1. Ek bhakit porgôtt zata. Sorvesporachem utor Hadrakachea desacher add asa, ani tem Damaskacher tharlam. Kiteak, jitlem Israelachea sogllea kullancher, titlem sogllea mon'xakullacher Sorvesporache dolle tharlole asat.
2. Têch porim, tachê ximer aslolea Hamathacher, ani Tiracher ani Sidonacher, haka bud'dhichi khub huxarkai asa zalear-ui, Devachem utor add asa.
3. Tiran apnnak ek ghott kott bandlam, ani dhul'li vori rupem santthoilam, ani rosteanchê matiê vori bhangar.
4. Punn atam Sorvespor soglli tachi malki nikllaitolo; somdiracher To tachi podvi môddtolo, ani khud xaracho ujean bhosm zatolo.
5. Tem polleun Ashkelon thorthortolo; têch bhaxen Gaza bhieun kamptolem; ani têch porim Ekron-ui, kiteak tachea fuddaracho visvas bhonglo. Gazacho raza pollun vetolo, ani Ashkelon osadd poddtolo;
6. punn Ashdodant sonkorzat lôk ravtolo! Hôi, Filistevkaranchea gorvacho Hanv nas kortolom;
7. masa borabôr gilltat tem rogot tanchea tonddantlem Hanv bhair kaddtolom, tanchim kanttalleachim khannam tanchea dantam modlean zhombun kaddtolom. Punn tancho-i urlolo zomo amchea Devacho zatolo; to zatolo Judantlem ek kull, ani Ekron zatolo Jebusitam sarko.
8. Tedna êk rakhonndar koso Hanv Mhojem ghor rakhtolom ani konnankuch ieunk-vochunk diuncho na; anink konnuch porot tancher zulumxai cholouncho na, kiteak Hanv atam zagrut asam.
9. Sionachê dhuvê, ekdom' khuxal za! Jerusaleachê dhuvê, anondache ul'las sôdd! Ho polle, tuzo raza tujê-xim ieuncho zalo; doiallaiechem nitivontponn gheun to zoitivont zala; to vinômr khalto; eka gaddvacher, eka xingracher, gaddvachea poracher, to bosun ieta.
10. Efraimache roth ani Jerusaleache ghodde to nanch kortolo; ani zhuzache dhonnu to môddtolo. Raxttrank to xanti porgôtt'tolo, eka somdira thaun dusrea somdira porian, ani Eufrat Nodi thaun prithvechea ximam porian tachem somraj pavtolem.
11. Tumchê pallien, tumchea korarachea rogtak lagun, tumchea koidiank udok naslolea fonddantle Hanv suttka ditolom.
12. Visvas dhôrun ravtolea koidiamnô! Kil'leant portun vochat; Hanv tumkam dupett mapan portun ditolom: oso aiz tumkam soput ditam.
13. Tôr Judak Hanvem Mhozo dhonnu koso bagaila; Efraimak Hanvem bann koso dorier bosoila, tujea putank, Siona, tujea putancher add, Gresiê, Hanv utthoitolom ani zhuzariachê torsadi vori Hanv tuka vaportolom.
14. Tedna Sorvespor tanchê voir dixtti poddtolo, ani Tacho bann eka zhoglavnnea porim zhogzhogtolo. Dhoni Sorvespor turturi vazoitolo ani dokhinnechea vadollantlean fuddem sortolo.
15. Sorvsoktivont Sorvespor tankam rakhtolo! Tim dusmanancho nas kortolim ani gofinnichea fatramnim jikhtolim. Soro zal'lê bhaxen tim pietolim ani aroddtolim; ani vediche konnxe bhizounk vaportat toslea vattea sarkim tim bhòrlolim astolim.
16. Tea disa, Sorvespor tancho Dev tankam zoit ditolo, kiteak tim Tachi porza, Tacho hindd; eka mukuttachea motiam-mannkam porim, Tachea desant tim jhigjhigtolim.
17. Kitlem mhonn mon bhulovpachem ani sobit-sundor tem zatolem! Tornnatte chedde dhannea-gottean zatole gulgulit, ani toxench tornnattim cheddvam novea sorean.
