam-i ti Devachi doiallai favo zaunchê khatir, Judev lôk atam Devak khalto na.
32. Sogllim mon'xam [Judev ani videxi] Devachea adniank khaltim na zaun, apnnench kel'lê hê bondkhonnint poddunk Devan tankam nirmilem. Oslea nirmonnan soglleankuch Apli doiallai dakhounchi mhonn Devachi ievzônn zali.
33. Kitlo mhonn khôl Devachê girestkaiecho, Tachê zannvaiecho ani Tachea gineanacho somdir! Konnachean tthav gheunk zait Tachea nirnnoiancho?! Konn somzunk pavot Tacheô vattô?!
34. "Sorvesporachem mon konn tori zanno zala? Tacho budhvont zal'lo konn tori asa?
35. Taka konnem adim-poilim dennem dilem, dekhun tacho upkar Devan farik korcho poddlo mhonn asa?"
36. Sogllem Tachê koddsun ieta, sogott Tachê udexim ani Tachêch pasot asa. Taka sasnnachea-sasnnak mhoima! Amen!
