1. Mhojê lagim uloitalo to devdut portun ailo, ani eka nhidlolea mon'xak utthoitat toso tannem mhaka utthoilo.
2. Ani tannem mhaka vicharlem: 'Kitem dixtti poddta tuka?' Hanvem sanglem: 'Mhaka dixtti poddta tem hem: ek diveachem pedd, sogllench bhangarachem, ani tachê tenkxer êk vatto asa; ani tacher sat dive ghalunk taka sat tonddam asat.
3. Ani tachê kuxik don zoitunanchim zhaddam asat, ek vatteachea uzveak ani dusrem tachea daveak.'
4. Mhojê kodde uloitalo tea devdutak hanvem vicharlem: 'Mhojea dhonia, hea vostuncho ôrth konn?'
5. Tedna mhojê lagim uloitalo tea devdutan mhaka oso zobab dilo: 'Tancho ôrth noklloi tum?' Hanvem mhollem: 'Na, mhojea dhonia.'
6. Tedna tannem mhaka oxem sanglem: Hem Jerubbabela vixim Sorvesporachem utor: 'Bollan nhoi, podven nhoi, punn Mhojea Atmean' - uloita to Sorvsoktivont Sorvespor!
7. Vorixtt porvota tum apunn kitem mhonn somzotai? Jerubbabela mukhar tum ek sopatt zomin zatoli! Konnxea-sondhicho fatôr to bhair kaddtolo tedna, sogllo lôk zoizoikar korum oso arddotolo: 'Axirvad tujer! Axirvad tujer!'
8. Sorvesporachem utor mhaka oxem ailem:
9. Jerubbabelachea hatamnim he Devmondirachi buniad ghalea; tachech hat hem ghor sompoitole. (Tedna Sorvsoktivont Sorvesporan mhaka tumchê-xim dhaddla mhonn tumkam kollon ietolem.)
10. Mol-naslolea ghôddnniancho ho dis khoro, punn tachi beporva kortat tinch, Jerubbabelachea hatant konnxea-sondhicho fatôr polletolim tedna, kitlim mhonn sontosan murgôtt'tolim!' 'He mhollear sat Sorvesporache dolle; te sogllo sonvsar bhonvtat.'
11. Uprant hanvem taka vicharlem: 'Ani diveachea peddachea uzveak ani daveak him don zoitunanchim zhaddam asat tim, tem kitem?'
12. Ani fuddem hanvem taka vicharlem: 'Don bhangarachea tonddantlean tel bhair ghaltat tem kitem?'
13. Tannem mhaka portipall kelo: 'Tim kitem tem noklloi tum?' Hanvem mhollem: 'Na, mhojea dhonia.'
14. Tedna tannem sanglem: 'He mhollear dog obhixek kel'le monis; te sogllea sonvsarachea Sorvesporachê sevek raji asat.'
