1. Mhonnttôch Judêv zaun ogllo adav koslo? Vô sunôt korun upêg koslo?
2. Khub, sogllea vattamnim. Poilê svater, Devan Aplo sondêx tanchê svadhin kelo.
3. Tanchê bhitorlim thoddim zannam ovisvaxi zalim zalear, kitem zalem? Tim ovisvaxi zalim mhonnun, Devachem-i visvaxiponn bhongtolem kitem?
4. Na ki na! Sogllim mon'xam fottkirim zalear-ui, Dev sotevont zaunkuch zai; tôr Povitr Pustokar oxem boroil'lem asa: "Mhojer formonn martai tednam, Tujem formonn nitichem; mhoji zhôddti kortai tednam, chuki virêt Tuji zhôddti."
5. Punn zôr jitlim ami onitivont zatanv titlo odik Dev Tachê doiallaien nitivont mhonn dokhol zata, tôr ami kitem mhonnchem? Mon'xachê chaltê bhaxen vichartam: Aplea krodhachi xikxa Dev amcher tapta tednam, To oneai korta mhonn amchean sangum-ieta?
6. Na ki na! Dev zôr onit korta, koso mhonn To sonvsaracho Mon'subidar zatolo?
7. Zôr hanv fottkiro dekhun Dev sotevont mhonn odikuch dokhol zata ani oxi Tachi mhoima vaddta, mon'subent hanv guneanvkar mhonn koso utortolom?
8. Oxem zal'lem tôr, borem kitem utpon zaunchê khatir kiteak vaitt korchem nhoi? Oxench hanv xikoitam mhonn sangun mhojer kãi zannam boglanttam ximpddaitat. Oslea mon'xank ki guneanv asa mhonn sanglear onit na.
9. Mhonnttôch kitem? Videxianchê poros Judevanchi poristhiti odik bori? Kednanch na. Judev ani Grik, sogllinch ami patkachê adhin asanv mhonn hanvem tôr spoxtt sangun dakhoilam.
10. Povitr Pustokar oxem boroilolem asa: "Boro monis mhonnlolo eklo porian na,
11. xanno konn na, Devak sôdtolo konn-êk na!
12. Soglleamnim boro marôg soddun sôddla, soglleanchi chal zaun gelea noxtti. Boro monis mhonnlolo nanch, na, eklo porian na!
13. Uktea fondda sarko tancho gollo, tanchê jiber fokot ghatki utram. Onttantlean gollta furxeachem vikh;
14. tanchem tondd xirapamnim ani koddsannin bhòrlam.
15. Niropradhi rogot vikraunk tanche pãi suddsuddit dhanvtat,
16. vetat thõisôr fokot desvatt ani nisontton.
17. Xantichea margachi tankam khoboruch na,
18. tanchea dolleam mukhar Devachi bhirant mhollear nanch!"
19. Aplea kortubank konnench koslinch nibam diunk zaina zaunk ani sogllea mon'xamnim Devachê mon'subecho nirnnoi gheunchê khatir, Somurt sangta titlem-i Somurtichê adhin asat tankanch lagu zata mhonn ami zannonv.
20. Kiteak Somurtichim kamam kelim mhonnun konnuch mon'xam Devak manovlolim zatit-xim na. Somurti vorvim ieta tem itlench: patkachi vollokh.
21. Somurt ani Provadi Devachê doiallaiechea nitivontponnak govai ditat khorem, punn atam, hea novea kallar, ki Devan Somurtichê manddavolli bhair ti ugddapi keli,
22. kiteak tench Devachê doiallaiechem nitivontponn Jezu Kristacher bhavarth tthevtolea somestank pavta: Dev koslich ontôr korina.
23. Khorench, sogllim patki zalim, ani Aplê mhoiment vantto gheunk jem Devan mon'xank nirmil'lem tem tankam chuklem.
24. Devachê doien, Jezu Kristan mon'xank suttka dil'lean, tim funkea Devak manovlolim zatat.
25. Bhavarth dhôrtoleam khatir Devan Jezuk Aplem rogot varoun bhogsonnem divpachi boli zaunk nemla: oxem korun Tannem Aplê doiallaiechem nitivontponn porgôtt kelem, poilê svater adlea kallar kel'lea patkam pasot,
26. kiteak tea kallar Tannem sonsnnikai dhôrun patkank favo asloli xikxa launk na; ani toxench atam hea amchea kallar kel'lea patkam pasot, kiteak Aplem nitivontponn doiallaiechem mhonn ani Jezucher bhavarth tthevtolea somestank Apunnuch Apnnak manovlolim korta mhonn Dev dokhol korta.
27. Mhonnttôch boddai anink khõichi urli? Sogllich ubon geli. Hachem nimitkaronn konn? Somurti pormannem ami kel'leô kornniô zait? Na! Tachem nimitkaronn bhavarth!
28. Kiteak Somurtiche kaide pallun nhoi, punn bhavartha udexim ki mon'xam Devak manovlolim zatat: hi amchi khatri.
29. Dev Judevanchoch Dev tôr? Videxiancho-i nhoi To? Videxiancho-i to Dev mhonn dubav na.
30. Kiteak Dev êkuch: To sunôt kel'leank, tanchea bhavarthak lagun, Apnnak manovlolim korta; ani Toch sunôt korunk na tankam-i, tanchea bhavartha udexim, Apnnak manovlolim korta.
31. Mhonnttôch kitem? Bhavarth bhitôr kaddun ami Somurticho ôrth bhair martanv? Na ki na! Urfattim, ami Somurticho khoro ôrth dakhoun ditanv.
