1. Mhonnttôch, bhava-bhoinnimnô, Devachê vhôdd konnvallaiecho ugddas korun, tumchê lagim hanv magtam tem hem: povitr ani Devak man'ta tosli êk jivi boli koxi tumchench Taka somorponn korat tumchi khori bhokti mhollear hich zaunchi.
2. Hea atanchea sonvsarachea nemam pormannem tumi cholum nakat; punn, zoxem Devan tumchea monachi novsornni kelea, toxench tumchea jivitachi chal-ui sarki novi zaum-di. Oxem Devachi khuxi konn ti, kitem borem, kitem Taka ma'nta, ani kitem sopurnn tem tumi vollkhunk pavtoleat.
3. Mhaka Devan funkea dil'lea muniarponna khatir, tumkam zonn-ekleak sangtam: favo tachê poros odik tumchêch vixim chintum nakat; punn, Devan mapun dil'lea bhavartha pormannem, zonn-eklean moriadin aplem mol korchem.
4. Amchê kuddik sobar sandhe asat, punn soglle sandhe tench kam' korinant;
5. toxench, ami sobar zannam zaun-ui, Krista sovem amcho ekchar zal'lean, ami êkuch kudd, ani amchê-modlo zonn-eklo hê kuddichea dusrea sogllea sandheank zôddlolo asa.
6. Devan zonn-ekleak dil'lea dennea pormannem, amkam veg-veglle vorgunn asat: Devacho sondêx diuncho vorgunn zalear, ap-aplea bhavarthachea mapa pormannem tacho upeôg korcho;
7. sobhechi seva korcho vorgunn zalear, zotnaien ti seva korchi; xikovpacho vorgunn zalear, fikirin xikounchem;
8. dusreank dhir diuncho vorgunn zalear, hurben dhir diuncho. Dusreank kitem-i ditai tednam, udar monan di; tuka dusreanche rodhikar dil'lo asa zalear, bhar gheun kaido pall; doiall kornniô kortai tednam, hanstea tonddan teô kôr.
9. Tumcho pritimôg dhông-naslolo zaum-di. Vaittacho dvês dhôrun, borem tench korit ravat.
10. Khorim bhav-bhoinn mhonn, moipasan ekamekachi opurbai korun dakhoiat; apnnam poros chôdd dusreank man diat.
11. Sogllea monan, besarmai korinastana, kallzachê hurben Somiachi seva korat.
12. Tumkam bhorvanso asa mhonnun khuxal ravat; koxttam-dogdamnim thir ravat; thambo nastana magnnem korat;
13. gorjek sampoddlolea tumchea bhavam-bhoinnink mozôt korat; vattsurancho poramôs korat.
14. Tumkam dhumallo ditoleank axirvad diat: hôi, axirvad mhonnttam, tancher xirap ghalum nakat.
15. Khuxal astoleam borabôr khuxal zaiat; dukhest astoleam borabôr dukhest zaiat.
16. Soglleankuch êkêch toren manan vagoiat. Gorvan fulon bhonvum nakat, punn lhanank-khalteank lagim gheiat. Apunnuch xannim mhonn chintum nakat.
17. Konnakuch vaitt vaittan farik korum nakat, punn sogllea mon'xanchê nodrek kitem borem tem korunk sôdat.
18. Ghòddta zalear, soglleam lagim xantin jieunk tumchê kodde zata titlem korat.
19. Mogacheamnô, peleacho sudd gheunk sôdum nakat, farikponn gheupi Dev asa. Povitr Pustokar oxem boroilolem asa: "Farikponn ghetolo to Hanv; diunk zai tem ditolo to Hanv, uloita to Sorvespor."
20. Anink-ui oxem boroilolem asa: "Tuzo dusman bhukela zalear, taka jevunk di; tanela zalear, taka pieunk di; kiteak oxem korun tum taka aplea kornnianchi loz bhogo-xi kortoloi."
21. Vaittak tujer zoit vhorunk dium naka, punn borem tem korun vaittak haroi.
