1. Bhavam-bhoinnimnô, tankam taronn mellum mhonn mhojea kallzant hanv otrektam ani Deva lagim magtam.
2. Deva sorim tankam khotkhotit hurba asa mhonn hanvuch govai ditam, punn ti goir-somozacher dhòrloli asa.
3. Kiteak mhollear, Devachem doiallaiechem nitivontponn vollkhonastana, apnnachench dusrem ek promannikponn ubem korunk sôdtat ani Devachem doiallaiechem nitivontponn tãnnim khaltikaien manun gheunk na.
4. Punn Kristan Somurt sompadnnek pavoili; ani atam Devachem doiallaiechem nitivontponn bhavarth dhôrtoleam somestank mellta.
5. Somurti thaun ieta tea promannikponna vixim Moizesan oxem boroilam: "Somurt palltat tim tichê vorvim Jivit zôddtolim."
6. Punn bhavartha thaun upzon mon'xank Devak manovlolim korta tea dennea vixim to oxem sangta: "Tujeach monant oxem mhonnum naka: 'Konn mhonn voir sorgar choddun vetolo?'s - mhonngê Kristak sokla denvoun haddunk -
7. vô 'konn mhonn sokla patallant denvun vetolo?' - mhonngê Kristak mel'leantlo utthounk.
8. Tôr Povitr Pustok mhonntta: "Utor tuka laginch asa: tujea tonddant ani tujea kallzant". Hem utor tuka Devacher bhavarth dovrunk apoita tem utor, ani toch bhavarth ami porgôtt'tanv.
9. Khorench, Jezu Somi mhonn tujea tonddan ucharun tum vollkhun ghexi ani Devan Taka mel'leantlo punorjivont kelo mhonn kallzant thaun bhavarth dhôrxi zalear, tuk taronn melltolem.
10. Kallzant thaun bhavarth dhôrun ami Devak manovlolim zatanv; tonddan vollkhun gheun amkam taronn mellta.
11. Kiteak "Tacher bhavarth dovortat tim sogllim kodinch lojek sampoddchim nant": oxem Povitr Pustok sangta.
12. Mhonnttôch Judev ani Grik mon'xam modem koslich ontôr anink na; kiteak soglleancho Somi ekloch. Apnnak ulo martolea somestank pavunk khub girest To,
13. kiteak Povitr Pustokar boroil'lem asa tea pormannem, "Somiachem Nanv gheun Taka ulo martat titleank-ui taronn melltolen".
14. Mhonnttôch Tacher bhavarth dovorlo na zalear, Taka ulo martolim koxim? Ani Tachi khoboruch aikunk na zalear, bhavarth dovortolim koxim? Sondêx porgôttpi nastana, aikotolim koxim?
15. Ani tankam dhaddlea xivai porgôtt kortolim koxim? Tôr Povitr Pustokar oxem boroilolem asa: "Xubh khobor porgôtt'tat tanchim panvlam kitlim sobit!"
16. Punn xubh khobor sogllinch manun ghenant. Dekhunuch Izaias mhonntta: "Sorvespora, ami porgôttlam tem konnem manun ghetlam?
17. Mhonnttôch Kristacho sondêx kanar poddcho; ani to kanar poddun, bhavarth utpon zauncho.
18. Tôr hanv vichartam: to sondêx tanchea kanar poddunk na bi? Dubava virêt poddla, karonn "Xekan'xek prithumecher tancho tallo gazlo, sonvsarachea ximam porian tancho sondêx pavlo.
19. Anink ek vichartam: Israelachê porjek hea sondexacho ôrth mell'llo na bi? Khud Moizes apunnuch poilo zobab dita: "Raxttr legun nhoi toslea lokachi tumkam nattkai ie-xi kortolom; eka murkea raxttracher tumcho rag petto-so kortolom."
20. Ani Izaias oxem porian mhonnunk pattim sorona: "Mhaka sodinaslim tankam Hanv mell'llom, ani Mhaka vicharinaslim tankam Hanvem Mhojem dorxon dilem."
21. Ani Israel-porjê vixim to mhonntta: "Mhojer bhavarth dovrina punn portench Mhojer kolpota toslea lokak dis-bhôr Hanv Mhoje hat vistarit asam."
