1. Mhonnttôch, Jezu Krista sovem asat tankam atam koslench khastichem formonn na.
2. Kiteak Jezu Krista sovem jivit dita tê Atmeachê Somurtin patkachê ani mornnachê Somurtintlim tumkam nivarlim.
3. Mon'xasoimbachê osoktaiek lagun jem Somurti kodde ghoddonaslem, tem Devan kelem: Tannem Apleach Putak dhaddlo. Ho Put, patkacho nas korchê khatir, patki mon'xasoimb gheun ailo ani patka khatir Apunnuch boli zalo. Oxem mon'xasoimbachea patkacher Devachê khastichem formonn poddlem.
4. Oxem Devan kelem mhonnun, jem promannikponn Somurticho hetu aslo, tem amchean purnntaien zôddun gheunk zata, kiteak ami atam patki mon'xasoimb vondaita tê vatten nhoi, punn Povitr Atmo oddun vhorta tê vatten cholun jietanv.
5. Jim konn mon'xasoimbachea vondovnniam pormannem jietat, tancho iklo mon'xasoimbak avoddta tacheruch dovorlolo asa; punn jim konn Povitr Atmo oddun vhorta tê vatten cholunk axetat, tancho êkuch irad: Atmeakavoddtat teô vostu.
6. Mon'xasoimbacher iklo dovorlear, tuka mellta fokot moronn; punn Povitr Atmeacher to dovorlo zalear, tuka mellta jivit ani xanti.
7. Mon'xasoimbacher iklo dovortat tim Devachim dusmanam zatat, kiteak amchem mon'xasoimb Devachê khuxek khaltem ravona, nhoi mhonn tachean khaltem ravunk zaina.
8. Mon'xasoimbachea vondovnniam pormannem choltat tanchean Devak manom nozo;
9. punn tumchem jivit mon'xasoimbachea vondovnniam pormannem nhoi; Devacho Atmo tumchê sovem tthikann korun jieta mhonnttôch, tumchem jivit Atmean choloilolem jivit. Khorench, jea mon'xam sovem Kristacho Atmo na, tim Kristachim nhoi.
10. Punn zôr Krist tumchê sovem asa, tumchi kudd patkak lagun mortoli zalear-ui, tumkam kiteak Devan tumkam promannik keleant jivim dovrunk tumchê sovem Atmo asa.
11. Zannem Jezuk mel'leantlo punorjivont kela, Tacho Atmo tumchê sovem tthikann korun asa: oxem zalear, Zannem Jezu Kristak mel'leantlo punorjivont kela, Toch, tumchê sovem jietolea Aplea Atmea vorvim, tumcheô vinaxi kuddi novean jivont kortolo.
12. Mhonnttôch bhavam-bhoinnimnô, amkam kaido asa khoro, punn mon'xasoimbachea vondovnniam pormannem jieunchem mhonn amkam mon'xasoimba sorim kaido na.
13. Kiteak mon'xasoimbachea vondovnniam pormannem jiexat zalear, tumi mortoleat; punn Atmeachea bollan mon'xasoimbachea vondovnnianchem boll môddxat zalear, tumkam Jivit astolem.
14. Zankam Devacho Atmo choloita, tim sogllim Devachim bhurgim.
15. Tumkam anink êk pavtt bhirantin bhôrta toslo gulam'ponnacho atmo tumi gheunk na; khorem mhollear, tumkam Devachim apnnailolim bhurgim korta to Atmo ki tumi ghetla; Tachea bollan 'Ab'ba!' mhonngê 'Bapa', oso ami ulo martanv.
16. Ani oxem ami Devachim bhurgim mhonn Povitr Atmo, amchea otmea borabôr, Apunnuch govai dita.
17. Bhurgim mhonnttôch ami daiji; hôi, daiji-bhurgim Devachim ani daiji bhav-bhoinn Kristachim: Tachê mhoimechim bhagidaram ami zatoleanv zalear, Tachea koxttanchim-i ami bhagidaram zaunk zai.
18. Hea kallache koxtt-dogd ani Dev amkam ugddapi kortolo ti mhoima, hanchê bhitôr koslich sôr zaina, oxem mhaka dista;
19. kiteak Devachea bhurgeanchê prokasovnnek ak'khi rochnna otrekun otrekta.
