1. Bhavarthant ghott nhoi tankam lagim gheiat, punn tanchea khasgi motanchê babtint vad korum nakat.
2. Konn-konn aplea bhavartha pormannem apnnanchean sogllem khaum-ieta mhonn somzotat; punn dusrim, osokt tim, fokot xak-bhaji khatat.
3. Jim konn apnnanchean kitem-i khaum-ieta mhonn somzotat, tãnnim kitem-i khainant tanchi beporva korchi nhoi; toxench jim konn kitem-i khaunk toiar nant, tãnnim kitem-i khatat tanchi zhôddti korchi nhoi, kiteak Devan hankam manun ghetleant.
4. Ani tum, Dusreachea chakranchi zhôddti korunk tum konn? Tim ubim asat ki bhuim poddleant tem tancheach Dhonian polleunchem; ani tim ubim ravtolinch, kiteak tankam ubim dovrunk Somiak podvi asa.
5. Konn-konn disam modem ontôr kortat; dusrim soglle dis ekach mhotvache mhonn dhôrtat. Zonneklean ap-apli khatri korun gheunchi.
6. Disam modem ontôr kortat tim Somiachea manak ti ontôr kortat; ani kitem-i khatat tim Somiachea manak khatat ani apunn khatat tea pasot Devak dhin'vastat.
7. Amchê bhitorlim konnuch apnnanchêch khatir jienant, ani konnuch apnnanchêch khatir moronant.
8. Ami jivim asanv tim Somia khatir jietanv, ani morun vetanv zalear, Somia khatir mortanv. Mhonnttôch, zaum jivim zaum melolim, ami Somiachim.
9. Kiteak Krist melo ani punorjivont zalo to heach pasot, mhonngê morun geleant tancher, toxench jivim asat tancher, Tannem Aplo odhikar cholounchê pasot.
10. Tôr kiteak mhonn tum tujea bhavachi vô bhoinnichi zhôddti kortai? Ami sogllim Devachea neai-asona mukhar ubim ravtoleanv.
11. Kiteak Povitr Pustokar oxem boroilolem asa: "Mhojea jiva-chean - uloita to Sorvespor - sogllim Mhaka dimbi môddtolim; ani soglleô jibô Devak mhoima ditoleô."
12. Mhonnttôch, amchê bhitorlea zonn-eklean ap-apnnacho hixôb Devak diuncho poddtolo.
13. Dekhun, hea fuddem ami ekamekachi zhôddti anink korum noiê; portench zalear, khõicheach bhavachê vô bhoinnichê vatter addkhôll ghalun tankam sokla uddoina zaunk vô patkant poddunk tankam soêg dina zaunk tumi tharav gheuncho.
14. Somia Jezuchea ekcharant asun hanv hem sogllê khatren zannom: koslich vôst apnnapinch mhelli nhoi, punn ti mhelli mhonn chint'tat tea mon'xank ti mhelli.
15. Jevnna-khanna pasot tujea bhavak vô bhoinnik tum dukhoitai zalear, tunch pritimogan cholonãi. Jea bhava vô bhoinni pasot Krist mela, tea bhavacho vô bhoinnicho tujea jevnna-khannak lagun nas zaunk dium naka
16. Jem kitem borem mhonn tumi dhôrtat, tachem konnuch vaitt ulounk pavum noiê.
17. Kiteak Devachem Raj amchea jivitant khanna-pinneacher dhòrlolem na; Povitr Atmeachea dennean Devak man'ta tem korun ani soglleam modem xanti samballun ani khuxalkai ximpddaun ki Devachem Raj amchea jivitant choddta-vaddta.
18. Kiteak hê ritin Kristachi seva kortat tim Devak manovtat ani mon'xam modem borem nanv zôddtat.
19. Mhonnttôch, xanti vosounk ani ekamekak dhir diunk pavoita tê vatten cholum-ia.
20. Jevnna-khannak lagun Devachem kam' padd korum nakat. Jevnna-khannacheô soglleô vostu xud'dh, khorem; punn omkem khaun peleak patkant ghaltai mhonn tuka dista zalear, tem khaun tum vaitt kortai.
21. Mas khainastana, vô soro pienastana, vô tujea bhavak vô bhoinnik patkant ghalta tem korinastana ravlear odik borem.
22. Jem tum khatren manun ghetai, tem tujê bhitôr Deva mukhar samball. Jea konnank apunn kortat tem aplea mona pormannem sarkem asa mhonn dista, tim mon'xam bhagi.
23. Apunn khatat tachê vixim dubav dhôrtat tim Deva mukhar guneanvkar zatat, kiteak tanchi kornni bhavarthachê khatrecher dhòrloli na, ani bhavarthachê khatrecher dhòrlolem na tem sogllem patok.
