1. Portun hanvem mhoje dolle ubarle, ani pollelem tem hem: don porvotam modle char roth ietale ani te porvot kãxeache porvot asle.
2. Poilea rothak tambdde ghodde asle, dusreak kalle ghodde,
3. tisreak dhove ghodde, ani chovthea rothak khotam-aslole gobra-rongache ghodde asle - sogllech bollixtt.
4. Mhojê lagim uloitalo tea devdutak hanvem vicharlem: 'He konn, mhojea dhonia?'
5. Devdutan mhaka oso portipall kelo: 'Te mhollear ak'khea sonvsarachea Dhonia mukhaile bhair sorun vetat te mollbache char-ui vare.
6. Kalle ghodde ut'torechea desachê vatten vetat; dhove tanchê pattlean vetat; ani khotam-aslole dokhinnechea desachê vatten vetat.'
7. Sonvsarar pahro korchê khatir te nettan bhair aile. Tannem tankam formailem: 'Cholat, sonvsarar pahro korunk vochat.' Tãnnim sonvsarar pahro keli.
8. Uprant Tannem mhaka ulo korun mhollem: 'Polle, ut'torechea desa vatten geleat tãnnim ut'torechea desant Mhozo Atmo somadhan kelo.'
9. Tedna Sorvesporachem utor mhaka oxem ailem:
10. Heldai, Tobija ani Jedaia Babiloniê thaun pavlolea hea nirvaxeanchim dennim ghe ani teach disa Jefaniachea puta Josiachea ghora voch.
11. Magir rupem ani bhangar gheun êk mukutt kôr, ani Jehozadakachea puta Joshua porom'-iadnikachea mathear to ghal;
12. ani taka oxem sang: "Sorvsoktivont Sorvespor oxem sangta: Fantto oxem nanv poddlolo ho polle êk monis asa; aplea zagea thaun ho fantto futt'tolo ani Sorvesporachem mondir to bandtolo.
13. Hôi, hoch to Sorvesporachem mondir bandtolo to; to raiall dobajean nhestolo, ani aplea xinvasonar bosun raj choloitolo; ani tachea uzveak êk iadnik astolo. Tea dogam-i bhitôr sopurnn xanti astoli.
14. To mukutt Heldaiachea, Tobijachea, Jedaiachea, ani Jefaniachea putachea manak Devan favo kel'lea doiallponnacho ugddas koso Sorvesporachea povitr Mondirant astolo.
15. Pois asat tim atam ietolim ani Sorvesporachem povitr Mondir bandpachea kamak khand laitolim." ' Tedna Sorvsoktivont Sorvesporan mhaka tumchê-xim dhaddla mhonn tumkam kollon ietolem. Ani tumi Sorvespora tumchea Devachem utor mhenotin pallxat zalear, hem ghoddon ietolem.'
