1. Tea disa, Davidachea Ghorannea khatir ani Jerusaleant ravtoleam khatir êk zhôr futt'toli, ani hi tankam tanchea patkantlim ani mhelle-ponnantlim nitôll kortoli.
2. Tea disa - uloita to Sorvsoktivont Sorvespor! - kuddea devanchim nanvam desantlim Hanv chirun uddoitolom, ani konn anink kednanch tancho ugddas korcho na; toxench provadiank desantle bhair uddoun ani mhellem mon desantlem pusun kaddun Hanv dês mukt-mekllo kortolom.
3. Ani konn-ui ozun bhakit korit tôr, tacho khaxa avoibapui taka mhonnttolo: "Tum jivo urcho naim, kiteak Sorvesporachea nanvan tum fotti sangtai!" Ani to bhakit korta astananch, tacho khaxa avoibapui taka aspas tôpun uddoitolo.
4. Tea disa, provadi sondêx ditana aplim dorxonam sangunk loztole ani lokak fottounchea monan te kensanchem avoronn ghalche nant.
5. Tachê bodlek te mhonnttole: "Hanv provadi nhoi; hanv fokot êt xetkamti, bhurgeponnar thaun zomnintlem hanvem pik kaddlea."
6. Ani konn-ui taka vicharit zalear: "Tujea hodd'ddear he ghave khoinche tôr?" to oso zobab ditolo: "Mhojea ixttanger gel'lom tedna, tãnnim te ghave mhaka keleat. " '
7. Zagi za, torsadi, Mhojea gonvlliacher add, Mhojea bhagak asa tea mon'xa add!' - uloita to Sorvsoktivont Sorvespor! 'Gonvlliak mar ghal, xellianchi duspôtt kôr; ani Hanv lhanam-dhaktteam add Mhozo hat ubartolom!
8. Ak'khea desant oxem ghòddtolem - uloita to Sorvsoktivont Sorvespor! - Tin vantteantlea donancho nas zatolo, tankam jivexim martole, ani tisro vantto jivo urtolo.
9. Ani ho tisro vantto Hanv ujeantlean vhortolom, rupem nitoll kortat toxem tankam nitoll kortolom, ani bhangar topastat toxem tankam topasun kaddtolom. Tim Mhojea nanvak ulo martolim, ani Hanv tankam zap ditolom; Hanv mhonnttolom: 'Hi Mhoji porza', ani tim mhonnttolim: 'Sorvespor amcho Dev!'.
