1. Ek bhakit: Israela vixim (ani Juda vixim) Sorvesporachem utor: Zannem sôrg vistarla, prithum' ghôddlea ani mon'xacho otmo tachê bhitôr akarla, to Sorvespor oxem mhonntta:
2. Polle, Hanv Jerusalem tachê sobhonvtim aslolea sogllea porzank ghunvôll haddta toslo êk pelo korcho asam. (Jerusalea borabôr Judak-ui veddho ghaltole tea kallar hem ghòddtolem.)
3. Tea disa, Hanv Jerusalem sogllea porzank ubarunk zaina toslo ekdom' zhôdd fatôr kortolom; sonvsarantlim sogllim raxttram tacher add zomlim zalear-ui, to ubarunk sôdtit tim sogllim apunnuch zobor dukhovtolim.
4. Tea disa - uloita to Sorvespor! -sogllea ghoddeank Hanv kampero haddtolom ani tancher bostoleank pixe kortolom. Ani Judachem Ghorannem Hanv rakhtolom, punn raxttranchea sogllea ghoddeank kudd'dde korun sôddtolom.
5. Tedna Judache razkarbhari apnnankuch mhonnttole: "Jerusaleant ravtat tim ghôtt asat, kiteak tancho Dev Sorvsoktivont Sorvespor."
6. Tea disa, Judachea razkharbariank lankddachê raxint lastolea eka aidona sarke kortolom, tonnachea bhoream modem zolltê chuddi sarke; ani apnna bhonvtim uzveak ani daveak aslolea sogllea porzank te girastole. Ani lokan bhòrlolem Jerusalem aplêch svater astolem, Jerusaleant.
7. Sorvespor poilim Judachea tombunk suttka ditolo, ani oxem Davidachea Ghoranneachi mhoima ani Jerusaleant ravtoleanchi mhoima Judachê mhoimê poros odik vhôdd zaunchi na.
8. Tea disa, Sorvespor Jerusaleant ravtoleank rakhtolo. Tea disa, tanchê bhitorlo odik osokt to Davida sarko zatolo, ani Davidachem Ghorannem Deva sarkem zatolem, tanchê fuddem choltolea Sorvesporachea duta sarkem.
9. Tea disa, Jerusaleacher akromonn korunk ietolea sogllea raxttrancho Hanv bhosm kortolom.
10. Punn Davidachea Ghoranneacher ani Jerusaleant ravtoleancher Hanv doiallaiecho ani vinovnnecho Atmo ôt'tolom, ani tim Mhojer, apnnench tôploleacher, aple dolle ghaltolim. Zoxem konn-ui ekleach putachem dukh korta, toxem tim tachem dukh kortolim, ani zoxem konn-ui eka malgoddea pasot vhoddê khontin roddta, toxench tim tachê pasot vhoddê khontin roddtolim.
11. Megid'dochea mollar Hadad-Rim'mona pasot zal'lem toxem, tea disa Jerusaleant mottem rudon astolem.
12. Ani ak'kho dês rudon kortolo, ek-ek kull ap-aplê pallien: Davidachea Ghoranneachem kull aplê pallien, ani tancheô bailô ap-aplem rudon kortoleô; Nathanachea Ghoranneachem kull aplê pallien, ani tancheô bailô ap-aplem rudon kortoleô.
13. Levichea Ghoranneachem kull aplê pallien, ani tancheô bailô ap-aplem rudon kortoleô; shimeiachea Ghoranneachem kull aplê pallien, ani tancheô bailô ap-aplem rudon kortoleô;
14. ani sogllim urlolim kullam, dôr-ek kull ap-aplê pallien, ani tancheô bailô ap-aplem rudon kortoleô.'
