1. Bhavam-bhoinnimnô, Somurtichi tumkam vollokh asa mhonnttôch, hanv sangunk vetam tem tumkam somzotolem: mon'xam jivim asosôruch Somurtik tancher odhikar asa mhonn nokllot tumi?
2. Logn zal'lê êkê bailechi gôt polleiat: ticho ghôv jivo aso-sôr, Somurti pormannem ti taka bandloli urta; punn ghôv morot zalear, ghôv-bailechea kaidea meklli ti zali.
3. Mhonnttôch ghôv jivo astana dusrea dadlea lagim zôr ti geli, tika lôk pordvarinn mhonnttolo; punn ticho ghôv melo zalear, ti ghôv-bailechea kaidea meklli zali, ani dusrea dadlea lagim zôr ti logn zali, ti pordvarinn zaina.
4. Toxench, mhojea bhavam-bhoinnimnô, Kristachê kuddi udexim tumi-i Somurti sorim mel'lim zaleant dekhun, atam tumi dusreachim zaleant, mhonngê mel'leantlo punorjivont zala Tachim tumi zaleant; oxem amchem jivit Devachê sevent follabhorit zaunk pavta.
5. Ami amchea mon'xa soimbapormannem jietaleanv tednam, Somurtin zagoiloleô patki vondovnniô amchea kuddichea sandheamnim vavurtaleô; oxem amchem jivit mornnachê sevek upkartalem.
6. Amkam bandun dovortali tê Somurtik atam ami meleanv; mhonnttôch Somurtintlim ami suttleanv. Amchi atanchi chakri boroilolea nemanchê adlê manddavolli pormannem nhoi; ami atam kortanv ti chakri Povitr Atmeachê novê manddavolli pormannem.
7. Tôr kitem mhonnchem atam? Somurtuch patok, oxem mhonnchem? Na ki na! Ji mhaka patkachi vollokh mell'llea, ti Somurti udexinch mell'llea, kiteak "axa dhorum noiê", oxem zôr Somurtin mhonnunk naslem, tôr axa kitem tem mhaka gomchem naslem.
8. Adniechi sondi dhôrun, patkan sogllê torecheô axa mhojê bhitôr upzoileô; kiteak Somurt na zalear, patkak jivuch na.
9. Adim, Somurt nasli tednam, hanv jivo aslom; adnia aili tednam, patkak jiv ailo,
10. ani hanv melom. Jiv diunchê khatir dil'lê adnienuch mhaka zalear mornnak pavoilo.
11. Tôr adniê vorvim sondi dhôrun, patkan mhaka fottoilo ani adniê vorvim mhozo jiv kaddlo.
12. Somurt povitr mhonn dubav na, ani adnia-i povitr, neaii ani bori.
13. Mhonnttôch jem kitem borem aslem, tench mhaka mornnachem karonn zalem? Na ki na! Zalam tem patkan kelam; borê vostucho (mhonngê adniecho) upêg korun, patkan mhaka moronn haddlem; ani hê porim, adniê udexim patkan sogllea mapa-bhaili apli bhõikôr patki podvi choloili.
14. Somurt adheatmik mhonn ami zannonv, punn hanv zalear patkan aplo gulam' korunk vikto ghetlolo masa-rogtacho monis.
15. Hanv kortam tem mhaka somzona; tôr jem borem mhaka zai, tem hanv korina; punn jem vaitt mhaka bilkul naka, tench hanv kortam;
16. mhaka naka tem hanv kortam mhonnttôch, Somurt bori mhonn hanv man'tamxem zalem.
17. Toxem zalear, hem konn korta? Khorench mhollear hanv nhoi, punn mhojea kallzant rigun ravlam tem patok.
18. Jem kitem borem tem mhojê bhitôr, mhonngê mhojea mon'xasoimbant, tthikann korun ravona mhonn hanv zannom; kiteak boreachi axa dhôrunk mhojea hatant asa khorem, punn tem korunk hanv xokona;
19. mhonnttôch jem borem korunk hanv axetam, tem hanv korina; punn jem vaitt mhaka naka, tench hanv kortam.
20. Mhaka naka tem hanv kortam zalear, mhojea kallzant rigun ravlam tem patok ki tem korta; hanv nhoi.
21. Dekhun ho nêm' mhojea jivitant cholta mhonn hanv dekhtam: borem korunk sôdtam tednam, vaitt tench hanv vinchun kaddtam.
22. Devachê Somurti pasot mhojem mon anondan bhoron ieta;
23. punn mhojea mon'xasoimbant êk veglloch nêm' hanv polletam: mhojea gineanan hanv manun ghetam tê Somurticher to zhuz korta ani mhojea mon'xasoimbant asa tea patkachea nemacho mhaka koidi korta.
24. Kitlo nirbhagi monis hanv! Mhaka mornnachê vatten oddun vhorta tea mon'xa soimbantlo konn mhaka nivarunk xokot?
25. Ekloch Dev, amchea Somia Jezu Krista udexim! Taka vakhann'nni! Mhonnttôch hi mhoji gôt: ginean aslolo monis koso Devachê Somurticho chakôr zaunk hanv kobul; punn hanv patki mon'xasoimbacho dekhun, patkachea nemacho hanv gulam'.