20. Aplo xevôtt xarti pavounk rochnnechean nozo zalem tem tichêch khuxen nhoi, punn Apli ievzônn pallun haddchea bhorvanxean Devanuch oso nirnnoi ghetlo.
21. Ho to bhorvanso: Aplea bhurgeanchea mhoimê bhorit svadhinponnant rochnnek vantto diunchê pasot, khud Dev tika kusddeponnachea gulam'ponnantli soddoun svotontr kortolo.
22. Ak'khi rochnna ballonteranche vollvolle ozun porian bhôgta mhonn ami zannonv;
23. ani fokot rochnna nhoi: bogor ami-i amchêch bhitôr pirgon asanv, kiteak Devan Aplo Atmo prothom' foll mhonn amkam dila, ani dekhun To amkam sopurnnaien Aplim bhurgim kortolo, mhonngê amchea kuddink suttka ditolo tea disachi vatt ami polleun asanv.
24. Kiteak mhollear, bhorvanxean amkam taronn mell'lam; ravtanv tem dixtti poddlolem zalear, tantum bhorvanso na; tôr dixtti poddta tacho konn anink bhorvanso dhôrta?
25. Punn dixtti poddona tacho ami bhorvanso dhôrtanv tednam, sonsnnikaien ami tachi vatt polleun ravtanv.
26. Têch porim, ami osokt mhonnun, Povitr Atmo amchea adarak ieta. Favo tê bhaxen kitem magchem tem ami nokllonv; dekhun, utramnim ucharunk zainant tosle haskar-suskar sôddun, Atmo amchê khatir Apunnuch vinoti korta.
27. Dev kallzam topasun vollkhota, ani Povitr Atmeachi axa konn ti To borem zanno, kiteak Devachêch khuxê pormannem povitr kel'leam pasot To vinovnni korta.
28. Jim konn Tacho môg kortat ani jea konnank Tannem Aplê ievzonnê pormannem apoileant, tanchê borabôr sogllea vostumnim Dev tanchea boreak vavurta mhonn ami zannonv.
29. Mon'xamnim Devachea Putacho rupkar gheunchê khatir ani oso To somest bhavam-bhoinnim modlo Malgoddo zaunchê khatir, Devan tankam adim-fuddench mogan vollkhun kaddleant ani nemleant.
30. Jea konnank adim-fuddem Tannem nemleant, tankam Tannem apovnnem kelam; jea konnank Tannem apovnnem kelam, tankam Tannem Apnnak manovlolim keleant; jea konnank Tannem Apnnak manovlolim keleant, tankam Tannem mhoimevont-ui keleant.
31. Hem sogllem dolleam mukhar dovrun, atam ami kitem mhonnchem? Dev zôr amchê vatten asa, amcher add konn asot?
32. Aplea khaxa Putak legun Devan vattaunk na, punn amam-somestam pasot Taka dilo mhonnttôch, Tachê borabôr koso To amkam sogott funkea diuncho na?
33. Devan vinchun kaddleant tancho konn guneanv kortolo? Tim atam guneanva mekllim mhonn khud Dev nirnnoi dita nhoi? Tôr khastichem formonn martolo konn?
34. Jezu Krist amchê khatir melo nhoi? Itlench nhoi: To punorjivont zalo; ani atam To Devachea uzvea hatak bosla ani Deva mukharamchê khatir vinoti korta nhoi?
35. Mhonnttôch Kristachea moga thaun konn amkam tôddun kaddit? Upodre tôddun kaddtole? Oddchonni vô dhumallo bi? Bhuk ani vinglleponn? sonkoxtt vô torvar bi?
36. Oxem tôr Povitr Pustokar boroil'lem asa: "Tujêch pasot amkam dis-bhôr vollvollaun martat, marunk toiar kel'lea xelliam vori amkam lêkhtat."
37. Punn amcho môg kela Taka lagun hea sorv ghodditamnim ami bharim zoitivont.
38. Khorench, Jezu Krista amchea Somia udexim Devacho môg ami onnbhovunk pavleanv. Tôr atam tuka zai tem dhôr: moronn vô jivit, devdut vô ontralla veleô xokti ani podviô, sonvsarant atam ghòddta ani fuddarak ghoddon iet titlem-i, prithvê voir vô prithvê pondak asa tem sogott - hantlea konnachean vô kiteacheanuch hea Devachea moga koddsun amkam toddun kaddunk koxêch bhaxen zaunchem na: hacho mhaka dubavuch na!
