1. Bhavartha vorvim Devan amkam Apnnak manovlolim keleant dekhun, amchea Somia Jezu Krista udexim Deva lagim ami xantin jietanv;
2. tôr ami atam onnbhovtanv ti Devachi doiallai Tannench amkam bhavartha vorvim bhôgunk pavoileant; ani Takach lagun Devachi mhoima amkam melltoli mhonn bhorvanso dhôrun ami murgott'tanv.
3. Titlench nhoi; anink-ui amkam onnbhov mell'lla: dhumalleam modem ami murgott'tanv, kiteak dhumalleam modem amchi sonsnnikai vaddta,
4. sonsnnikaiê vorvim amchi topasnni zaun Devak ami manonk pavtanv; ani topasnnen Devak manovleanv mhonnttôch, amchea kallzamnim bhorvanso upzota.
5. Ho bhorvanso amkam fottoina, kiteak, amkam dil'lea Povitr Atmea udexim, Devan amchea kallzamnim Aplo môg ôtla.
6. Kitench korunk amkam sokôt nasli tednam, Kristan, Tacho nemlolo vêll pavtôch, khotteam pasot Aplo jiv dilo.
7. Eka promannik mon'xa pasot legun jiv diunk konnak-ui kotthin; tori eka borea mon'xa pasot konn-êk eka vellar morunk fuddem sorot.
8. Punn ami ozun patki asleanv tednam, Krist amchê pasot melo ani oxem Devan Apunn amcho môg korta mhonn dakhoilem.
9. Tachea mornnak lagun atam ami Devak manovlolim zaleanv mhonnttôch, odikuch Taka lagun Dev amkam Aplea krodhantlim nivartolo.
10. Ami dusman asleanv tednam, Aplea Putachea mornna udexim Devan amkam Aplea mogachê vengent portun ghetlim; mhonnttôch atam, amkam Aplea mogachê vengent portun ghetlea uprant, kitlo odik teach Putachea jivita udexim To amkam purnn taronn diuncho na?!
11. Titlench nhoi: Tachê vorvim amkam atam Aplea mogachê vengent portun ghetleant dekhun, amchea Somia Jezu Krista udexim hea Deva pasot ami sontostanv ani murgott'tanv!
12. Borem tôr, eka mon'xa udexim patok hea sonvsarant bhitôr sorlem ani patka udexim moronn; ani oxem sogllea mon'xank moronn pavlem, kiteak soglleamnim patok kelem.
13. Devan Somurt diunchê adim patok sonvsarant aslem. Somurt nasli mhonnttôch, Somurt môddlea mhonn konnachoch guneanv korunk zainaslo.
14. Tori astana, dil'lo kaido mon'xamnim Adanva porim môddunk na astana-i, Adanva thaun Moizesa porian mornnan somestancher raj choloilem. Adanv mhollear ieuncho aslo tea Mon'xacho purv-rupkar.
15. Adanvachem patok ani Devachi funkea dakhoiloli doiallai, hanchê modem sôr korunkuch zaina. Eka mon'xachea guneanvan sogllea mon'xank moronn pavlem zalear, kitlem odik oprub tem, eka mon'xa Jezu Krista vorvim somest mon'xank subham' ponnan funkea favo kel'lem, Devachê doiallaiechem dennem!
16. Devachea dennean mell'lem kitem? Ani eka mon'xachea guneanvan mell'llolem kitem? Sôr korunkuch zaina! Kiteak mhollear, eklea mon'xachea patka uprant zhôddti zali ani khastichem formonn poddlem, punn khub-khub guneanvam uprant ailem mon'xank Devak manovlolim korta tem funkea dil'lem dennem!
17. Eka mon'xa vorvim, tachea opradhak lagun, somestancher mornnan raj choloilem: hem khorem; punn tachê-von kitli odik vhôdd hi doiallai! Mhonngê ekleach Jezu Kristak lagun hem favo-naslolem dennem ghetat tim sogllim Devak manovlolim zatat ani jivitachem raj bhôgunk pavtolim!
18. Mhonnttôch, zoxem eka mon'xachea guneanvan somest mon'xancher khastichem formonn poddlem, toxench eka mon'xachi purnn bhoktichi kornni somest mon'xank Jivit zôddun dita, mhonngê tankam Devak manovlolim korta.
19. Eklo monis Devachê adniek khalto ravlo na dekhun sogllim mon'xam patki zalim; toxench eklo monis Devachê khuxek khalto ravun, sogllim mon'xam Devak manovlolim zatolim.
20. Guneanv choddon-vaddon vechê khatir Somurt bhitôr sorli; punn zõi patok choddlem-vaddlem, thõi Devachi doiallai tachê-von odik choddli-vaddli;
21. hê porim, zoxem patkan mornna vorvim raj choloilem, toxench atam Devachi doiallai amkam Devak manovlolim korun raj choloita ani, amchea Somia Jezu Krista udexim, Sasnnik Jivitak amkam pavoita!
